حب أو حرب

البارت35

ماثيو واقف متصنم من المنظر لي قدامو ياسمين حوايجها مقطعين ودم تحتها  ولي كارد كامل طايحين مضروبين مافهم والو. راح يجري عندها هز راسها حطو فوق فخذو وبدا يضربها على وجهها ضربات خفاف وينادي باسمها باش تفيق
_ ياسمين فيقي ياسمين ياسمين .اسمحيلي حبي اسمحيلي ( طاحت دمعة خائنة من عينيه) اسمحيلي انا السبب.
ياسمين فيقي والله مانزيد نضربك ولا نجرحك بكلامي غير حلي عينيك وشوفي فيا  . حلي عينيك لي يهبلوني ياسمينتي ماتخلينيش وتروحي .مش كي بديت نتعلق بيك وفتحتلك قلبي تروحي وتخليني . حبيبي نوضي هيا نوضي دابزي معايا عيطي عليا ضربي خبشي ديري واش تحبي غير ماتعذبينيش بسكاتك .
شافها مافاقتش هزها فحضنو حطها فطنوبيل ملور وقلع طاير لسبيطار . بعد ربع ساعة كان وصل جبد فاست تاعو غطاها وهزها مدخلها ويعيط عليهم بأعلى صوتو .جاو هزوها من يديه ودخلوها للإستعجالات
مدة ساعة ومزال ماخرج حتى واحد يطمنو عليها ابار فرملية كانت محتاجة كيس دم لأنو نزفت بزاف.بقا غادي جاي فلكولوار ينتف فشعرو ويضرب بيديه على الحيط حتى يدو تنفخت ورجعت حمرة ماهتمش بيها .خايف غير على ياسمين 
غير شاف طبيبة خرجت راح يجري عندها
_ واش بيها طمنيني راها مليحة . قولي واش صرالها . عتقتوها؟؟؟
ابتسمت طبيبة كي شافت خوفو عليها وقالت هدا سور يحبها
_ تهدن اسيدي الحمدالله دوك راهي بخير قدرنا نعتقوها بصعوبة لأنو خسرت دم بزاف
_ مي علاش كانت تنزف واش السبب ( يدعي فخاطرو مايكونش صرا واش فبالو)
_ المريضة جاتها نوبة هلع وهاد شي أثر على الجنين وقريب فقدناه ولكن الحمدالله مزالو متشبت بالحياة
_( مصدوم من هدرتها وعقل تبلوكا) مافهمتش واشمن جنين
_( ابتسمتلو) مبروك اسيدي مرتك راها حاملة . عندها اسبوعين برك كي درت تحاليل تأكدت لأنو مزال صغير بزاف . نتمنى تتهلى فيها مليح وتحاول تبعد عليها أي حاجة تقلقها لانو المرة الجاية مانضمنلكش ننقذوه .اه وحاجة تانية ممنوع دير علاقة جنس* فهاد الفترة لازم حتى يشد البيبي بلاصتو اوموا تكمل شهر. وعلى سلامتها مرة اخرى ومبروك عليكم. خلاتو وراحت. اما ماثيو مركز على نقطة فالحيط مش قادر يستوعب هدرتها بقا مدة هك حتى فيقو صوت تلفونو لقا نهى تعيط كوبا عليها جا يرجعو لجيبو سمع صوت نوتيفاكسيو تاع ميساج فتحو وزادت صدمتو اكتر . كان عبارة عن مقاطع فيديو سجلوهم كاميرات المراقبة لي فالقصر. اول واحد فيه نهى وهيا تهدر مع وحدة من الخادمات .والتاني نفس هاد الخادمة خلطت شي حاجة فالعصير وحطاتو فالفريجيدار والتالت ياسمين كي دخلت ودات العصير . والرابع كانت ياسمين مغمى عليها هي وهيثم دخلت نهى والخدامة للبيت نحاولهم حوايجهم ورقدوهم فالسرير باش يبانو كانو فعلاقة

هز تلفون على جهدو ورماه على الحيط . شعور الندم يقطع فيه من الداخل يعني هو ظلمها وماسمعلهاش مامنهاش كي قالتلو خاطيني ومادرت والو.  بواش من وجه رح يقابلها دوك كيفاش يخليها تسامحو .حتى لو سامحتو على كلش مستحيل تسمحلو على اخر عملة .خلا كامل رجالو يغتصبوها خرج من سبيطار ساعر  كاره روحو راح لعند ماركو لشركتو الناشئة مالقاهش. راح للبار يسكر لعلو ينسى شويا الألم لي راهو يقتل فيه من داخل كاس مور خوه حتى فقد الاحساس ناض يتمايل ولي لقاه قدامو يضربو ويتخطاه باغي يروح يشوفها ويطلب منها.سماح .رح يبقا موراها حتى تسامحو غير خرج لقا ماركو قدامو ابتسم بتعب . حتى وجهو دار من لبوكس لي عطاه صاحبو . هدر وابتسامة الم على وجهو
_ ضربني زيد ضربني نستاهل اكتر  انا الغلطان  انا درتها بيدي ظلمتها معايا بزاف .ياله ضربني اقتلني ياريت غير تسمحلي .نوضو ماركو شادو من رقبتو من الخلف بدا يضرب فيه يضرب يضرب وماثيو مستسلم ليه مشباغي يدافع على روحو يقول فخاطرو انو يستاهل اكتر من هاك .ماركو ماخلاش فيه عضم صحيح خسرلو كامل وجهو قعد حداه يرد النفس حتى نطق ماثيو
_ هي حامل مني ههه تصدق ياخويا رح نولي اب واخيرا . هههه يولي عندي ولد يعيطلي بابا .. بدا يضحك ويبكي فنفس الوقت
_ ولكن ماماه رح تكرهني وتتمنى تشوفني ميت قدامها باش ترتاح . واش ندير يا ماركو باش تسامحني واش.ندير؟ صدقني أي حاجة تطلبها مني رح نديرهالها غير تسمحلي منقدرش نتخيل حياتي بلا بيها . هي نور لي ضوالي حياتي كيفاش قدرت ندير فيها هاك كيفاااااااش😭😭😭😭
ماركو اول مرة يشوفو يبكي بحرقة .عارف انو يحب ختو مي لازم يتعاقب على واش دار معاها . شاف فيه بحزن وهزو من دراعو ينوض فيه
_ نوض از* غسل علينا خناينك .حياني الله حتى شفتك تبكي بسبة الحب . نوض
وقفو وتكا عليه وصلو لطنوبيل وطلع يسوق واما ماثيو غير ساكت السكرة مأثرة عليه ولكن هي ماقدرش ينحيها من بالو .شاف لماركو بابتسامة
_ رح نخليها تسامحني وتحبني من اول وجديد مستحيل نخليها تبعد عليا رح نربيو ولدنا بزوج ونعيشو فرحانين هدا وعد مني
شاف فيه بغضب شديد
_ بللللع عليا عمبالك ساهل عليها تسامحك بعد واش درتلها رميتها لرجالك ينهشو فلحمها ورحت وخليتها . كون هي تسامحك انا جامي نسامحك
_( حط يدو على كتفو) نتا خويا وعارف انو يجي.نهار وتسامحني حتى نتا
دفعلو يدو وكمل سوقان حتى لحقو لسبيطار
_ اهبط داوي جروحك وروح تقود
ابتسم ماثيو عارف انو صاحبو عمرو.يسمح فيه هوما كبرو بزوج وعاشو الحلوة والمرة مع بعض حتى لو تدابزو مايقدرش يكرهو
_ربي يحفظك خو
هبط يتمايل مش واعي على روحو شافوه الفراملة خافو منو لا يكون مسلح ويآذيهم اما هو مش شايفهم كع همو كامل انو يشوفها ويشبع منها .
لحق لغرفتها لقاها فايقة وتشوف فسقف بقا واقف فلباب بلا مايقرب ليها .هدرت بلا ماتشوف فيه
_ قرّب عندي
راح بالعقل لعندها واقف على راسها شدتلو يدو وقعدتو فجنب سرير. حطت يدها على وجهو تتحس جروح لي فيه. باسها فكف يدها بحنان
_صفا شويا ؟
مجاوباتوش اكتفت انها تتأمل فيه. عارفة انو الانسان يقول الحقيقة فحالتين يا يكون رح يموت يا يكون سكران . وهو باين عليه شارب بزاف ومأثر عليه دونك أي حاجة بغات تعرفها  هدا هو الوقت المناسب هزت يدو لي تنفخت كي كان يضربها على الحيط . باستها بحنية متعمدة تطول فالبوسة شافت فعينيه وهدرت
_ علاش درت فروحك هاك؟ علاش ضربت روحك
_ ياسمين سامحيني
_ روح اغسل وصحصح ونهدرو
هادشي لي دار دخل غسل وجهو ويدو  وخرج عندها لقاها عيطت على وحدة من الفرمليات تجيبلها واش تسحق باش تداوي جروحو . شافت ياسمين فالفرملية لقاتها ساهية فماثيو وتتفحص فجسمو بوقاحة هدرت بحدة
_ ميرسي تقدري تروحي انا نتكلف . شنفت عليها وخرجت .اما ماثيو بقا واقف فبلاصتو متحركش حتى عيطتلو
_ ارواح عاحبك الحال تما واقف كي تمثال الحرية !. ابتسم ليها وقرب قعد فحافة السرير هي سقمت روحها وقعدت جابت المعقم دارت شويا فالقطن وهدرت
_ زيد قرب
هادشي لي دار قرب عندها حتى قريب يتلاصقو اجسامهم . بدات تعقملو فجروح وجهو وهو ساهي فيها مش مهتم للألم فوجهو وهي تعقملو وتسوط عليهم باش تبرد عليه الحريق هدرت ببرود وهي مركزة على الجرحة فجيهتو
_ اهدر
_ياسمين😔 واش ندير باش تسامحيني؟