منصور : لا مانسيت شو سويت معاها؟ كانت تبدل الجرح بس "وقف" بعدين انتي شو مقومنج اول الصبح؟
العنود : شدخلك فيني انت
سلامه : انا بسير المستشفى، انتي شكلج طالعه صح؟
العنود طنشتها وراحت عنها ، منصور دخل الغرفه يسبح ، عقبها جهز ع الدوام وطلع ، ع العصر كانو قاعدين كلهم ماعدا شيخه والبنات
ام منصور : شيخه بلاها قاعده فوق ، تغدت وصعدت نبي نشوف البنات ، قووم منصور نزلهم ، ماقدر ع حرمتك مستويه من اقولها شي تعصب و مايعيبها كلامي
منصور طالع العنود : قومي العنود نزلي البنات
العنود : شدخلني انا؟ قالت منصور ماقالت العنود
منصور : وانا اقولج انتي قوومي صعدي نزليهم
العنود : افف افف مستويه بهالبيت خدامه لبناتك
منصور : تزوجي و ارتاحي منا
العنود : والله محد مكرهني بالزواج غييركم
قامت عنهم فوق
ام منصور : شو فيها اختك؟
منصور : شدراني فيها
العنود دقت الباب ودخلت عند شيخه
العنود : انتي بلاج نفستي وشليتي البنات وقعدتي هني؟ امي تباهم بنزلهم
العنود شلت ماريا ومسكت ايد تاليا
العنود : تعالي انزلي محد موجود غيري انا وامي ومنصور ، ومحمد توه طلع و سلامه في المستشفى
شيخه : ع اساس احد مهتم لي تحت عسب اقعد معاكم
العنود : اذا تميتي جي ضاربه نفسيه محد بيهتم لج ، قومي وراضي ريلج احسن لج عن يطير عنج
