مَرّت الأيام واحنه بڪل يوم نفس الوضع واحد يسأل الثاني وتصير سوالف وضحك بينه أحلى أيام چانت وي محمدي حرفياً عَوض الله هو
شفت الدنيا حلوة بعيونه حيل أحبه وأحب سوالفه بالأخص صوته عالم بوحده
چنت رايحة لبيت عمي عازمينه على الفطور ورحنه اني وأهلي ڪلهم
خلصنه فطور والأمور ڪلها تمام صارت نسوان عمامي وأمي بالمطبخ يغسلون الأماعين وما قبلوا احنه نغسلهم
لگيت الجهال يلعبون طوبة بالحديقة چنت طالعه من المطبخ اريد أروح للأستقبال وچان تجي الطوبة على راسي واطيح تأذت أيدي شوية
ضليت اصيح منو شمر الطوبة الجهال من الخوف ڪلها شردت أجت بنت عمي الصغيرة تمسح على أيدي وتبوس بيها
نسوان عمامي وأمي طلعن من المطبخ على صوت صياحي شافني طايحة بالگاع مرت عمي تضحك گالت والله آسفة عذريني بـــس ما توقعت الجهال يطيحوچ
بقيت اباوع عليها وگلتلها بمڪان ما تضحڪين وحده بيچن تشيلني هههههه
رحت خليت ثلج عليها شوية هدأت
بالليل محمد دز رسالة
محمد: هاا حبيبي وين ما وين
شهد: هلا بابا غير طحت شمروا الطوبة عليه
محمد: هاا يعني چنتي تلعبين وياهم
شهد: بگلبي اگله لو شايف شلون اجت على راسي ما حچيت هيچ واضحك وي روحي
لا حبيبي مو هيچ طلعت من المطبخ للأستقبال والجهال يلعبون بالحديقة انفشخت بالطوبة هههه
محمد: هاي شجاهم
شهد: عمي جاب مرهم ويمڪن صار تمزق بيها
محمد: روحي حبيبي للدڪتور لا تسڪتين عليها
شهد: مو بـــس هيچ أخوية هم وگع وتأذت رجله
محمد: شنو سالفتڪم اليوم شجاڪم
شهد: گلنه ليش بـــس محمد رجله تأذيه خلي نسوي تضامن وياه ههههه
محمد: ليش نعديتوا ههههه
رجعتي بعدچ هناك يم عمامچ
شهد: أي حبيبي رجعت
محمد: حبيبي هَسة يمي خطار يرحون وأراسلچ
شهد: خلي يرحون ترة والله أرجع وي عمامي
محمد: هههههه
شهد: خوش وصيهم يبقون راجعه وي بيت عمي
محمد: بابا غير اجوا يتحمدولي ع السلامة
شهد: شنو لعد الوحده ما تشبع من زوجها
محمد: يلا هَسة يرحون هههه
شهد: بساع
مَرّت ساعة ومحمد ماڪو ولا دز شيء
ڪل العادة أضوج من هيج شيء ينطيني حچاية وبعدين يلتهي وي جماعته، هنا ما اسڪت رجعت فعلت وضع الخباثة
شهد: تصبح على خير بابا...
محمد: وين؟ اللي يسمعج يگول تنام شو ساعتين وگعدتي
شهد: أمسح رقمي من يمك وڪلشي
اني احچيها ومترددة خايفة لا يسويها صدگ بـــس گلبي يغلي ليش خلاني انتظره مطشرة الملازم وبوقتها چان عندي امتحان ومنتظرة الأخ شوڪت يرد
محمد: تخبلتي شبيچ؟
شهد: ما بيه شيء سوي اللي گتلك عليه
اسولف وياه وگلبي يدگ بسرعة ما متعودة اضوج منه أو اوصل لهل مرحلة اطلب منه يحذف رقمي ويعوف ڪلشي بـــس هو مو أول مرة يخليني انتظره دائماً هيچ بقيت مترددة إذا صدگ راح يسمع ڪلامي ويحذف رقمي لو ينطيني على گد عقلي
محمد: ما أسوي شيء شبيچ بابا
شهد: ما أريد اڪمل بعـــــد
محمد: أأي ليش بلة؟ انچبي وعوفي الشقة
شهد: الله يوفقك اترڪني بحالي ولا تحچي شيء وياي بعـــــد تستاهل غيري والله
ولا تنسة تحذف رقمي
احچيها وبداخلي حيرة ڪلش ڪبيرة ما أريد اتندم واتسرع بهيچ قرار أخاف من الخسارة وأخاف اتأذى بعدين وأخاف ما أسمع صوته اللي أحبه ومتعلقة بيه حچيت وياه هيچ حتى يحس بيه ما يعوفني حتى لو چان مشغول ع الأقل دز رساله لا تخليني انتظر
محمد: هيووووو شبيچ لا اطيح حظچ
شهد: لا تغلط ما متجاوزة عليك
محمد: دنچبي شنو هذا الحچي شبيچ اليوم خير
شهد ترة بديت أعصب إذا شقة گولي
شهد: لا مدا اتشاقة نفس ما قريت گتلك امسح الرقم وهاي هيّ عوفني بحالي
محمد: ترة والله ما الي خلگ عوفي سوالفچ هاي
شهد: هاي هيّ محمد خلص اصلاً ما راح احچي شي بعـــــد
محمد: شهد شبيچ گتلچ ڪاافي ترة تعبان لا تتشاقين هيچ
ڪافي ممڪن؟
شهد: اخليك براحتك
محمد: اتصلي شهد ما الي خلگ
شهد: مشغولة شبيك
محمد: گلتلج اتصلي أريد اسمع صوتچ
والله بداخلي ما أريد ازعله مني ولا أريده يضوج أحبه بـــس هذا موقفه مو أول مرة دائماً ابقى منتظرة وهو حتى رساله ما يدز يگلي لا تنتظرين اتأخر عليچ بقيت بحيرة ڪلش ڪبيرة يربي ما أريد اعوفه بـــس ما اگدر اگله وما أريده يزعل شسوي بعمري هَسة اني
شهد: گتلك مشغولة اترخص..
محمد: شهد ڪافي بديت أعصب ترة ما بيه حيل شبيچ
اتصلي شهد
شهد: مشغولة ما فارغه واصلاً ما أريد احچي وياك بعـــــد
محمد: ترة دموعي نزلت ڪافي حرام عليچ اللي جاي تسوينه
سمعت هيچ حچة واني الف حسرة جريت ليش بقيت مستمرة وليش خليته يوصل لهل مرحلة شلون گلبي طاوعني وخليت دموعه تنزل الندم صار بعيوني ليش شهد؟ بقيت اڪل بروحي وابچي دموعي صارت عشرة عشرة شلون هيچ سويت والله مو قصدي بقيت أدعي على نفسي
يارب أخذ عمري شلون هيچ خليت دموعه تنزل بسببي الله ياخذني شجاني يعني چان من البدابة گتله مو قصدي هيچ غبية اني، بقيت أعاتب نفسي وأبچي
اتصلت عليه وبالگوة أريد احچي وياه ما أريده يسمعني ابچي أدري بيه ما يقبل
أنت تقرأ
عشــق الأستاذ والمهندسة
Romanceاحببتُ أستاذاً ڪان لي صديقاً وحبيباً وروحاً لا تُفارقني أبداً لم اتذوق طعم الوحدة وانا بقربهِ بڪُل تفاصيل الحب أحبه أنا مُمتنة لقلبي على أختياره لحبيبي وقُرة عيني لم اتندم إلا على شيء واحد لماذا لا أعرفه من قبل فَــ حياتي أزهرت بدخوله أعماق قلبي أصب...
