《သူ့ကို ဆုံးရှုံးရမှာကို ကြောက်ရွံ့လာမိပါသည်။ 》
ကုတင်ပေါ်တွင် ငြိမ်သက်စွာ လှဲလျောင်းအိပ်စက်နေသော ရောင်နီသွေးသည် အနည်းငယ်မျှ လှုပ်စပြုလာ၏။ လက်ချောင်းကလေးများ လှုပ်ရှားစပြုလာ၏။ မျက်တောင်ကလေးများ တလှုပ်လှုပ်နှင့် မငြိမ်။ ဤသည်ကို မည်သူမျှ မမြင်လိုက်ခြင်းအတွက်တော့ စိတ်မကောင်းစရာ ဖြစ်နေခဲ့တော့၏။
မှိုင်းလျှံသည် အခန်းပြင်ပတွင် လူတစ်ယောက်နှင့် စကားပြောနေခဲ့ပါသည်။ ရောင်နီသွေးနှင့် စသိကာစကတောင် မပြုံးမရယ်တတ်သည့်သူသည် သွေးသက်တန့်နှင့်ကျတော့ လက်ဆုံကျစွာ ပြုံးရယ်လျက် ရှိနေ၏။
" ဟိုတစ်ခါ ကျွန်တော် မေးထားတဲ့မေးခွန်းအတွက် အဖြေရပြီလား ကိုမှိုင်းလျှံ။ "
" မရသေးဘူးထင်တယ်။ ကျွန်တော် မစဥ်းစားရသေးဘူးဖြစ်နေတယ်။ စိတ်တော့ မဆိုးပါနဲ့။ "
" ကျွန်တော်က စိတ်မဆိုးတတ်ပါဘူး။ လူတစ်ယောက်မှာ သူ့အကြောင်းပြချက်နဲ့သူ ရှိနေကြတာပဲလေ။ ဒီနေ့မဖြေနိုင်လည်း နောက်နေ့ပေါ့။ "
" အိုခေဗျာ။ ကျွန်တော် အဲ့ဒီမေးခွန်းကို စဥ်းစားထားပါ့မယ်။ "
" ဪ...ဒါနဲ့ ကိုရောင်နီသွေးရဲ့ သတင်းကို လိုင်းပေါ်မှာ တွေ့လိုက်သေးတယ်။ ကိုမှိုင်းလျှံ အဆင်ပြေရဲ့လား။ "
" ကျွန်တော်က ပြေပါတယ်။ မပြေတာက သူဖြစ်မှာပါ။ ကျွန်တော့်ကြောင့်နဲ့ သူ အဲ့ဒီကုတင်ပေါ်မှာ လှဲနေရတာလေ။ သူ ပြန်နိုးလာမှ ဖြစ်မှာ။ ကျွန်တော် သူ့ကို လက်မလွှတ်လိုက်နိုင်ဘူး။ အဲ့ဒါကို နောက်မှ သိခဲ့ရလို့လည်း နောင်တရတယ်။ ကျွန်တော် စောစော သိခဲ့သင့်တယ်။ အခုတော့ အဲ့ဒီအပြစ်ကို ဆပ်နေရပြီပေါ့ဗျာ။ "
မှိုင်းလျှံ ခပ်ဟဟကလေး ရယ်သံစွက်လိုက်မိသည်။ ထိုရယ်သံသည် စိတ်လိုလက်ရ ရယ်ခြင်းမျိုးလည်း မဟုတ်ခဲ့ပါ။ မျက်လုံးများသည် ရီဝေစွာ ရှိနေကြသည်ကို သွေးသက်တန့်တစ်ယောက် မြင်လိုက်မိပါသည်။ ထို့အတွက်လည်း စိတ်မကောင်းပါ။
YOU ARE READING
ကြွေ (Complete)
General Fictionတိုက်ပေါ်က ခုန်ချသတ်သေသွားတဲ့ကောင်လေးတစ်ယောက်အကြောင်းဖြစ်ပါတယ်။ ကိုမာဝင်သွားတဲ့ ကောင်လေးတစ်ယောက်အကြောင်းပေါ့။ အဲ့ဒီကောင်လေးရဲ့ အချစ်ရေးကတော့ အဓိကပေါ့ ဘာကြောင့် သတ်သေရလောက်တဲ့အထိ ဖြစ်သွားရတာများလဲ နောက်တစ်ယောက်ကတော့ ရည်းစားတွေ...