من الصبح حمدان وعمه ومهند ومحمد وعبيد عشان يكون هو ومهند الشهود ونورة موجودين في المحكمة وميرة بعد كانت راكبة مع محمد عشان تكون مع نورة .. وتخفف من توترها .. وتهديها ونورة تعرف إنها مب اول مرة تملج فيها بس بعد عندها إحساس غريب بأن هذي المرة بتكون غير ..
بعد ما تمت الملجة على خير .. ردت ميرة مع محمد ونورة وحمدان كان وياه مهند وعمه ومبارك روح عنهم ..
في البيت الكل كان معتفس ام محمد وأم حمدان يزهبون كل شيء .. وام مهند يت من وقت وساعدتهم وأسماء كانت يالسة مع شهد اللي طارت من الفرح يوم سمعت خبر أسماء وإنه ملجتها قريب ..
نورة قالت حق محمد إنها ما تبى تشوف حمدان إلا بعد ما توصل البيت وتريح وعقب مايريحون ويطلعون عنهم الضيوف .. ومحمد وافقها وخبر حمدان اللي تقبل الموضوع بصدر رحب .. وفعلا كانىعزيمة عودة والكل استانس والسبب حمدان اللي غاب عنهم وايد ورد ورد الفرحة على كل بيت بو محمد .. الكل كان يبارك لنورة ويدعيلها الله يتمم لها على خير بعد ما خفوا الضيوف شوي ..
نورة وميرة وأسماء وشهد وشوق اللي ما نستها شوق وعزمتها هي وعمتها ومايد طبعا اللي كان يايبنهم وسالم قاله يقرب وعرفه على مهند وبدوره مايد شكر مهند على كل اللي سواه وأصر يعزمه على الغدا بالباجر ..
فوق عند البنات ...
شوق : بس احس يا نورة بعدين بتندمين لانج ما سويتي عرس عود
نورة : لا يا شوق ما اظن بندم سلطان ما طاف على وفاته وايد ومب حلوة إني اسوي عرس عود .. وبعدين إن شاء الله بيتعوض في عرس شهد وصدقيني أنا راضية ..
أسماء : الله عليج يا نورة دومج حكيمة والله أنا ما اظن كنت بقتنع
شهد : الله يعين عبيد بيفتقر ..
أسماء : بنشوف مهند شو بيسوي من ألحين طردني برع الحجرة أونه الطابق اللي فوق كله بيسويه حقج
ميرة : يا عيني يا عيني مساكين نحن يادوب حجرة وصالة صغيرة حقنا لا ويا هذيل الثنتين بعد
نورة : اللي يقول ألحين من الاساس أنا وشهد بنطلع وبعدين كله بيصير لج ..
ميرة : لالا حجركن بتم مثل ما هي يمكن يغيض عليج حمدان ويطردج وين بترقدين حجرتج بتكون جاهزة
الكل : ههههههههههههه
نورة : فال الله ولا فالج .. عنبوه من ألحين تفاولين عليه ..
ميرة : أتمصخر يابوج أتمصخر ..
طاف الوقت والبنات يسولفن .. شوق كانت تتمنى تحصل وقت فاضي تكلم فيه شهد عن مايد لكن تأخر الوقت وعمتها زقرتها عشان تروح وبعد أسماء طلعت بتروح بيتهم لأنه مهند بينشغل وبيودي شهد المستشفى مع محمد فلازم يوصلهم البيت قبل وما بقى غير نورة وشهد وميرة ..
نورة كانت تتزهب لأنه حمدان يترياها بس فضلت تتزهب وهي في حجرة شهد عشان تسولف ويا اختها ومرت اخوها ..
حصوصة الحلوة كانت كبرانه شوي وصايرة دبوبه أمها ملبستنها فستان وردي حلو وبسيط ..
شهد : أقول ميرة حطي حصة ونورة جدام حمدان أراهن إنه بيقول حصة أحلى .. فديتها العروس أونها لابسه فستان وردي ..
نورة : ههه ما تضحكين عن المصاخة شهود بروحي زايغة لين ألحين مب مصدقة إني خلاص رديت حرم حمدان ..
ميرة : لا صدقي وتعالي بصفعج طراق عشان تصدقين أحسن عشان ما تحطين بودرة على ويهج بالطراق خدج بيستوي احمر ..
شهد : ههههههههههههه صدقتي والله
نورة : بس عاد .. اقول شهودة متى بتطلعين المستشفى
شهد : ياربي ليش تذكريني من الصبح زايغة .. بعد ساعة تقريبا يومك إنتي عند حمدان ..
نورة : أفا كان خاطري أسير وياج
ميرة : لا شو تسيرين وياها تبين حمدان يصفعج ..
شهد : صدق والله مشكورة محمد ومهند بيسرون ويايه ماله داعي الزحمة
نورة : إن شاء الله عاد ما تطولين
شهد : ادعولي ..
نورة + ميرة : إن شاء الله ..
**
شوق يوم ردت البيت حست بضيق لأنها ما قدرت تكلم شهد .. طبعا هي البارحة كلمت منى اللي قالها ريلها عن الموضوع ومنى حست إنه الموقف صعب وقالت لشوق إنها تستخير ربها لأنه زواج وتضحية كبيرة .. أول ماردت صعدت فوق على طول ومايد كان مقرر يمر على البيت اللي قالت عنه شوق عشان يكلم الريال متضايق ولازم ينسى هذا الضيق وما بيمر الموضوع على خير إلا بعد ما يكلم الريال .. وهو ملاحظ هدوء شوق بعد نقاش أمس هو مغيض عليها وهي بعد متضايقة منه ..
الخدامة اول ماشافت شوق ولحقتها ..
وناتي : ماما شوق
شوق : نعم
وناتي : هذا بيبي صغير يجي اليوم يريد إنتي بس أنا يقول إنتي محمد
شوق : أووه فديت احمد نسيته اليوم
وناتي : هو يخلي كيس هني يقول عطيه ماما شوق ..
شوق بتعجب : وين الكيس ؟؟
وناولتها وناتي كيس وردي صغير مرسوم عليه دبدوب حلو شكله .. فتحت شوق الكيس ولقت فيه وردة وردية لكن تجنن وورقة موجودة داخل فتحت الورقة وانصدمت وحظنتها بقو كأنها تحظن ولدها اللي ضاع منها ..
كانت الرسالة مكتوبة بخط عبدالله أبو احمد ..
الإخت شوق ..
سامحينا على الإزعاج تعبناج ويانا في هاليومين .. أحمد يوم عرف إنا بننتقل أصر إنه يشوفج ويشتريلج هدية وهو بنفسه خذ هذي الوردة وأصر بعد يكتبلج رساله .. مرة ثانية أقولج مشكورة على اللي سويتيه وبالذات إنج نزلتي نفسج لمستوانا .. وخليتي ولدي يحس بالسعادة اللي ما عاشها طول عمره .. وهذي رسالة أحمد
((أحبج وايد خالوه شوق وما بنساج)) ..
السموحة على المغثة أنا كتبت الكلام لأنه تعرفين أحمد ما يدقر يكتب وايد يا دوب هذي الجملة ..
أخوج
عبدالله ..
