تحت سيادة القانون

ياسين

" نور"
مرت الايام وجا اليوم الي نكدر نكول عليه يوم ابد ما انتظرته بحياتي
كاعدة نفس الكعدة ومتحضرة لشخص مو شخصي الاريده ولا اله صلة بكلبي.
كلشي يمي فرحان الا كلبي حزين ما اعرف هو الي صار مقدر اعيشه لو اختاريته اني
كلشي جان مثل ما راده ياسين حرفياً هو كلشي اختار واني بس اكله اي
هو لا الارض ولا السماء واسعته من فرحته واني الارض والسماء وكل المجرات حزينة بحزني واشوف الدنيا شكد ظلمة مو مبالغة مني بس صعبة شكد ما اهونها ع نفسي هي صعبة بالنسبة الي.
واكف بصفي وجا وقت انو يلبسني الحلقة
اخذ ايدي وباسها ولبسنا الحلقات
باوع بعيوني وكال

- نور راح اخليج اسعد انسانة و بحياتي ما راح اقصر عليج شي
انتِ حلمي الي من زمان جنت احلم بي احبج.
كلشي ما سويت مجرد ابتسامة خفيفة شرحت الي بداخلي كله هو يعرف كلش زين انو هو مو حلمي
خلصت الهوسة بعد ساعة ونص رحت لغرفتي وسديت بابي وما احجيلكم عن الانهيار الي دخلت بي
بجيت لحد ما خلصن دموعي
اباوع ع الحلقة الي بيدي واني خايفة من الجاي
بعد ساعة من البجي كعدت بدلت وغسلت وجهي وعفت كلشي ووعدت نفسي انو ما اوصلها لهاي المرحلة بعد ابد
اتصل بيه ياسين جاوبته