شهد : محمــــــــــد!!
محمد وهو حايس حلجه : هيه محمد .. ممكن أعرف شو اللي موعنج لين هذا الوقت
شهد وهي مبتسمة : الحمدلله على السلامة حبيبي
محمد : الله يسلمج
شهد : ما شاء الله اشتقت لنا بسرعة ما مدالك ترد ولا شبعت من مهند وحمدان قلت ترد عنهم أحسن ..
هني انصدم محمد مهند وحمدان ليش ما وصلوا لين ألحين!!
محمد : ها لا السالفة مب جي لكن
شهد : لكن شوه ..
محمد وهو مب عارف من وين يبدا ولا من وين : إنتي ليش واعية لين ألحين ..
شهد : ماشيء بس جي ما ياني الرقاد وطلبت منهم يخلوني تحت قاعدة أقرا ..
محمد : وحد يقرا هني في نصاف الليالي
شهد : محمد شو فيك مرتبك فيك شيء
محمد : ها لا ولاشيء
شهد : صدقني فيه شيء راجع من السفر ومحد يدري وبعدين أنا كنت أكلم مهند اليوم ما خبرني إنك بترد صدقني في شيء
محمد : لا ولا شيء أنا قلتله لا يخبركم
شهد : أها ما أصدق
محمد : وبس مهند ما قال شيء ثاني ولا كلمتيه من ذاك الوقت
شهد بإرتباك : لا ليش صار عليهم شيء
محمد : يالغبية إذا كان صار عليهم شيء كنتي بتشوفيني راد
شهد : اوه صح أها قول إنك ما قدرت على فراق ميرة
محمد : بس بس مالج خص .. اووووووه والله إنج خربتي كل مخططاتي
شهد : مخططات شو ؟؟!!
محمد وهو يبتسم : والله إني أنا الغبي
شهد : ليش
محمد : هههههههههه تدرين كنت أبغي أفاجئكم وأقولكم إني ما سافرت بس قلت حق مهند يقص عليكم
شهد : شو المغزى
محمد : كنت بعترف للجميع إني معرس
شهد حست بعمرها بتموت : معــــــــرس !!!! محمد إنته شو تقول
محمد : هيه عادي الشرع حلل أربع وأنا كنت عند حرمتي الثانية
شهد : محمد بلا تمثيليات نحن مب ناقصينك إنت بعد
محمد : كيفج لا تصدقين وينها بنت عمج أبغي أبشرها ..
شهد : محمد ميرة فيها اللي كافيها
محمد بسخرية : ليش إن شاء الله
شهد : محمد بلا خرابيط وقول الصدق إنته ما كنت عند قوم مهند
محمد : لا ماكنت
شهد : محمد بلا دلع عاد وقول الصدق
محمد : شهد احترمي نفسج شوي
شهد : محمد أرجوك والله نحن مب ناقصين
محمد : ليش إن شاء الله شو فيكم
شهد : ولا شيء سلامتك ما ادري لين متى بتستهتر وبتركب راسك معرس ها يا سلام صدق لا إنته أخوي ولا أنا أعرفك
محمد : اف أف هذا كله مرة وحدة
شهد : إنته ماعندك إحساس بنتك في المستشفى وإنته تقولي معرس ومب معرس
محمد هد الشنطة اللي في إيده : مستشفى !!!!
شهد : هيه مستشفى استاذ محمد لكن إنته لو كان عندك ذرة إحساس بهذي الإنسانة المسكينة أو بعيالك جان ما استهترت هذا الإستهتار
محمد بفزع : أي مستشفى وليش ؟؟!!!!
شهد : لا ماله داعي روح كمل للي كنت فيه
محمد : شهد لا تزيديني وقولي
شهد : محمد إنته اللي لا تزدني وقولي متى عرست
محمد بجدية : يا أغبى أغبياء العالم .. لا عرست ولا شيء أنا كنت أبغي ألعب ممكن تفهميني ألحين بنتي وين
شهد : سخيف والله إنك سخيف وإنسان فاضي .. وهذي المسكينة تحاتيك وإنته تتلعب
محمد بحزم : شهد سكت عليج وايد
شهد : محمد سامحني لكن من الحرة اللي في قلبي .. خلاص مستحيل أقدر أستحمل زيادة .. محمد ميرة غلطت بس مب هذا الجزاء اللي استحقته منك محمد راعي شعور هذا البيت شويه
قرب منها محمد : سامحيني يا شهد ما قصدت شيء لكن كانت لحظة طيش والحمدلله أنا رديت وتمثيلية بسيطة تلطف الجو .. (وحاول يكتم الحرارة اللي داخلة وغمز لها)
شهد : روح يا محمد والله إنه ميرة قلبها متقطع عليك .. بس لحظة الوقت ألحين متأخر مستحيل يدخلونك
محمد : أفا عليج أخوج محمد بن مبارك فديت الصوص والله ما توقعت يصير فيها شيء بس ليش ما خبرتوني
شهد : أنا ألحين طمنتك خلاص كانت محمومة من يومين لكن الحمى ألحين خفت وايد والحمدلله وقال الدكتور ما بتطول في المستشفى ..
محمد : أنا آسف يا شهد
شهد : ميرة هيه ميرة اللي محتاجه هذا الأسم ما تتخيل كيف تتعذب
محمد : ما اظن أكثر مني ..
شهد : لا صدقني وايد تعبت نفسيا وايد
محمد : أنا ما طولت
شهد : يعني إنته ما تعرف ميرة
محمد : فديتها شيختكم كلكم ومحد يسواها
شهد بإبتسام : انزين ممكن توصلني حجرتي وبعدين ترتاح والصبح تروح لهم
محمد : مستحيل أصبر لين الصبح
شهد : لا صدقني وايد أحسن ..
محمد : ليش ؟؟
شهد : أسمع كلامي وأنا طمنتك عليها اصعد شوف مبارك فوق راقد في حجرتي
محمد : والله تولهت عليه هذا السبال ..
شهد : يالله ممكن توصلني
محمد : يالله ..
شهد كانت تشوف أخوها وفي خاطرها تصيح محمد هو محمد عمره ما بيتغير حبه للبيت فظيع ويومين بعيد عنه ما قدر يصبر كانت دمعتها معلقة في عيونها .. هذا أخوها اللي هو سندها بعد أبوها هذا الإنسان اللي تحبه وتشوف فيه سلطان هي نعم سلطان اللي مستحيل تنساه في يوم من الأيام ولولا سلطان ماكان صار فيها كل اللي صار .. آآآآآآه يا سلطان وينك تشوف أختك شو صار فيها ..
محمد كان قلبه يدق بسرعة يحاول يبتسم لشهد لكن شوقه لميرة كان غريب وكأنه بيلاقيها في حجرتها عشان يستسمح منها وفي نفس الوقت يلوم نفيه بنته في المستشفى وهو ما يدري عنها أكيد ميرة سوت جي عشان ما تضيق به هي دوم جي ممكن تدوس على قلبها عشان خاطره تبيع الدنيا وتشتري ابتسامته بس هو اللي الظاهر نسى أو تناسى الكنز اللي رزقه ياه رب العالمين ..
**
في حجرة شهد ..
محمد قرب من مبارك وحبه على خده : فديت قلبك يا الدب والله تولهت عليك أنا براويك ولا سيارة من اللي اشتريتهن بعطيك أونه تبى تلعب وما تبى ترمسني
شهد : ههههههه فديت روحه ياهل وبعدين هو الوحيد اللي عرف يأدبك
محمد : أبويه شو قال
شهد : أظن ميرة رضاها سهل لكن أبويه مستحيل ..
محمد : ليش يعني .. ؟؟
شهد : ما ادري ..
محمد : كم باقي على اذان الفجر
شهد : شويه مب وايد
محمد : بترياه لين ما ينش حق الصلاة وبسير وياه المسيد وعقب برد أرقد والصبح من وقت بسير المستشفى ..
شهد : خلاص خلك هني عندي خلنا نسولف
محمد : اتصلي في ميرة ألحين
شهد بإستغراب : ألحين ؟؟!!!!!
محمد : صدقيني عندي إحساس إنها مب راقدة
شهد : تتوقع
محمد : هيه يالله ..
شهد تناولت التلفون ولقت مليون مس كول من أسماء وابتسمت تدري إنه وراها حساب عسير .. واتصلت في ميرة
محمد : حطي سبيكر
شهد : اوكي ..
رن التلفون رنتين وردت ميرة على طول ..
ميرة : هلا شهد شو فيج مبارك فيه شيء
محمد كان مبتسم وهو يسمع صوت غناته صدق تولهه عليها ..
شهد : لا حبيبتي ما في شيء مبارك بخير
ميرة : عيل ليش متصله ألحين
شهد : ما ادري ما رقدت وياني إحساس إنج مب راقده
ميرة : وإنتي تتوقعين إني ممكن أرقد أو تغفل عيوني وبنتي تعبانة وأبوها ما أعرف شخباره وولدي بعيد عني وفي جو مستشفى والحال أرف
محمد بغى يسحب التلفون ويرمسها بس قال خلها تكون مفآجأة .. ومسك نفسه وتم مبتسم ..
شهد : الحين فكري في بنتج وبس هذا السخيف خلي يولي الله وأعلم وينه ألحين
ميرة : لا تقولين عن اخوج جي يا شهد هذا ......... وسكتت
شهد : شو فيج ميرة .. ميرة
ميرة : لالا ولا شيء .. شهد قولي الصدق متى آخر مرة اتصل فيج ؟؟
محمد يأشر لها إنها تقول ما تصل
شهد : اليوم (وتغمز حق محمد)
ميرة : والله طمنيني هو بخير
شهد : الحمدلله بخير ووايد متولهه على البيت
ميرة : البيت بس ؟؟؟!!!
شهد : هذا اللي قاله ..
ميرة : الله يحفظه ياربي ويخليه لعياله
شهد : ولج بعد
ميرة : أتمنى ..
شهد : ميرة بلا نبرة الحزن هذي والله مب حلوة عليج ..
ميرة : لا تطلبين مني شيء ما أقدر عليه ..
شهد : هالكثر تعزينه
ميرة : شهد اظن هذي المرة المليون اللي تساليني فيها هذا السؤال وأنا ما برد عليج اوكي
شهد : هههههه انزين لا تعصبين .. والله تولهت على حصوصة
ميرة : هي بعد تولهت عليج
شهد : لا تجذبين
ميرة : كيفج لا تصدقين
شهد : حبيلي ياها
ميرة : إن شاء الله .. من عيوني قومي ارقدي
شهد : إن شاء الله يالله مع السلامة
ميرة : مع السلامة ..
شهد تكلم محمد : مشكلة الإحساس
محمد وهو مبتسم : الله لا يحرمني منها ويخليها لي
شهد : آمين يا روميو زمانك حركات بطالية مالها داعب مرة ثانية
محمد : من عيوني إن شاء على هالخشم ..
شهد : خلاص الغالي ما بقى شيء على الصلاة قوم تمسح وتريا أبويه
محمد : بسبح مرة وحدة وعقب بنزل أترياه
شهد : خير إن شاء الله ..
**
