بعد الليلة الطويلة لي فاتت على ياسمين مقدرتش ترقد ولو ثانية كلما تغمض عينيها تتفكر كيفاش كانو رح يغتاصبوها بوحشية وكأنهم حيوانات .رغم انو ايما طلبت منها سماح شحال من مرة وترجاتها تبقى معاها ولكن هي مبغاتش. حبت تعيش المها وحدها ماتبغي حتى واحد يشوف ضعفها .كانت 4ونص تاع صباح خرجت للبالكو لي جاي فغرفتها وقعدت تتأمل فالنجوم لي يختفيو وحدة مور تانية تخمم كيفاش رح تعيشوهي هربانة من ابوها وقاعدة مع ناس ماتعرفهمش كيفاش رح تقدر تيق فيهم فيومين وابوها لي عاشت معاه 24 وصدمها فلخر .صاي رح تمحي كلمة ثقة من قاموسها.
رغم انو حلفت ماترجع لهاد القصر مرة اخرى ولكن معندهاش حل اخر لازم تبقى فترة بينما براو جروحها منبعد تخرج تحوس على خدمة . كان يتقلب ففراشو مش عارف يرقد حتى ناض ولبس سورفات وخرج يجري كيما عادتو كل صباح
فات على شمبرتها فتح الباب بشويا وطل عليها مالقاهاش فبلاصتها .تخلع وخاف تكون راحت مرة اخرى(واقيلا مش غير ايما لي حبتها تبقى حتى هو والف وجودها فالقصر) فتح الباب ودخل وقعد يحوس عليها بعينيه حتى شافها واقفة فالبالكو لابسة غير فوندروب خفيفة والبرد يضرب فيها وشعرها الطويل لي واصل حتى لخصرها يدي فيه النسيم الخفيف تاع صباح كان منظرها يشهي وينوض غريزة أي رجل. مقدرش يبقا اكتر خاف يتهور ويغلط معاها وهو لازم يكسبها لصالحو ويعرف واش نواياها.خرج من القصر جهة الغابة يجري وهي كانت طل عليه من فوق .عز عليها بزاف كي نقذها اليوم ومش عارفة كيفاش تشكرو ولكن دارت فبالها انو ولاو متعادلين مدام هو ضربها وهانها ودوك نقذها معنتها حتى هي لازم تسمحلو...
كامل اجتمعو على طاولة الفطور لي مخلاتش من حركات ايما الطفولية كانت فرحانة برجوع ياسمين وحتى ياسمين قررت تسامحها فالأخير هي ماقصدتش خوها لي تسرع وضربها. فطرو وجا نايض حتى وقفاتو بصوتها .نطقت بهدوء
_ ماعليش نهدرو عندي حاجة حابة نقولهالك
شاف فيها شوي منبعد قالها تبعيني للبيرو . ودخل وقعد فبلاصتو وهي دخلت موراه وقعظت اونفاص ليه
_ بون انا صراحة مكنتش حابة نبقا هنا لأنو مجاتش نسكن عند ناس ماتربطني بيهم حتى علاقة على هدي كي قلتها لإيما راك عارف واش صرا .😣 توترت من شوفاتو وتخلطتلها الهدرة عييات ماتوجد واش تقول فلخر بشوفة منها راحولها كع الحروف..
_ اممم وواش المطلوب مني؟ علاش راكي تحكيلي
_ بغيتك تقنع ايما تخليني نروح .علابالي هي تعلقت بيا بسرعة مالقري جاتني غريبة مي تقبلتها ووافقت نبقا هنا ايامات ولكن منقدرش نظل ديما. انا قررت نحوس على خدمة ونكري دار وايما الوقت لي حبت تقدر تجي عندي ولا نجي عندها.صراحة مام انا حبيتها ولكن الله غالب... قعد يخمم فهدرتها ويدو على لحيتو .لو كانت جاسوسة كانت رح دير اي حاجة باش تبقا هنا وتدي معلومات اكتر مي هادي حابة تروح فأقرب وقت .يا توقعاتو غالطة ياهي دارسة الخطة مليح باش مايشكوش فيها
_( هدر بجدية وعينيه فعينيها)نتي راح تبقاي هنا لحتى انا نقرر ونخليك تروحي اما على الخدمة الله يسهل مكان مادخلني فيك المهم مدام ايما حاباتك تبقاي معاها يعني راح تبقاي
_اوك رح نبقا ولكن نولي نروح نخدم ونجي لهنا
_ تقدري تخرجي عندي خدمة
وخرجت من عندو صافقة لباب موراها كل قوتها تروح كي يهدر كانت مقررة انها متبقاش ولكن معرفتش كيفاش وافقت تقعد لهنا.بالاك حتى هي والفتهم بلا ماتحس...
راحت لبيتها ولبست عليها وخرجت هي وايما لي عندها جامعة لازم تروحلها عندها سمانة وهي مغيبة . تفارقت هي وايما وراحت تحوس على خدمة مخلات حتى بلاصة مارحتش ليها وماقبلوهاش لأنو معندها حتى ديبلوم او شهادة جامعية مايقدروش يخدمو وحدة حبست فالباك .راحت حتى لقهاوي والمطاعم بحكم هي تعرف تطيب وقالت ممكن يخدموها مي والو رجعت بيديها فارغين . دخلت للقصر عيانة من دوران نهار كامل دخلت دوشت ورقدت .
عند ماثيو
_ واش درت؟
_ موسيو هي راحت لكل بلاصة مي ماحبوش يخدموها ودوك رجعت للقصر
_ مم اوك .وقطع عليه .وابتسم بخبت باغي ينفذ خططو فأقرب وقت راح للقصر ولقاها قاعدة على طاولة العشا مع ايما قاعدة تسولها علاش معندهاش تلفون .
_ ودوك كيفاش نعيطلك غير ليوم كنت حابة نعيط نشوف وين راكي تفكرت بلي معنديش نيميروك
_ امم قتلك كنت فلميتم باينة ممنوع علينا تلفون( كذابة😏). على هاد الكلمة دخل ماثيو وسمع هدرتهم .عاد فهم علاش مالقا عليها حتى معلومة يعني هي مجهولة النسب ...
سلم عليهم وباس اختو فراسها وقعد فبلاصتو حتى زدم عليهم ماركوس وراح باس ايما فخدها وقعد وهي حمارت بالحشمة سورتو قدام خوها.
_ مبقاش قدر😒 مكش تشوف فيا قدامك واش الخدمة هادي
_ اففف تكالما اصاحبي مالك غير بوسة اخوية 😉
_ تعاودها الخطرة الجاية نقطعلك دوك شوارب وحوس باش تبوس قالو اخوية😠
_ رفع يديه باستسلام وقال: عمر داوود مايعاود اخر مرة😉.وشاف فياسمين
_ صفا شويا؟؟
_ صفا الحمدالله. قاطعهم ماثيو
_ لقيتي خدمة؟
_ لالا😔 ماحبوش يخدموني لأني معندي حتى ديبلوم
_ امم منبعد تبعيني للبيرو عندي هدرة معاك...
فرايكم واش من هدرة رح يقولها
واش راح يقدر ماثيو يثيق فياسمين
كاين بزاف اسرار مخبيين مع الاجزاءالمقبلة رح تعرفوهم ان شاءالله
أنت تقرأ
حب أو حرب
Gizem / Gerilimفرايكم يقدر الحب يفوز على الحرب فهاد القصة رح تشوفو مزيج منهم الاثنين نتمنى تعجبكم روايتي الأولى
