عام الحُب 2 (مكتملة)

💕

- أنا كُنت مفكراه طيب، طلع مُتخلف وعقيم فكريًا دا كائن لا يطاق
- مش يمكن ظالماه؟!

ضحكت بشماتة على الكلمة وأنا بقول:
- ظالماه؟! دا صعيدي أصلي بس متخلف بمعنى أصح.
- يعني أيه!
اتنهدت وأنا بقولها:
- زياد ساب الصعيد من ثلاث سنين وجه أجر الشقه اللي عندنا علشان دراسته ومن وقتها وأنا كُنت مفكرة أنه غير كل الصعايدة وتفكيرهم، مُحترم، وذكي وكمان فكرُه متفتح وبيعرف يرد ويتكلم بأسلوب ذكي ومُنمق لكن دلوقتي رجعت في كلامي.

ضحكِت وقالتلي:
- كل دا عشان عايز يتقدملك!
بصيت بهدوء ليها وقولتلها:
- طب اسمعي حصل أيه بقا يوم ما جه يتقدملي.

افتكرت يوم ما طلب من بابا يجي يتقدم والصراحة فرحت أصل شاب في أول حياته جاهز من كل حاجه آخر سنة في الجامعة ناجح في دراسته دا غير أنه عنده شغله مع والده واللي موضحش هو أيه لسة.

جه وجهزت، لبست دريس زتوني وشوز أبيض مع طرحة بيضا حطيت تنت وردي على شفايفي وخدودي وحطيت ماسكرا تدي فوليوم طبيعي وساعتها ابتسمت برضا وقولت:
- قمر يا بت زي العسل
اتنهدت وأنا بابا بيناديني وطلعتله برا وأنا شايله القهوة
- أتفضل.
قدمتلهم القهوة وقعدت كان فيه صمت لحظات قطعوا بابا وهو بيقول:
- طبعًا هيكون لينا الشرف بالجوازة دي، هتقعد أنتَ وسديم شويه تتناقشوا وتتكلموا بعدين أعرف رأيها ولو تمام تجيب أهلك وتتقدم.

ابتسم وهز راسه وفعلًا بابا سابنا وراح قعد بعيد عنا بدأ وهو واتكلم وقالي:
- بصي أنا مش جاي أعرف نفسي لأنك عارفاني، أنا جاي أطلب أيدك رسمي على سنة الله ورسوله ولازم تعرفي كل حاجة عني طبعًا غير الحاجات اللي الناس تعرفهم، وأول حاجة إني شغلي مع والدي في الأرض، عندنا فدادين زراعية وبنشغل عمال وفلاحين في الأراضي دا ولو حصل نصيب هتيجي تعيشي معايا هناك، دا غير إني عندي شرط واحد بس
- أيه هو؟!
- انتي في آخر سنة في الدراسة لو اتجوزنا مش هتنزلي الجامعة وهاخدلك إذن على النزول على الإمتحانات بس غير كده دراستك هتبقي أونلاين.

سكت ومردتش عليها بعدين بصيت في الأرض ورفعت عيوني وقولتله:
- على العموم أنا هفكر بس تسمحلي أسألك سؤال
- اتفضلي.
- أنتَ مُتعلم وشايفة إنك إنسان مثقف أيه يخليك تقول الكلام ده.
- هو كده سلو بلدنا كده

آه سلو بلدهم..
- أستاذ زياد سيبلي مهلة أفكر.

وبعد ما طلع
- مش موافقة يا بابا.
- أنتِ لسة فكرتي يا سديم؟!
- حضرتك مسمعتش هو قال ايه، هو قالي إني هروح أسكن عنده بعيدًا عن دا يا بابا هو طالب مني مروحش الجامعة وإني هقدم منازل بمعني أصح مش هروح غير على الإمتحانات!!
بقا دا انسان متعلم وفاهم يا بابا؟!

سيبت بابا بعد ما قالي هو حكالي وأنا قولت هسألك دلوقتي مترديش دلوقتي ومتتسرعيش

دخلت أوضتي واتنهدت الموضوع مرفوض أصلًا وأنا مش هقبل بالكلام دا بقا بعد كل السنين دي والتعب يجي يضيعه هباء لا طبعًا.