حب أو حرب

البارت 40

فاتت يومين على موت ياسمين دارو اعلان عن وفاتها واليوم الجنازة تاعها .رح تقولو علاش طولو باش يدفنوها . لأنو منذر مادخلتش لراسو كيفاش ماتت بهاد سهولة .طلب يديرولها تشريح . وعرفو انو كلات مادة قبل ساعتين من العملية خلات قلبها يحبس. ماثيو جاه خبر موتها صدمة يومين وهو غالق على روحو فبيتو مايتكلم مع حد ماياكل مايشرب حاس بالذنب ويلوم روحو لأنو مقدرش يحميها
ايما حتى هي حالتها ماتعجبش غير تبكي وغالقة عليها غاضتها صاحبتها بزاف صح اهملتها فالفترة الأخيرة مي كي عرفت انو كانت مظلومة وهي سمعتها كلام يجرح بلا ماتفهم منها ندمت بزاف تمنات كون يرجع لوقت وتطلب منها السماح لبست كلش كحل وخرجت لقات ماثيو راكب يستناها غير ركبت حداه قلع بلا مايهدر معاها هدا حالو من نهار عرف واش صرا بينها وبين ماركو . طاحت دمعة حارة من عينيها كي شافت البرود من جيهتو .اخوها لي كان يقلع من لحمو ويعطيها .مايخلي حتى واحد يقلقها ولو بكلمة دوك مايهزش فيها حتى عينو . خوها لي ضرب ياسمين على جالها دوك ولا بعيد عليها بزاف .تكسر هداك رابط القوي لي كان بينهم . غمضت عينيها تنفض الذكريات لي جاوها لدماغها .تفكرت النهار المشؤوم لي غير حياتها
< فلاش باك>
بعد يومين من اختفاء ياسمين دخل تعبان لدار يومين مارقد ولا غمض عينيه مش باغي يرقد بلا مايعرف وينها يطمن على حالها يتأكد انها مليحة .فات على شمبرة ايما سمعها تهدر فتلفون .غمض عينيه وحلهم يتمنى انو ماسمعش مليح .زير على يديه كي سمعها تقول
_ ماركو مرحش تسمح فيا ياك .يعني مانندمش كي سلمتك نفسي؟؟
قبل ماتسمع رد ماركو شافتو داخل لبيتها ساعر عينيه حمر ومعصب لأخر درجة
_ ايما لي سمعتو صح؟
يحاول يكون هادي باش مايظلمهاش. زادت عصباتو بسكوتها .هزها من كتفها بقوة وهي ترجف بين يديه وتبكي عارفة انو ليوم نهايتها
_ اهدررررري
_ ان اا انا ما
زير على سنانو ويهدر بصوت منخفض عكس اعصابو
_ لي سمعتو صح ولا غالط؟؟ نستحق اجابة واضحة ايه ولا نو
_ هزت راسها بإيجاب ودموعها ويدان
طلق منها وعينيه مايتفسروش خيبة امل كبيرة يحس بيها ختو اميرتو الصغيرة غدراتو فضهرو ومعامن مع رفيق عمرو لي ديما كان حاسبو خوه وكبرو مع بعض.
شاف فيها بانكسار وخرج جات تتبعو طلع يدو بمعنى حبسي
_ خويا اسمعني الله يخليك انا نحب ماركو وهو يحبني بليز ماديرش فينا هكا😭😭😭😭😭
دور وجهو عندها وملامحو مايتفسروش
_ نفهم من هدرتك انك ماندمتيش على هاد الفعلة؟؟؟
جات تهدر قاطعها بهدوء
_ ياخسارة تربيتي ليك .

خرج من بيتها حتى لمحو طالع لبيتو راح عندو جرو من الكول تاعو ورماه على الأرض غير ناض باغي يفهم واش صرا حتى ضربو ببوكس لوجهو مخلاهش حتى يدافع على روحو .مش سامع بإيما لي تبكي موراه وتترجاه يطلقو .بقا يضرب فيه ويركل ماحبس حتى رجعو كامل دمايات
_ ختي يالكلب ختي! تطعني فضهري  وتغدرني هدي هيا الصحبة !
جاوبو بابتسامة مستفزة
_ كيما نتا اغتصبت ختي وعذبتها حتى انا خلفتها فختك .الفرق الوحيد انو نتا تعديت على ياسمين .اما ختك جاتني برجليها ودارت هادشي برضايتها
جا يزيد يضربو وحبس فآخر لحظة شاف فإيما لي حالتها ولات تخلع تبكي دون توقف وتشهق بقوة وبالسيف تخرج النفس جا يشدها طاحت سخفانة هزها دخلها لبيتها وجاب شويا ما رشولها على وجهها بقا شويا حتى شافها فاقت هدر بغضب شديد
_راكي مليحة؟
اومأتلو بإيه . خرج وخلاها راح لكاميرات المراقبة زاد تأكد ان. صح هي لي راحت لبيت ماركو برجليها .زاد حقد عليهم في زوج . صح هي غلطت ولكن كان عليه هو يحبسها مش يستغلها..
راح لبيت ماركو لقاه يلم فحوايجو غير بالسيف بسبب الجروح .جا يهدر قاطعو ماركو خارج بالفاليز تاعو
_ انا حبيت ختك بزاف وبسبة خوفها منك كانت ديما دير حاجز بيني وبينها . يمكن لأنك ماجربتش تحب عليها مش حاس بينا .ولكن نهار لي تحب من قلبك( حط يدو على قلبو نترهالو بزعاف) رح تحس بيها .
< اند فلاش باك >
وصلو للمقبرة هبطو فصمت لقاو ناس قليلة لي جات تترحم عليها يمكن شي 3 ولا 4 غير ماركو .هيثم و3 جيرانها مع نساهم
ايما غير شافت ماركو هبطت عينيها وبدات تبكي تحاول ما امكن تتحكم فروحها قدامو باش متبانش ضعيفة . اما ماثيو فحالتو يعلم بيها غير الله .صح بقا ساكت ومدار حتى رد فعل ولكن قلبو يتشوا من داخل خسر حبيبتو وولدو فنفس الوقت .مزال ماعاش معاها مزال ماشبع  منها . وولدو لي مزال ماشافش الدنيا واش ذنبو
كملو مراسيم الجنازة دفنوها قراو عليها شويا قرآن وكل واحد شد طريقو ماثيو عيط لواحد من رجالو يوصلو ايما . بقا غير هو وحدو قدام قبرها نزل على ركابيه يمسح على القبر طاحت دمعة يتيمة من عينيه نحا نواضرو مسحها ووقف متوعد ينتقم لكل من كان سبب فهادشي لي صرالها .حالف يندم لي قتلها وقتل ولدو

واقف بعيد يراقب تصرفاتو بالتدقيق .لابس سورفات واسعة وكاسكيطة مخبية ملامح وجهو . غير شافو بعد ابتسم وجا ماشي حتى قاطعو شخص يتمشى بعكازو يكون فالخمسينات من عمرو
_ نظن وفيت بالوعد تاعي دوك جا دورك
ضربو على كتفو وتخطاه
_ ماتتقلقش ا سليمان كلشي فوقتو حلو
جا يشدو من يدو.هدر الشخص الغريب بابتسامة مستفزة
_ تؤ تؤ حيد يدك
تقلق سليمان من برود الشخص لي قدامو
_ مناش نلعبو هنا . مرحش نضل نتبع فيك من بلاصة لبلاصة. قلت نقتلوها وقتلناها . دوك الدور عليك توفي بوعدك
هبط كاسكيطتو على راسو وهدر بمزاح
_ ممم مش مليح لك التقلاق يا سليمان . تقلبت ملامحو للجدية
_ انا نقرر وقتاش نوفي بوعدي واصلا مزلنا فبداية طريق ومزال قدامك خدمة كتيرة .هيا منبعد باي
راح الشخص المجهول وخلا بركان موراه شويا وينفجر
_ والله كون ماجيت نسحقك كون قطعتك ومديتك لكلاب ياكلوك ....

ماثيو راح لبحر قعد فوق حجرة يتأمل فأمواج البحر المضطربة كحال قلبو . تشوفو من بعيد تقول راهومليح ماخاصو والو .ولكن هو شخص حزين . من نهار غابت ياسمين عن عينو ماشاف نهار مليح ابتسم بألم كي تفكر نهار قالتلو .مزال يجي نهار وتولي تحبني وتهترف باسمي .هاهو جا هاد نهار ولكن هي مش حاضرة باش تشوفة كي ولا فغيابها
بقا هك حتى ضلام الحال شاف فساعة لقاها 1 تاع صباح دخل لطنوبيلتو لمح ورقة فوق الكرسي لي مقابل شيفور
<منصف / صوفيا= سمرا>
مافهم والو واش دخل عائلتو فهادي لي اسمها سمرا
يعني يمكن تكون هي لمقصودة فرسالة لي لقاها نهار تخطفت ياسمين < ياسمين مقابل سمرا> ولكن شكون هدي وواش علاقتها بالأب تاعو وبصوفيا . تفكر نهار الورقة لي لقاها على الشط
< ماتحوسش بعيد الحقيقة راهي قريبة منك>
الحاجةوالوحيدة لي فهمها انو عائلتو عندهم سر مخبيينو ولازم يعرفو قلع طنوبيلتو متوجه للقصر دخل بلا حس طلع فدروج بهدوء كان رح يدخل لبيتو حتى سمع والديه يحكو  .قرب جيهة لباب . حتى تشوكا من الكلام لي سمعو
_ ياك سمرا ماتت  هدي 8 سنين ونتا قتلتها بيديك
_ ايه ولكن رحت لبلاصة لي دفناها فيها مالقيتش الجثة تاعها .لقيت الورقة هادي برك
مدلها الورقة تقراها حتى طاحت فلرض مخلوعة وعينيها محلولين على وسعهم
_ مستحيل مستحيل مايمكنش
شاف فيها بخوف ونطق
_بنتها رح تدمرنا كامل ....