وقف محمد سيارته مجابل البحر .. الشمس كانت حارة .. والوقت صبح .. تنهد وميرة يالسة ساكته .. كانت تبغيه يبدأ يتكلم يفضفض لها عن اللي في قلبه .. هي أحق وحدة إنها تسمع له وتساعده .. الصمت طال .. حست إنه محمد محتاجنها .. بس كيف تبدا ما تدري ..
محمد كان ساكت .. وما يبغي يتكلم .. مجرد شكل البحر جدامه يهديه .. ما عمره اشتكى من شيء .. صح ميرة مرته وام عياله .. بس ما يدخل معاها في التفاصيل دايما .. مب عشان ما يرتاح لها .. بس من كثر ما يغليها ما يبغيها تستهم ..
ميرة يئست من هدوء محمد وقررت تكسر الصمت .. واللي يصير يصير ..
ميرة : حبيبي .. شو فيك ؟؟
محمد : ......................
ميرة : قول تكلم من شو ضايق ..
محمد : ألحين مطلعتني من البيت وتقوليلي ضروري وىخر شيء تقولين شو فيك ..
ميرة : وهذا شيء مب مهم ..
محمد : كنتي تقدرين تساليني وإحنا في البيت ..
ميرة : الكل في البيت
محمد : وكلهم يالسين في حجرتنا
ميرة : أنا ما اقصد بس
محمد : اوووه يا ميرة والله كنت حاس الموضوع اكبر من شي
ميرة انصدمت ما عرفت شو ترد على محمد .. أصلا هو ما عطاها فرصة تتكلم .. على طول شغل السيارة ..
ميرة بحزن : هالكثر ما ترتاحالي
محمد : ميرة أرجوج مب ناقص كلام ماصخ ..
ميرة : انزين ليش مستعيل ..
محمد : تعبان وأبغي ارقد ..
ميرة : محمد تكلم الكلام بينفعك صدقني بيريحك .. وإنته ما بتكلم غريب إنته بتكلمني أنا ..
محمد : ميرة خلاص ما ابغي أتكلم وما عندي شيء أقوله أنا سمعت كلامج وطلعت قلت يمكن إنتي محتاجة شيء ..
مبرة : وفعلا .. أنا محتاجة شيء
محمد :شيء سخيف وتافه .. حرام عليج حسي على دمج شوي
ميرة لسانها انربط ما تدري شو تقول .. هالكثر طريقتها كانت مب حلوة في البداية .. بس هي تحاتيه .. الدموع تجمعت في عيونها بس كابرت وما نزلتهم .. وصدت الصوب الثاني وتمت تشوف الشارع ..
محمد كان في وادي ثاني .. خلاص حس عمره منهار .. صح اليوم كلم مهند وحمدان وحاول يكون جدامهم قوي .. بس هو داخله خلاص انكسر .. من مات سلطان كل شيء تكسر .. البيت الشركة .. الناس اللي حوليه .. نفسه ما قدر يسيطر عليها .. حتى ميرة غناة روحه .. مب قادر يستحملها .. ليش كل هذا .. بس عشان سلطان ..
آخ يا سلطان رحت بدون ما تراعي ولا حد فينا .. ومن بعدك كل المشاكل طاحت على راسنا .. قلبي ضعف يا سلطان .. أخوك تحطم .. صار تراب .. أخوك .. اللي كان يداريك يا سلطان .. آخ ليتك تحس فينا ألحين ..
تجمعت الدموع في حين محمد .. ونزلن غصبن عنه .. دموع من دم .. دموع حارة .. حرقت ويهه .. دموع من قلبه مو من عيونه ..
ميرة كانت متضايقة .. بس ما بتضعف جدام محمد .. هي حاولت بس فشلت للأسف ..
قررت تتأسف .. بس لما صدت بتقول شيء انصعقت ..
محمد يصيح .. بهدوء .. دموعه بس تنزل على خده شوي شوي ..
عمرها ما شافت ريلها يصيح شي .. حتى يوم مات سلطان .. صح شافته وهو يصيح بس مجرد دموع .. ما كانت تدري باللي صار في مكتب أبوه وكيف صاح ..
المهم إنه هذي اول مرة تشوف عيون محمد تذرف الدموع بهذي الغزارة .. ثلاث مرات معدودات شافت دموعه فيهم ..
يوم توفى أبوها
ويوم يابت مبارك
ويوم مات سلطان ..
وكلها كانت دموع بسيطة .. لكن اليوم غير .. اليوم محمد يصيح .. يصيح بقو ومن كل قلبه ..
لامت نفسها .. كيف وأنا موجودة يصير في ريلي شذي .. لا مستحيل هذا مب محمد .. دموعه ما تنزل بسهوله .. ابدا هذا مب محمد ..
محمد زادت الدموع في عيونه .. وبدا النظر يهتز عنده .. ما همه نفسه لكن تذكر غنه ميرة وياه في السيارة .. وقف على طرف الشارع .. ونزل راسه على السكان ..
وهنيه زادت الصفعة على ويه ميرة .. لانه بدا يصيح مثل الياهل .. تخيلته للحظة إنه مبارك .. لكن لا .. هذا صوت محمد .. محمد يصيح ويصيح من كل خاطره .. خلاص مب قادر يود اكثر من شي .. الأيام قست عليك يالغالي .. الصدمة وقفت لسانها ما قدرت تتكلم .. بس كانت تطالعه بذهول ..حاولت تتشجع .. بس ما قدرت .. كأنه جبل على لسانها من كثر ماهو ثجيل .. مرت عشر دقايق .. ومحمد ما هدا أبدا .. ميرة حست بالذنب .. وسالت نفسها معقوله اللي يصير جدامي .. تشجعت بس ما طلعت من حلجها غير كلمة وحدة وبصوت متردد ..
ميرة : محمد .. حبيبي
محمد من غير ما يرفع راسه .. وبصوت مخنوق : أنا آسف ..
ميرة : لا تتاسف .. اهزبني اظربني اذبحني .. بس لا تتاسف ..
محمد رفع رايه والدموع ماليه ويهه : ميـــــرة
ميرة مدت ايدها وميحت دموعه : عيونها .. آمر ..
محمد : أنا تعبان .. تعبان وايد .. وايد ياميرة
ميرة : إنته ريال والنعم فيك وقوي ..
محمد : راحت القوة .. أنا ألحين إنسان ضعيف
ميرة : لا يا محمد مب ضعيف إلا الشيطان ..إنته شيخ الريايل كلهم ..
محمد بدا يهدى شوي : ميرة .. استحمليني شوي دخيلج
ميرة : لا تقول شي يا محمد أنا لو ما استحملتك أستحمل منوه
محمد : أدري إني أنا اللي لازم أوقف وياج وأهديج عشان أخوج .. بس والله
ميرة : لا بس ولا شيء .. أخوي اللي صار فيه كتبت ربنا .. وما بنعترض على اللي الله رايدنه وحتى اللي صار في أخوك نفس الشيء .. محمد إحنا لازم نكون أقوى .. أنا اليوم يوم رديت البيت حسيت إني في نعمه كبيرة .. ما تنوصف
محمد بإستغراب : كيف ؟؟؟
ميرة : شفت نورة .. اللي ألحين عمرها 25 وشافت الويل .. شفت هذي البنت الطيوبة وهي تنفصل عن ريلها وتعيش مأساة ولما بدت تتعداها ردت لها مرة ثانية ..
شفت شهد .. اللي للحين في عز شبابها وما قدرت تتهنى بإرتباطها .. شفتها مشلولة وقاعدة على كرسيها المتحرك ما تقدر تمشي .. شفت المشاعر اللي في عيونها عشان فقدت أخوها
شفت أمك .. والالم اللي ياكل قلبها .. بموت ضناها ..
وأبوك اللي يحاتي كل اللي في البيت ..
قارنتهم بنفسي .. أنا عندي إنته .. ومرتاحة معاك .. وعندي عيالي مالين علي دنيتي .. صح داخلي الم بس مب أكثر منهم .. مصيبتي وايد أقل عن مصيبتهم .. محمد أنا قررت غني اساعدهم وأولهم إنته .. إنته صح فقدت اخوك .. بس الله عوضك بمهند اللي أكثر من الاخ وحمدان الله يرده بالسلامة .. وخواتك اللي محتاجينك ..
محمد حياتنا بيدنا إحنا اللي نتحكم فيها .. إحنا نعيشها مع بعض الحلو فيها وحتى المر .. لازم نستغلها .. محمد أنا آخر شيء أفكر فيه إني أخسرك .. لأاني ما أقدر أتصور هذا الشيء .. لأنك مليت حياتي كلها .. وإني اشوفك تنهار هذا اللي ما أقدر أتصوره لا وأنا موجودة .. محمد أرجوك افهمني ..
محمد كان سرحان في عيون ميرة .. آخ كلامها مثل الدواء على قلبي .. معقولة .. أنا كنت ادري إنه عندي كنز .. وغالي .. بس مب هالكثر لدرجة إنه دواء يطيب الجرو ح .. تم محمد يطالعها بفخر وكبرياء .. هذي مرتي ومثلها شويه في هذا العالم .. الحمدلله ياربي تاخذ شي وتعطينا شي احسن منه .. عوضتني بميرة عن هذي الدنيا كلها .. ميرة كنز لازم ما يضيع ..
ميرة ما تدري كيف طلع منها هذا الكلام .. حست بسرحان ريلها .. حاولت تكسر الجمود .. ومن خاطرها .. عطت نفسها قوة ورسمت أحلى ابتسامه على شفايفها ..
محمد طار بهذي الإبتسامة .. حس بسعادة فظيعة .. في ثانية تغير حاله .. محتج من هذي الإبتسامه وايد .. آآآآآآآآآخ .. ليش ما كنت ادري بهذي النعمة قبل ..
ميرة حست إنها قدرت تسوي ولو شيء بسيط حق ريلها .. وبأي طريقة قررت إنها تنسيه شوي من آلامه ..
ميرة : لو سمحت ممكن تشغل السيارة تولهت على عيالي ..
محمد انتبه : بس بعدنا ما كملنا نص ساعة .. لحقتي تشتاقين لهم ..
ميرة : توك تعبان وبترجع البيت .. مسرع ما غيرت رايك .. يا سبحان الله ..
محمد : شو رايج نرجع نسير على البحر ..
ميرة كانت تبغي تسوي جو شويه : لا بحر ولا غيره ردني البيت أحسن لك .. ترى لاعت جبدي من مجابل ويهك عافانا الله .. أجابل ناني ولا إنته
محمد ابتسم وهالمرة من خاطره صدق نسى التعب اللي فيه : ناني احسن عني هاه انزين .. يالله انزلي من السيارة
ميرة بطلت حلجها : عن المصاخة
محمد تغيرت ملامحه وبان إنه معصب (يبفي يلعب بأعصابها) : قلت انزلي من السيارة ويودي هذيل ريالين خلي التكسي يوصلج عند ناني شو فيها
ميرة : وأهون عليك
محمد : هيه مثل ما أنا أهون عليج
ميرة : أفا يا بو مبارك
محمد : لا بو مبارك ولا غيره تنزلين يعني تنزلين ..
ميرة بدلع : لا حبيبي دخيلك ..
محمد : مالي خص أنا بادبج عشان تحرمين تطلعين ويايه .. وأسير اركب لي كمن حلوة
ميرة بعصبية : تراك مصختها .. امش اشوف البيت محد يعطيك ويه
محمد شغل السيارة: هههههههه حلو شكلج وغنتي معصبه
ميرة : وايد تحب تستفزني ..
محمد : وااااااااااااااااااااايد .. كثر ما احبج
ميرة : يا سلام
محمد : يا مدام
ميرة : بس عاد .. خلاص عن دلع اليهال والله إنك أخس عن بروك
محمد : فديته والله إني ولهت عليه ..
ميرة : حتى هو .. وله عليك .. خلنا نسير البيت نشوفهم ..
وسكتوا الإثنين ..
محمد : ميرة
ميرة : لبيه ..
محمد : متى بنرتاح
ميرة : قول الحمدلله على كل حال
محمد : الحمدلله .. بس خاطري أفرح استانس ..
ميرة : إن شاء الله قريب .. وبعدين تعال شو قصدك يعني ألحين مب مستانس ..
محمد : لا ..
ميرة : نعم!!!!!!!
محمد : أفا أقصد امبلا كف يعني انتي ويايه وما أستانس
ميرة : والله ما تركب عليك الرومانسية مول .. عافانا الله
محمد : طالع عليج يا بنت العم
ميرة : بسم الله عليه أنا طل الرومانسية فيني ..
محمد : منو قاص عليج .. أقصد منو قالج ..
ميرة : في واحد في يوم من الأيام .. قالي إنه أحلى لسنا في العالم لساني
محمد : وما قالج شيء بعد ..
ميرة : امبلا قالي إني أغلى وحدة في العالم
محمد : أفا ..
ميرة : ليش ..
محمد : طلع عيار ولواص ما قالولج .. يقول حق البنات شي
ميرة صدق عصبت : صدق ماصخ ..
محمد : مشكلتج .. زيديني شكر ..
ميرة : اسكت لا تلوع جبدي الشره علي اللي طالعة وياك .. مالت ..
محمد: ههههههههههههه
ميرة : ما قلت نكته ..
محمد : إنتي احلى نكته في حياتي
ميرة : ليش شو شايفني مهرج جدامك ..
محمد : لا أراجوز .. ولا أقولج كلاون أحسن ..
ميرة : اونه يعرف انجليزي .. قسم بالله دمك ثقيل
محمد : جديمة من زماااااااااااااان بو ليد قالي ..
ميرة : زين .. بس منو هذا بو وليد
محمد : أخو أم سالم
ميرة : ومنو ام سالم ؟؟؟
محمد : أفا وهل يخفى القمر ..
ميرة : قووووووووووووول منوووووووووو
محمد : حرم محمد مبارك الثانية
ميرة : لقص راسك ..
محمد : ما ترومين خلاص استوت حرمي وألحين بعد عندها سالم وشما ..
ميرة : محمد عن المصاخة ولا صدق بزعل
محمد : وهل تفكرين في يوم من الايام إني اتخبل وأتزوج عليج والله ما أقدر تدرين ليش
ميرة بدلع : ليش ؟؟
محمد : لانه ابوي بيذبخني بقول كيف تتزوج على بنت عمك ..
ميرة : صدق ما عندك سالفة وأنا قلت على شاني .. ألحين
محمد : كيفج إنتي قاصة على عمرج أنا شلي ..
ميرة : ممكن تسكت والله لوعت جبدي ..
محمد : لا حرام قولي والله ..
ميرة : اف .. بس عاد
محمد : ههههههههه
ووصلوا البيت ميرة بطلت الباب .. بس محمد مسك إيدها قبل ما تنزل
ميرة : خير شو تبغي ..
محمد : مشكورة ..
ميرة : على شو ..
محمد : ما كنت ادري من غيرج شو بسوي
ميرة سوت عمرها زعلانة : ما بتسوي شيء .. ولا أقولك بتسوي بتسير عند بو ليد اخو أم سالم
محمد : هههههههههههه .. والله جذب
ميرة : تخيل إنته بس يكون صدق .. والله لهد لك الدنيا فوق راسك
محمد : وأنا أروم أستغني عن السندريلا مالي ..
ميرة بدت تتكلم جد شوي : محمد .. ألزم ما علي راحتك وراحة عيالك والظروف اللي حولينا بنتخطاها مع بعض .. انزل شوف خواتك وامك وخالتك .. إنته الريال ولازم تهديهم .. وتعطيهم الأمان .. وتطمنهم دايما ..
محمد : الله يخليلي ياج يا أمايه ولا يحرمني منج ..
ميرة : ليش ؟؟؟
