بقلم آيه شاكر

(٣) روحي تعاني٣

-مش ناوي تتجوز بقا وتفك نحس العيلة دي؟

-والله أنا نفسي أتجوز بس العروسة بقا...
قالها حازم وهو بيبصلي، فكله بص عليا واتوترت جدًا...
شال عينه من عليا وهو بيحمحم بحرج واتوتر هو كمان لما حس إن الكل بيبص علينا، فرك ودانه وقال بارتباك:
-قصدي يعني لما الاقي بنت الحلال اللي تستحق تكون زوجة الدكتور حازم...

🌸🌸🌸🌸
الحلقه (٣)
#روحي_تعاني٣
بقلم آيه شاكر
🌸🌸🌸🌸

ضحكت خالتي دلال بتفهم، فلف حازم الإزازة وكان هو هيسأل كريم، فقال:
-قولي بقا يا كريم... إيه سر الدبلة اللي في ايدك؟

ارتبك كريم لكن جاوب بابتسامة:
-لا سر ولا حاجة... اتعودت عليها لقيت شكلها حلو وماشية مع الساعة!

وقف كريم فجأة وظهر عليه الارتباك قال:
-أنا همشي بقا لأن عندي شغل الصبح بدري...

وقف حازم وقال وهو ماسك موبايله:
-وأنا هعمل مكالمة وآجي.

نادى والدي هو كمان عشان نمشي فقومت أسلم على الموجودين، ولما وصلت لدلال همست في ودني:
-بيحبك يا بت...
قلبي دق بسرعة وبعدت عنها وأنا ببصلها بحدة! مش هتتغير أبدًا هي السبب في زراعة حبه جوة قلبي من صغرى ورعرع وكبر مع الأيام لأنها كانت بترويه بكلامها وتصميمها إنه بيحبني وإننا لايقين على بعض!

سألت نفسي كتير ليه مختارتش حاتم أو كريم! ليه حازم بالذات! لكني مرسيتش يوم على بر.

مرت الأيام بعد اليوم ده وكل ليلة بفكر في حازم وبتخيل اليوم اللي هيتقدملي فيه، وبفكر هلبس ايه وهحط مكياج ولا لأ!

كنت بفكر فيه بالنهار واحلم بيه بالليل، مرة في الحلم يقولي:
-بحبك...

ومرة يمسك ايدي، ومرة يحضنني، ومرة يجيبلي وردة ومرة يجيبلي ساعة...

وفي حلم من الأحلام الكتير دي قالي جملة عمري ما هنساها، بص في عيني وقال:
-الشمس نجمة بتضيء وتدفي حياة الناس وإنتِ النجمة اللي منورة ومدفية قلبي...

كنت بستنى وقت النوم بفارغ الصبر عشان أشوفه، وكل يوم حبه يزيد جوة قلبي ومشاعري تتحرك أكتر رغم إني مشوفتهوش في الحقيقة لإسبوع كامل لكنه مفارقش أحلامي...

وفي يوم صحيت من النوم وأنا في غاية السعادة والنشاط بعد الحلم اللي شوفته امبارح إن حازم اتقدملي وصحيت من النوم بعد ما زغردت وكنت واقفة وسط زغاريد كتير والفرحة مالية الحلم...

فسرت المنام على جوجل وطلع إنه هيتقدملي قريب وفيه سعادة هتدخل حياتي، تفسير جوجل ده غريب جدًا كل ما أبحث عن تفسير منام يقولي هتتجوزي قريب!

قومت عشان أنضف الشقة لو إحنا مش في رمضان كنت هسمع أغاني رومانسية زي ما كنت بعمل وأتخيله في كل أغنية، رغم إني يبان عليا ملتزمة ومش بغلط إلا إني بغلط عادي لكن ربنا ساترني...