عام الحُب 2 (مكتملة)

الورد للورد يا نجمة، بقا فيه وردة تبيع وردة! ")

- مِش معقول بقا
- في أي يا سديم؟
- كل ما أكون قاعدة هِناك في الجنينة ألاقي وردة تتحدف عليا وأبص ملاقيش حد حواليا!!

أبتسمِت وهي بتلعب في شعري وبتعملهولي جنب ضفيرة وجنب تاني سايباه
- مَا يمكن الورد بيحبك يا سُدم!
- الورد بردو يا ماما!!
ضحكت وهزت راسها علامة على عدم معرفتها وقالتلي:
- الورد للورد وأنتِ تستاهلي وردة كبيرة شبهك
ضحكت وحضنتها وقولتلها:
- ألاه قوليلي يا ماما صحيح بابا كان هيرمي نفسه مِن على السطح علشانك؟
أبتسمِت وقالتلي:
- كان طايش بس حبيته مِن طيشه كان بيتقدملي كل شوية وبابا يرفضه، مكنش عندي مانع وقتها أتجوزوا كان كويس وبيشتغل وعنده بيته بس بابا مِش حابه، لحد مَا تعب وفي يوم لمَا طلع مِن عندنا مرفوض برضو طلع على السطح بسرعة، سمعت صريخ جارتنا وجيرانا بيجروا وراه.
بضحك - كان وقف على السور وعايز يرمي نفسه منه!!

بصتلها وقولتلها:
- بجد يا ماما دا على كدة بابا جريئ أوي كده؟
- بجد وقتها حط بابا قدام الأمر الواقع واتجوزنا، أبوكي مِش وحش هو كان بس بيحب، بيحبني.
- هو أنا مُمكن ألاقي حد يحبني زي بابا كدة؟!
دخل بابا وقتها علينا وقالي:
- ليه لأ لو لقيتي اللي يستاهلك متسبيهوش خالص يا سديم وأنا لو شوفت الشخص دا يستاهل النجمة بتاعتي هجوزها ليه على طول
حضنته وقولتله:
- بحبك يا أحلى بابا في الدنيا.

وأنا بتمشي في الجنينة زي عادتي لقيت بنوته صغيرة قربِت مِني وشدتني مِن الفستان
- أيوة يا قمر!
قولتها وأنا بنزل على رجلي علشان أوصل لمستواها.
- خالو عطاني دا ليكِ وقالي أديهولك
بصيت عليها وأنا مستغربة وأخدتها مِن أيديها، كان بوكس صغير لطيف كده عليه فراشه دهبية، فتحته لقيت وردة!!
شبه الورد اللي بيتحدف عليا، بصتلها كانت مشيت وبعدت، قررت أمشي وراها لحد ما لقتها واقفة مع شخص عاطيني ظهره وماسك بلالين هليوم كتير وألوانهم أغرتني إني أقرب مش الشخص طبعًا.

- عطتها ليها يا خالو هات بلونه بقا.
- خدي يا فريدة كلهم ليكِ
- بس دول كتير أنا لو مسكتهم هطير معاهم.
أبتسم ونزل لمُستواها وظهرلي وشه، شخص هادي بغمازة طويل وظريف بس هو مين!!
طبطب على دماغها وقالها:
- ديدا حبيبة خالو لو طارت زياد هيطير وراها زي سوبر مَان وينقذها.
ضحكت عليهم وقربت منهم وقولتله:
- مُمكن أخد بلونه لو ديدا متزعلش؟
قربت مِني وشاورتلي أشلها - أنتِ تاخدي نصهم وأنا نصهم وكدة محدش يطير ولو طرنا خالو زياد يجي ينقذنا
بصتله وأنا ببتسم وقولتله:
- مُمكن استأذن من خالو زياد في كلمه.

أبتسم وشاورلها تجري على حد وأعتقد مامتها
- نقعد هناك؟
- نقعد.
قعدت على نفسي الكرسي اللي كُنت بقعد عليه والوردة بتتحدف عليا.
- انتَ اللي كُنت بتحدف الوردة؟
- أيوة
- ليه؟!
- الورد للورد ومينفعش وردة تقعد لوحدها في مكان مِن غير ونس.
- أنتَ غريب أوي، أنتَ تعرفني؟
- لا، لكني لما شوفتك حسيتك وحيدة فـَ حبيت أبعتلك اللي يؤنس وحدتك.
- شكرًا، أنا هستأذن علشان اتأخرت.
- هشوفك تاني؟
- مين عالم!!

سيبته وأنا ببتسم وروحت البيت، شوفت ماما حضنتها
- أي الفرحة اللي على وشك دى؟!
- بصي يا ست الكل.....
- يعني أخيرا لقيتي اللي بيحدف الورد!!
- أيوة لقيته بس حاساه غريب أوي يا ماما كأن في حاجة بتجذبك ليه.
أبتسمت وقالتلي:
- طب روحى غيري وتعالي نحضر الأكل بابا زمانه جاي ونتغدا في البلكونة بالمرة.
- يااه وحشتني قاعدة البلكونة القمر دى أنا رايحة.
بيتنا في الرابع وإحنا آخر دور في العمارة، فـَ كون أن إحنا ناكل في البلكونة دى من أكتر الحاجات اللي بعشقها وخصوصي لأنها بتطل على البحر دا غير النعناع اللي أنا زارعاه وبيخلي في نسيم منعش في الجو.

- يا بابا أسمع مني وشغلني معاك في المشتَل بتاع الورد.
- هو فيه وردة تبيع وردة؟
- قول إنك بتثبتني عشان مشتغلش!!
- أيوة حصل، أنا مش عايزك تتعبي أنتِ أميرتي ولازم أحافظ عليكي مش لازم تشتغلي وتتعبي نفسك أنا مكبرتش للدرجة يا سُدم.
- هممم أتثبت بس هاجي أقعد معاك شوية بكره.
- ومالو.

قعدنا نحكي في حواديت كتير وشربنا الشاي ودخلت فتحت الأكونت وفضلت أتفرج شوية أخدت صورة نزلتها استيت وقفلت وروحت أتفرج على التلفزيون.
حياتي بسيطة جدًا مش محتاجة أتكلف علشان أعيش حياة هادية.
تاني يوم نزلت المشتل مع بابا، وقفت معاه شوية وأتصورت وسط الورد نزلت بوست والكابشن كان وردة وقلب.
لقيت حد عمل كومنت الورد للورد يا وردة وبعدين هو فيه وردة تبيع وردة!!

ضحكت وأفتكرت كلام بابا ولما بصيت عليه لقيته مشغول مع حد وبيضحك جامد بس لما دققت الحد دا كان نفس الشخص اللي قابلته إمبارح زياد، كان بياخد ورد شبه اللي كان بيحدفه عليا ولقيت بابا بيطبطب على كتفة وأخد منه البوكيه ومشي!!
دخل بابا وعطاني البوكيه وقالي:
- دا ليكِ يا نجمتي
- دا أي دا يا بابا؟!
- دا من شخص عاوز يكون جنبك باقي العمر وأنا شايف إنها فرصة متتفوتش كوني عارفه وعارف أهله وهو إنسان جميل ومحترم
- عارفه؟!
- أيوة
- اللي تشوفه يا بابا.
- يعني أعزمه انهاردة على قهوة!
هزيت راسي بأه أبتسم وحضني وقالي:
- طب خدي الورد، هتبقي أحلى وردة مزينة الفستان الأبيض.

الورد للورد يا نجمة، بقا فيه وردة تبيع وردة! ")

#هايدي_إبراهيم
#سديم