فصليه_لأُناس_لايرحمون
للكاتبه # نور الدليمي
طلعت للديوان وبعدها گضيت چم شغله ورجعت للبيت طبيت لگيت عمتي وبتها سجى يمنه وعمتي تصيح وتتوعد مدري عليمن
السلام عليكم
الكل رد
وعليكم السلام
خير ليش اصواتكم عاليه
تعال عمه اسمع هاي بنت الشارع الجبتها النه ما اعرف منين شلون تتجاوز على بناتنه وشيوخنا واحنه ببيتك
ماعاش اليتجاوز على اصغر واحد بيكم عمتي وبست راسها
احجيلي شصار
سجى قاطعتنه وحچت
ترضى شيخنه هاي المدري منين اصلها وفصلها تگلي بنت الكلب
وسعت عيوني من الصدمه مدا اصدگ الگباحه الشايلتها هاي البنيه يعني فوگ صخام وجه اخوها وفوگ فگد اخويه ولوعت گلبنه علي الها لسان طويل وتتجاوز احترگ دمي وفورت وصحت بصوت عالي
هييي تعااالي
....
چنت گاعده افكر بكلام غدير وفزيت على صوته يصيح حيل وبعصبيه هييي تعالي
ولج سما اركضي روحي اكيد شحننه عليچ
غدير الله يخليچ انتي شفتي الصار تعالي ساعديني
ما اگدر حبيبه اعذريني ميصير احجي اذا ما طلب مني الشيخ احچي
طلعت سريع اركض وطبيت للصاله كلهم مجتمعين
نعم تفضل
الله ينعم ضلوعچ ولا يخليلي بيج عظم سالم
اعاين علي شلون يحجي ويدعي عليه وعيونه تجدح نار وفاتحهن كلش .. خفت منه حسيته شويه بعد ويهجم عليه
احجيلي شهل عمله السوده مالتچ تغلطين على بنت عمتي وببيتي
والله شيخ ما غلطت هي گالتلي بنت كلب گتلها لاتتجاوزين ماكو بنت كلب غيرج
حلووو يعني تعترفين بجوابچ
اي اعترف قابل غلطت بشي اليدگ الباب يسمع الجواب
وما اشوفه أله گمز من مكانه ولزمني من رگبتي
اشوف يوم الاخوچ دگ الباب شرد ما انتظر يسمع الجواب
اختنگت بعد ما اتنفس اريد احچي ما اگدر وهو يغلط ويسب ويهدد ويتوعد لحد ما صارت عيوني دم والاوكسجين حسيته بعد ميوصل الراسي
اني فاير ولازمها من رگبتها واغلط عليها وعلى اخوها واهلها وما اشوفها إلا تحولت عيونها دم وتجري دموع عرفتها اختنگت صحيت على روحي ما اريدها تموت اريدها طعم لاخوها الساقط هديتها
شويه بعد ما تقريبا حسيت روحي انفاسي الاخيره دتطلع ... ظليت اتنفس قوي اريد الهوى يطب الصدري گوه رجعت الروحي حيلي ورفعت راسي وگتله
اذا اخويه ما انتظر يسمع الجواب فأنت اخذت جوابك مني مو كافي ذليتني وبعدتني عن اهلي وناسي شتريد بعد اكثر
