عام الحُب 2 (مكتملة)

فيه عريس يربي ظوافره؟!

- نفسي أفهم رفضتي العريس ليه؟
- مربي ضوافر معندناش رجاله يربوا ضوافر
- ماما المفروض أنا اللي أرفض أنا العروسة مش أنتِ!!
- ولو يا سديم مرفوض

تاني يوم روحت الشغل عادي أنا أتعودت أي عريس يجي، موافقة رافضة قبل ما أشوفه ماما ترفضه
- ها يا سديم عملتي
- أترفض
- ليه يا بنتي كده!
ضحكت هي متعرفش اللي فيها
- ندى مش أنا اللي رفضت دى
سمعت صوت جاي من ورايا بيقول:
- مامتك مش كده
- عليك نور يا زياد، ماما كالعادة مش عارفه هي عايزاني أقعد جنبها؟!
بنظرة غريبة - وأنتِ كنت موافقة على العريس دا !!
- لا اللي هو بص أنا مكلمتهوش عشان اوافق أصلًا أو أرفض
- هاتي رقم والدتك

بصتله بإستغراب وأدتهوله
ـــــــــــــــــــــــــــــــــــ

- هو أنتِ إزاي مشوفتيش الحقيقة لحد دلوقتي؟
الناس سمَت في بدنك كام كلمه!! دى بتسمم عقلك، زياد عمره ما كان وحش مامتك هي اللي خلته وحش، هي آه مامتك بس مش شايفة أن اللي عملته غلط!!

بصتلها وعيوني مليانه دموع ومبقتش عارفة أعمل أي، رجعت بالذكرى لورا لما زياد أخد رقم ماما عشان يكلمها
- جايلك عريس
- ويا ترىٰ رفضتيه ليه؟!
- لسة لما يجي ونشوف
نفخت ودورت وشي وأنا ببتسم إبتسامة صفرا في وشها وبقولها:
- أنتِ هتستني لما يجي وتطلعي فيه عيوب زي غيره وغيره ولكن يا أمي أنتِ معملتيش حساب إن مفيش حد كامل الكمال لله وحده

دورت وشها ومشيت وسابتني
أنا عندي 25 سنة بيجيلي عرسان من وأنا صغيرة، ولكن قولت أما أخلص دراستي مخلصة بقالي 3 سنين وبشتغل ولكن أي حد يجي ماما بترفضه
( دا منزل قصة، دا عنده ضوافر، صوته مش حلو، عيونه مش راكزة، مامته مش طايقاها.... إلخ)
وكأن هي اللي هتتجوز مش أنا لا

- أتفضلوا
خدت صنية العصير وطلعت برا وأول ما دخلت ضحكت آه أصل العريس هو زياد زميلي في الشغل!!!
ماما فضلت تبصله وتسأله وهو يجاوبها بكل راحة
- أنتَ شغال مع سديم؟
- أيوة
- علىٰ كده مُرتبك زيها!!
- لا أنا أعتبر أعلى منها رتبة باخد أكتر
فضلت تبصله من فوق لتحت أنها تعيبه ومش لاقيه، زياد من النوع الجنتل عارفينه دا!
العيون العسلي والغمازات والسمار الفاتح والجسم المتناسق ولبس شيك يعني من الآخر قمر كده بس هو ليه اتقدملي!!

وأخيرًا مكنتش متوقعة أسمع الكلمة دى من ماما:
- طب نسبهم شوية مع بعض..
روحت أنا وزياد الصالون وتقريبا الحاجة مشالتش عينها من عليه
- أنتَ جيت.. اللي هو ليه! قصدي أنتَ فاهمني؟
ضحك وقالي:
- أش حال مش صحاب وعارفين بعض! آه ياستي أنا جيت بكامل إرادتي عشان أطلب أيدك أصلي بحبك بس البعيده مش بتفهم، ولما حكيتيلي حكاية أمك صممت إني أجي
- بت.. أي!!
- بحبك، من أول يوم جيتي فيه الشغل وأنتِ خاطفة نظري مكنتش عارف أخد خطوة إزاي لحد ما قولتي بنفسك أن والدتك بترفض أي عريس يجيلك فـَ جهزت نفسي إني في يوم أكون قادر أواجها وأقول بكل ثقة إني عاوز أطلبك وتبقي زوجتي المصون كده
- كده!!
ضحك - كده

ماما دخلت علينا وقالت:
- سديم أنا عايزاكي
شاورتلها واستأذنت من زياد اللي بعد ما مشيت راح لوالدته
- ها يا ماما
- عايشين في بيت عايلة، يعني أنتَ مش هتعيشي لوحدك
- وفيها أي يا ماما علىٰ الأقل أشوف الناس ثم إني عارفه والدة زياد وهي بتحبني ومش شايفة أنه هتطلعي عيب في زياد كمان
- بت اسمعي اللي بقولك عليه

سبتها ومشيت وقعدت جنب ماما زياد ولاحظت أن ماما هتتكلم وهترفض فقاطعتها وقولت:
- أنا موافقة، وماما كمان موافقة مش كده يا ماما
بصتلي بزغرة وماما زياد بتحضني وبتقولي:
-هتدخلي الفرحة علىٰ العايلة متأكده

ـــــــــــــــــــــــــــــــــــ

- الشبكة الأسبوع الجاي
- تخيل يا زياد هتبقي خطيبي وكده أنتَ عارف إنك كُنت بالنسبالي كـَ صديق ولكني هاخد خطوة وهسمح لقلبي يحبك تسمحلي!!
- أسمحلك بس دا أنا أديكي المفتاح كمان

يوم ما أختارنا الشبكة حصلت مُشادة كبيرة بيني وبين ماما علشان هي عاوزة تختار دهب تقبل وأنا مبحبش كده لا بحب التقيل ولا بحب أن إحنا نظهر طماعين.
ماما كانت بتحاول بكل طريقة أنها تبعدني عن زياد وكأنها رافضة فكرة إني هكون مع حد وهبعد عنها!!
مش مُتقبلة إني أفرح مثلا؟

- شوفتي شوفتي حبيب القلب ماشي مع بنات وكمان قاعد يتمايص معاهم
- مستحيل أكيد فيه سوء تفاهم
- سوء تفاهم أي مش شايفة دا حاضنها
- ممكن..
- مش ممكن دا صايع إحنا هنفسخ الخطوبة دى

كلمت زياد في التلفون وقالتله.
رن عليا جيت أرد أخدت التلفون مني
زياد كلم ندى تجيلي تفهم حصل أي

رجعت بالذاكرة وأنا برن علىٰ زياد من تلفون ندى اللي طلعت تشغل ماما
بعتله الصور وقولتله:
-أنا عارفة أنه في شئ غلط فى الموضوع وعارفة إنك مغلطتش بس هي دى مين؟
- أختي سلمى أختي وشها مش باين في الصور
بعتلي صور ليه هو وسلمي متصورين بنفس الوضعيات بس الفرق وشها اللي باين
- زياد أنا أمي مش عايزاني أتجوز فهمت من تصرفاتها أنها عايزاني أفضل جنبها طول عُمري، هي عملت كل دا عشان أبعد عنك
-......

ـــــــــــــــــــــــــــــــــــ

ندى مشيت مِن عندي وماما دخلتلي
- هتعملي أي؟
- مش هعمل حاجة يا ماما هروح الشغل مش عايزة أشوف وشه بس دا شغلي
روحت الشغل!! لا مروحتش روحت علىٰ الجامع كان كلهم هناك صحابي، وعمامي وخالي محمد وأهل زياد
- أنا عارف طبع أمك يا سديم أختي مُتملكه بتحب الحاجه اللي ليها متروحش لغيرها بس دا ميوصلش أنها تقعدك جنبها طول العمر

- بارك الله لكما وبارك عليكما وجمع بينكما في خير

- أتجوزتي يا سديم أتجوزتي من غير ما تقوليلي!!!
- ماما..
- كده يا سديم
- ماما أنتِ عايزاني أكمل حياتي معاكي، أنا مش ههاجر أنا هتجوز بس!
خالي أخد ماما علىٰ جنب وفضل يكلمها حبة حلوين وزياد ماسك أيدى متبِت فيها ومسكني من كتفي وقالي متخافيش هي هتزعل بس لازم تعرف أنه حياتك مش مقترنه بيها وإنك مش لازم تعيش عمرك كله معاها

إبتسمت وحضنته فجه خالي وماما ولقتها قربت مني وحضنتني وقالتي:
- كان نفسي تبقي معايا في حضني متبعديش بس أنا كده بأسرك جنبي، عيشي وأتمتعي بحياتك أنا اسفة ليكِ علىٰ الوقت اللي ضاع من عمرك
- لا يا ماما متقوليش كده، يمكن لو مضاعش من عمري الوقت دا مكنتش قابلت زياد..

أخد أيدي ومشينا وصوت في الخلفية بيقول:-
( بتونس بيك وأنتَ معايا.. بتونس بيك وبلاقي في قربك دُنياية، لما تقرب أنا بتونس بيك وأما بتبعد أنا بتونس بيك.. ")

#هايدي_إبراهيم
#سديم