الڪاتبة: Shahad Mohamed
خلص أسبوع عطلة العيد ومجهزة نفسي للأمتحان ومضبطة الوضع رحت للجامعة ولگيت صديقاتي بوستهن واخذني لحضنهن وبقينه نسولف لحد ما صارت الساعة 9:30 لازم نصعد للقاعة حتى نحجز مڪان للأمتحان گعدت اني بالبداية وصديقاتي وحدة ورة الثانية واتفقنه أي وحدة ما تعرف سؤال الثانية تساعدها والحمد لله طلع الأمتحان زين وجاوبنه بدون غش
خلصت دوامي ومنتظرة الخط تأخر عليه رحت اتصلت على محمد ما رد گلت اڪيد بالدوام رجعت للجامعة اشتريت مي وعصير چان تجي السيارة ورجعت للبيت
ثاني يوم چان هم عندي امتحان واني تعبانه وصلت البيت بـ 3 بدلت وصليت گلت انام واخلي منبه وإذا ما گعدت مجبورة ابقى سهرانه طول الليل اخذتني النومة وچان اگعد على صوت أختي
شهد شهدددد گعدي شووفي شصار
احاول افتح عيوني بعدني نعسانه
شهد: هااا گولي اڪو واحد يگعد بهاي الطريقة شصاير؟
ولچ اخوية وگع ومتأذي ڪلش وأهلي ڪلهم جوة
شهد: يعني شسوي اصيرله دڪتورة خاف مشتبهة أنتي ترة اني هندسة مو طب
گعدت وحاولت اصحصح ونزلت لجوة لگيتهم هستوهم يردون ياخذوه للطبيب
رحت غسلت وسويت آيس ڪوفي وصعدت انتبهت للساعه صايرة 8 الليل بعــد ڪلشي ما الحگ وباچر امتحاني
چنت ناسية اسحب الملازم بقيت اقرأ على الموبايل وطفيت النت حتى ما يشوش عقلي
نسيت احچي وي محمد حرفياً چنت مهوسة وملتهية بالأمتحان
لگيت محمد داز الصبح صباح الخير ما رديت گلت باچر احچي وياه هَسة التهي بالسوالف
ثاني يوم رحت للجامعة ولگيت صديقاتي مفعلات نت ع الخط واخذت منهم دزيتله صباح الخير حبيبي بالدوام اني البارحة ما حچيت وياك چان عندي امتحان
محمد: عادي حبيبي إصلاً اني تعبان ومصخن شوية وما مداوم اليوم
شهد: ياااا خيرك من وين اجتك الصخونة انتبه على نفسك الدڪتور يشرح لا ينتبه عليه ويطردني
محمد: ماشي حبيبي
مَرّت الأيام ومحمد يروح للدوام وملتهي وعنده تصحيح امتحانات للطلاب واني هم أروح للجامعة وأرجع انام واگعد اقرأ لأن ڪل يوم يصير عدنه ڪوز يومي وبقينه على هذا الوضع
أجه اليوم اللي اني منتظرته من 17 سنة بهذا اليوم چان مناقشة بحث تخرجي الفرحة اللي اني بيها ما تنوصف وبنفس الوقت متوترة
محمد: شهد چانت شايلة هم ڪبير لهذا اليوم بقيت اهدأ بيها واقنعها راح تاخذ إمتياز بس لا تشيل هم وتگدر تجاوب وتحاور اللجنة بدون ما تتوتر لأن سهلة وهيّ شدتها ربع ساعه وتخلص المناقشة چانت خايفة من ردة فعل اللجنة وهيّ ما شايفتهم
أنت تقرأ
عشــق الأستاذ والمهندسة
Romanceاحببتُ أستاذاً ڪان لي صديقاً وحبيباً وروحاً لا تُفارقني أبداً لم اتذوق طعم الوحدة وانا بقربهِ بڪُل تفاصيل الحب أحبه أنا مُمتنة لقلبي على أختياره لحبيبي وقُرة عيني لم اتندم إلا على شيء واحد لماذا لا أعرفه من قبل فَــ حياتي أزهرت بدخوله أعماق قلبي أصب...
