« عزّ الله إنّي في ظبي نجد مغروم .. راعي العيون الّلي مع الزّين خجّله »

«47»

«اللَّهُمَّ صَلِّ وَسَلِّم عَلى نَبِيِّنا مُحَمَّدٍ»
‏«اللهم لاتجعل روايتي تُلهي عبدك عن عبادتك»

وشالوه وانعشوه لان النبض عنده ضعيف وضعيف وجدًا ونقلوه للعنايه وحطو لـ تُقى مُسكن اثر انهيارها العصبي ، الونَا بعصبيه اتجهت هيّ وايناس للمركز ودخلو عند جِنان ، خنقتها ألونَا بعصبيه:والله وبالله وتالله لو ماتنطقين شمسويه بنهيك بيدي!!!!
جِنان كانت تحاول تتنفس جا فِراس مسك الونَا:خلاص اهدي!
الونَا بانفعال:شهدي فِراس شهددددي!!!-وطالعت جِنان لان فِراس ماسك يدينها-اقسم بالله وعزته وجلاله لو ماتنطقييييين ان انحرك بيددددددييي عسسسسى غضب ربييي ينزللل علييييك يالساااحره تكفرررررين بررربك!!!! وتاذييييين عيال عمااااامك يالمرررررريضضضضضه!!!! عسسسسسسى غضب رررربي علييييك!!!! والله وبالله وتالله ان اكووون خصيمتك بيوووووم القياااااااااامه!! والله شهيييد على ماااااا اقووووول!!!
ايناس لفت من وراها وحطت مشرط عند نحرها بهدوء:ورب البيت واللي رفع سبع ونزل سبع ان مانطقتي!
كل المتواجدين اقشعرت اجسادهم من دُعاء ألونَا وحلف ايناس
جِنان قامت ترجف برعب وتلعثم:ماسويت شي ماسويت شي
طق وليد يده بغضب على الطااوله:انطقي!
جِنان برعب وكل ماله صوت الونَا يعلى بالدُعاء عليها تكلمت بتلعثم:ماسويت شيي ماسويت شيي صااالح قال لي اجيب أثرر لهمم ونزلت بيتهم يوم كانو بمكه وخذت تيشريت مدري لمين واعطتيه مالي دخل بشي مالي دخل بشي
بدت ايناس تغز المشرط على فكها:وين صالح؟وليه عطيتيه؟وليه بتسحرونهم!
جِنان برعب وتلعثم:عشّان ينفصلون ويتشتتون بس مادري وينه هو يتصل علي من ارقام جديده ويكسر الرقم اذا قفل مادري وينه والله...
دفت الونَا فِراس ولكمتها بقوه ومسكت فكها بين يدينها:اسم الله لايطب لساااانك يالقذررررره!!!تكلمي وينه!
جِنان برعب وتلعثم ودمع:مدري مدري عصام يدري انا مدري عن شي
دفت الونَا راسها على الطاوله وطاحت جِنان بالارض ورصت راسها بالارض بوعيد:وقسمًا بالله لو يصير بنرجس شي ولو تطلع من العمليات ولو باذا طفيف ان موتك على يدي هاليله ولابيصلون عليك ولابتندفنين مع المسلمين تدرين ليه؟
ايناس بهدوء تكتفت:بتندفين عند السحره محد بيصلي عليك ولاحدً بيزورك ومن الان اقولها لك خصيمتك يوم القيامه انا وحسبي الله ونعم الوكيل فيييك وياعساااني اشوفك باسوء حال انتظري راجعين لك انتظري
وطلعو الراشد واتجهو للمستشفى ، العسكر والمحققين تجمدو مكانهم بخوف منهم ومن دُعائهم ولعنهم وشتمهم وضربهم لها واخذوها للحبس وكل المركز كان يسمع دُعائهم واقشعرت ابدانهم وجلسو يدعون الله حُسن الخآتمة ، وصلو على خروج نرجس من العمليات ونقلها للعنايه وجلسو يدعون الله ورجعو تمارا وبتال بعد مابدلو ودخلو عند العنايه وطلعت تمارا بابتسامه وتنهدت براحه:صحيت
انهل الفرح والراحه على قلوبهم واللي سجد شُكر لله واللي يسالها ، ابتسمت:مدري مدري بس صاحيه جالسين يتاكدون انو مافيها شي
وطلع بتال بأبتسامه:بتطلع للافاقه الان
ودمعو كلهم فرح وجلسو يهدون بعضهم ، وبعد ساعه اتجهو لغرفتها ، ركض وليد بدموع وحضنها:ليه تتعبين ماما!
كانت مو مُدرِكه بشكلً تام حضنته وهي مو قادره تتكلم ، سيف:تحت البنج للان
خالد بخوف:متى تصحي ؟ يعني تفهم وتستوعب وش نقول؟
سيف:اول ماينتهي البنج ويوضح لانها بتبدا تتكلم بشكل طبيعي زي اول الحين لسانها ثقيل واستيعابها بطيء شوي بسبب البنج
وطلعو الاطباء ، جلس ابراهيم بخوف وقبل يدها بمحاجر مُمتلئه دموع:نرجس ابوي
كان لسانها ثقيل ورؤيتها تضعف شوي شوي بس لمحت دمعت ابوها رفعت يمناها وكلها ابر ومسحت دمعته وطاحت يدها وانغلقت اجفانها ، ابراهيم بهلع:نرجس...
مسكت تمارا اكتافه تهديه اثر هلعه الواضح:نامت هدي
ابراهيم بخوف:اكيد؟
بتال:اي والله البنج ثقيل عليها ونامت باثره
فِراس:الحين وش السواه؟
سلطان:وش وش السواه؟
فِراس:اللي مسكناها طلعت جِنان وتهدد وتوعد وهي وصالح اللي ساحرينهم
انصدموا كلهم لانهم تو درو ، ألونَا بإنفعال:موتها على يدي صبر بس
سلطان بصدمه:لحظه فهمووونا!
ألونَا:خلود وفروس وقت الصلاه نزلو يصلون انا رحت اوضي بس سمعت فتح باب قلت لو ايش ماهم راجعين بهالسرعه شغلت تسجيل الصوت وجلست اسجل يوم خلود وفروس رجعو هي لفت على الباب ولفيت من وراها ومسكتها وكانت تعترف انها ساحرتهم حتى وقت التحقيق تعترف ثقتها ذي وراها شي
كانت إيناس ساكته من المها وكانت شابكه يدها بيد الياس وتشد على يده بقوه من المها ، لف لها وهمس:تعبانه نرجع البيت؟
كانت ساكته وبس تشد على يده لين ماطاح راسها مغمي عليها على كتفه وفز شالها ونزل فيها للطوارى وانفجعو الباقين ونزلو بس خالد واهله وسلطان وعياله ، الممرضه كشفت عليها:ولاده! العمليات الان
الياس بتوتر:بيصير شيي؟؟؟
مسكت يده الونَا طلعته:هدي!
وعد بخوف:شفيها!
الونَا:ولاده
وجلسو كلهم يدعون لها وقت ما ايناس بالعمليات ونص تحت ونص فوق عند نرجس ، صحت نرجس بصداع مسكت راسها بكلتا يدينها تضغط عليه ، بعد وليد يدينها عن راسها بخوف عليها:نرجس مايصلح! لاتضغطين على نفسسك!
وراح موج ونادا الاطباء ، الدكتور1 شغل الضوء:تتبعي طالعيه وين يروح
كانت بصعوبه تحرك بؤبؤ عيونها ، رفع القلم فوق:امسكي القلم بالسبابه
رفعت يدها بثقل وبُطى والباقين يترقبون بخوف ومسكته خمس ثواني ويدها ترجف وطاحت على السرير ، الدكتور:اشري على انفك بالسبابه
واشرت وايضًا ضلت ترجف مُده خمس ثواني وطاحت يدها ، دكتوره 2:الحواس ضعفت؟
بتال جا وجلس جنبها:نرجس تسمعيني؟
نرجس بصوت ثقيل ولسان ثقيل:اي
بتال اشر على وليد الصغير:تعرفين ذا؟ ذا مين؟
نرجس بصوت ثقيل ولسان ثقيل:وليد ولدي
بتال مسك يدينها وثبتهم بالنص:تحسين يدينك ثابته؟
كانت ترجف وبوضح ونطقت بصوت ثقيل ولسانها بدا يخف:لا فيها كهرباء
الدكتوره حطت يدها ورا ظهر نرجس تجلسها:تحسين بدوخه؟ بشي يثقل راسك؟
نرجس الرؤيا كانت تروح وتجي:ماشوف زين
انقبضت قلوبهم بخوف وسكتو يترقبونها ، دكتوره :نرجس افتحي يدينك واحضني ولدك
فتحتها ومن قرب وليد ماقدرت تتحمل وطاحت على ورا:مقدر ماحس بظهري
خافو زود ووليد بكى وبعد من مسكه موج يهديه ، دكتور1:طيب نرجس الحين تستوعبين وش قاعدين نقول؟ مستوعبه وضعك ؟ ايش اخر شي تتذكرينه؟
نرجس بتذكر:كنت بالمطبخ جالسه واخواني عندي
دكتور1:وحاليًا تعرفين سبب فحصنا لك؟ تعرفين تاريخ اليوم؟
نرجس بتذكر:لا مو عارفه حتى التاريخ كنت نايمه بس اسمع لاكن مو متذكره شي اللي اعرفه اني كنت نايمه
الدكتوره طالعتهم:غيبوبه قصيره مافقدت الذاكره ولا تاذت الحمدلله لاكن بنصرف لها زي المُساند بلاستيك وحديد ايضاً نركبه على ظهرها عشان يثبتها ولايخل التوازن عندها لين ماترجع زي قبل باذن الله
وليد بدمع:طيب ليه ماتبي تحضني؟
انحنت الدكتوره عنده بحنيه ومسكت يدينه:ماما تعبانه شوي عشان كذا ماتقدر وانت ايش لازم تسوي؟
وليد مسح دموعه:ايش؟
الدكتوره بحنيه:ماتخلي ماما تزعل وماتخلي ماما تعصب وتساعدها اوكيه؟
وليد:تمام
ابتسمت الدكتوره وطلعت ، ابراهيم بخوف طالع بتال وتمارا:مافهمت منهم شين بها شي نرجس؟
جلسه بتال:لا بس مو قادره تتحكم بجلستها ويدينها زي اول مع العلاج الطبيعي والتمارين بترجع مثل قبل وأحسن
تمارا كانت جالسه جنبها:ورعه
وضحكو الموجودين ، ابتسمت نرجس بخوفت:وش
تمارا فتحت يدينها:يالله قومي واحضنيني
نرجس:لا احضنيني انتِ
تمارا:مالي دخل ذا تحدي لكِ خلصيني زعلتي لودي حيوانه!
ضحكو الموجودين وهم ملاحظين محاولات تمارا بتغيير جوها ورفعو السرير بالريموت ، تمارا:هيا خلصيني يدي تشنجت !
حاولت تحرك ظهرها وتتقدم للامام:ماقدر
تمارا قربت شوي:تقدرين
حاولت ايضًا ترفع يدينها:ماقدر تمارا! يديني مثبته مقدر
عرفو ليه تقول يديني مثبته ، نزلت يدينها ومسكت يدين نرجس:طيب بنقول لك شي
جلس عندها وليد ومسك يدها وحكاها كل شي كانت مابين مستوعبه ومو مستوعبه:فهمت وما فهمت
كلهم سكتو وتقدمت سَلاف:ايش اللي فهمتيه بالضبط؟
نرجس بمحاوله انها تشرح:ان جِنان مسويه سحر لعبدالعزيز بس
سكتو بوهقه من ادركو انها للان تحت تاثيره ، سَلاف:اوكيه خلاص بس ذا فهمتي كل السالفه
نرجس:طيب وانا شدخلني تقولون ليّ؟؟
سكتو ولاهم عارفين كيف يقولون لها بالضبط للان مو عارفين كيف ومحتارين ولفو للباب جميعًا وقت دخول الشيخ مع حمد وسكتو يطالعون نرجس ، نرجس طاحت للخلف وتشنجت على طول ، خافو كلهم وفزو وثبتوها وبدا الشيخ يقرا والدكاتره كلهم فيه عشان اي تدخل يتدخلون بسرعه، بعد ساعه ونص ، الشيخ اعتدل بوقفته:طلع الحمدلله خلوها تداوم على القرايه والرقيه والاذكار زين مازين
ابراهيم بخوف:متاكد ياشيخ؟
الشيخ:اي بالله وواضحً انه طالع من اول بس للحينها تحت تاثيره يعني ماطلع بشكلً كامل هو انتم قارين عليها؟
سَلاف:شغلنا رقيه الشيخ فهد وطاحت بغيبوبه لها ثلاث ايام توها تصحي وجاها نزيف دماغي
الشيخ:يمكنكم ماشغلتوها صح ولا داومتو عليها صح عشانها هلون تضررت بس الحمدالله مابها خلاف هالحين
وشكروه وطلع ، بعد ساعه طلعت ايناس من العمليات وجت تمارا بابتسامه وهي تدف سرير متوسطه ملاك وتقدمت فيه عند اليأس بابتسامة:مبروك ولد
وتعالت غطاريف وصراخ البنات ومباركة الرجال ، شاله بابتسامه ووقف امام ابوه وعمه وجده ، ابتسم سلطان من شاف نظراتهم له بمعنى -اذن انت- وشال اول حفيد من بكره واذن فيه بحُب ، ومن انتهى مده ل الياس بحُب:شسمه
ابتسم الياس وهو يطالع ولده:حاتم
ابتسمو كلهم بحُب من جمال الاسم وبدو يدعون ويباركون له ، لف الياس بقلق من تذكر:ايناس؟ وينها؟
تمارا ابتسمت:نقلنها الغرفه
مشى وحاتم بين يدينه مع تمارا تدله والباقين راحو يبشرون نرجس واللي فوق عشان يخلونهم وحدهم شوي ، دخل اليأس بابتسامة:الف سلامه عليك ومبروك ياكليّ مبروك يام حاتم
ابتسمت بتعب:مبروك حبيبي
ابتسم وجلس على السرير وحاتم بين احضانه وقبل ايناس بكُل حُب ودمع وهو ساند جبينه على جبينها:اشكر الله على عظيم عطاياه واحمده لانه حفظكم لي ونور دنيتي بجيت حاتم بصحه وسلامه الحمدلله يارب
ابتسمت بتعب ومسحت دموعه:تعورني وتعور قلبي بدموعك الحمدلله
ابتسم:نرجس افاقت
ابتسمت براحه:الحمدلله يارب الحمدلله ارفع سريري شوي
ورفعه لها بابتسامة وحط حاتم بين يدينها ودمعت بحُب:الياسي!
ابتسم ودمع معها من حجم المشاعر الهائل ومسح دموعها وقبل عيونها:اعرف ياكليّ اعرف
ابتسمت ومسحت دموعه بيدها:مارضى احد يشوف دموعك تغسل ؟
ابتسم وقبل يدها:سميّ
وفعلًا غسل وجهه ورجع مسحه وجلس:ها سميّ ارضيناتس؟
ابتسمت بحُب ومسكت يده وتناست تعبها:ماحب احد يشوفك متضايق او زعلان ولا احب احد يشوف دموعك تمام ياكليّ؟ اذا تضايقت تعال ليّ ، واذا زعلت تعال ليّ حتى لو انا مزعلتك تعال ليّ واشك مني ، اذا ودّك تبكي تعال صدري وحضني موجودين لك دايم وكتفي قبلهم مو يعني رجال ماتبكي لا تعال ابكي عندي وارتاح وبرا لاتبين لأحد شي مارضى اشوفك ضايق والناس تشوف ضيقك
ابتسم بحُب كبير يكنه لها:احبك ياكليّ ومليّ أحبّك مثل حب الشمامره لحايل واحبّك مثل حبّ العنوز للدحه!
ابتسمت:عرفت ليه مختار حاتم
ضحك:تلوميني بحب حايل؟
ابتسمت:كيف الومك تحب ديارك؟
ابتسم بحُب ولفو للباب اللي انطق وانفتح ، ميلا ميلت شفايفها بابتسامة:آآخ ياقلبي ااخ ياقلبي!!!
سُندس مثلت انها تطيح وحطت يدها على قلبها:اح حلو !
وانهارو كلهم ضحك عليهم وبدو يباركون ويتحمدون لايناس بالسلامه ، ابتسم ابراهيم براحه:اسمع ياسلطان عشر ليال عشانا وغدانا ذبايح لسلامه بنياتي وولدي
ابتسم سلطان:سم
سُندس سوت كذا باصابعها[🤏🏻]:شف جدو لو تقلل كذا بس شوي بسسس شووووووي
ليلاس:ايه ايه اوافقها الرئي
ضحك:ليه؟
سُندس:تخيل عاد عشر ايام كلها لحم!!! والله لوني وشو!
ليلاس:ياخي مو  حلو وانتهينا
ضحكو الموجودين ، ضحك ابراهيم:المطبخ موجود
هتَان:وعطاكم وحده!
ليلاس تكتفت:هين هين ياولد متعب الايام بيننا تشوف!
سُندس شمقت:انت اوت من حياتي مو جدو
وانهارو ضحك كلهم عليهم ، دخلت ألونَا بابتسامه ومعها بوكيه كبير ورد وفِراس معه اكياس هدايا وباركو لهم وجلسو ، ايناس بابتسامة :لولو !
ابتسمت وشالت حاتم:الحين انت يالنتفه اللي كنت مخرب طلعاتنا وسهراتنا؟ شسوي فيك!
سُندس وهي واقفه جنبها:ابي افعص وجهه وجهه حق فعص ياخي!
ميلا حطت كفها فوق وجهه:ودلبوس كبر يدي قابل للاكل؟
ايناس باستعباط:اي اي وله مده انتهاء بعد شتبين ؟
وانهارو ضحك على تسليكها ، ضحكت وعد وشالته بحضنها:خلو حفيدي بس!
الونَا بلعانه:شفتيي صرتي عجوز وجده!
ميلا بلعانه:اي اصبغي الشيب اللي بشعرك افضل افضل
سُندس بلعانه:بعطيك ماسك يخفي التجاعيد وقت المانسبات سويه
تمارا بلعانه:ومني لك مرهم عضلات مجاني وش تبين بعد ؟
وانهارو كلهم ضحك ، شهقت وعد بصدمه:ايا اللي ماني بقايله هين هييييييين!
انهَار ضحكت وكملت ووقفت خذت حاتم:يحول اجلسي اجلسي اكيد ظهرتس يوجعتس
اصايل علت صوتها:تسمعيينا؟
وانهارو كلهم ضحك ، جلست وعد وهي تضحك بصدمه:اصبرو مردكم ليّ وهيّن اخليكم تعضون اصابع الندم وجبه لذيذه!
ضحكت اصايل ومسكت يدها:شفتي التجاعيد؟
قرصت اذنها:اوريتس اصبري علي
وانهارو كلهم ضحك وازداد ضحك الرجال، وطلعو يتركونهم براحتهم وراحو عند نرجس ولقو الاطباء عندها وجلسو بصمت ، نرجس:طيب متى اطلع؟
الدكتور1:تقريبًا هاليومين لين مانتاكد ان النزيف مابيرجع مره ثانيه بس حابين نتاكد من شي ثاني
نرجس:الي هو؟
الدكتوره:يدينك تثقل عليك ولاتقدرين وتواجهين صعوبه باستقامة ظهرك رجولك؟ تحسين فيها؟
نرجس:مادري عادي
رفعت البطانيه من عند رجالها بس ، الدكتور وهو يضغط بابره خفيفه بباطن الرجال طالعها:تحسين
نرجس:بايش؟
رفع الابره وهو يضغط بشويش على رجلها من الامام:الابره تحسين فيها؟
نرجس بدت تتوتر وتلعثمت:لا ماحس بالابره
خافو كلهم وارتعبو ، نرجس حاولت تحرك رجولها وتوترت بتلعثم:ليه ماقدر احرك رجولي ! انتو مثبتينها ولا بنج؟ ليه ماقدر احركها تكلمو!
بتال توتر معها ومسك رجلها يرفعها بشويش:للحين نرجس ماتحسين؟
نرجس بدت تتوتر اكثر وتلعثمت:لا بتال ماحس فيها ليش!!
الدكتور1:بعد تقارير واشعاتك صار معك شلل ناتج عن النزيف اللي تعرضتي له
انصدمت وجلست تطالع رجولها ووليد وكلهم ارتعبو زود وزود من شافو نظرات الضياع اللي فيها مابينها وبين ولدها ، الدكتور1:وضع يتشكل نتيجه تسرب الدم الى دماغك من شرايين الدم اللي فيه
نرجس برعب:مابمشي مره ثانيه!!!-طالعت خالد اللي محاوط اكتافها بخوف-خالد معد بمشي!!
وكان صدرها يعلو ويهبط اثر خوفها ، الدكتوره مسكت يدها:هدي نرجس هدي! شلل مؤقت مالقينا اي نتيجه مو طبيعيه بتحاليلك واشعتك
ابراهيم بخوف:فهموووني!!! تقولون شللل ونزيف دماغي وبعدين مؤقت وبعدين مافي شي مو طبيعي نرجس وش فيها!!
الجراح العام:هد ياعم بعد النزيف الدماغي ممكن تصير سكتات دماغيه نزيفيه مالها اي علاج واضح لنا بس يصير التشافي باساليب معالجه داعمه حنا بنكتب خروجها بكرا ومعكم الدكتور بتال يعرف كل الاساليب الداعمه جميعًا وبيفيد
سلطان بخوف:كيف تطلعونها؟ مافي علاج واضح!
الجراح العام:بالشلل الناتج عن النزيف مافي وضع يتطلب مستشفى خارج عن العلاج الفيزيائي والتمرين يعني وجودها هنا مابيفيدها بس بيتعبها اكثر والدكتور بتال يطبق العلاج الفيزيائي بالبيت بس اهم شي المعنويّات والنفسيه
الدكتوره:وعندك موعد الاسبوع الجاي نرجس تجين ونشوف هل في تطور او لا
نرجس بضياع تام:متى بمشي!
الدكتور1:نرجس حالتك ووضعك وتحسنك كله متعلق فيك انتِ وبيدك انتِ اذا ساعدتينا وساعدتي نفسك ونفسيتك باذن الله باقرب وقت بتمشين بس مثل ماقلنا موعدك الاسبوع الجاي تجين ضرورري
وطلعو، وليد بكى:كيف يعني ماما مابتمشي!
وسكتو بصمت ماهم عارفين كيف يفهمونه ، انحنت تمارا عنده بحنيه:لا بتمشي بس لازم تسوي تحدي تعرف ايش هو؟
سكتو بابتسامة من بدت تقنعه ، وليد هدا بكي:ايش التحدي؟
تمارا بابتسامه وحنيه:يعني اممم ماما تسوي رياضه اوكيه؟ وتقول انت لها اذا سويتي رياضه صح بعطيك جائزه
رفع اكتافه بعدم معرفه:ايش الجائزه؟
ابتسمت وهمست باذنه:انت تحضنها وتجيب لها ورده من حق الورد اللي بالبيت تمام؟ روح احضنها وقول انا احبك وبكون معك
قبل خد تمارا وراح طالع وليد الكبير:ارفعني
ابتسم وليد وشاله نزله على السرير ، ابتسم ببراءه وحضنها وباس خدها وسند راسها على كتفها:انا احبك مررره وبكون معك دايم بس لاتتضايقين بليز!
ابتسمو كلهم بلُطف على براءته ، طالعت وليد الكبير وفهمها ومسك يدينها حطهم على ظهر وليد ، ابتسم وليد الصغير ببراءه وطالعها:شفتي انتِ قويه قدرتي تحركين يدينك وبالبيت بنسوي رياضه كثير كثير كثير
وقبل خدها ونرجس كانت مُبتسمه بحُب وامتنان وتدعي له بداخلها ودها تبكي ودها تحضنه بس خانتها مشاعرها وحبست دموعها ، ابتسم سلطان وشال وليد الصغير ينقزه:شرايك نروح ملاهي بعدين نرجع البيت وتوريني ايش اعطوك المدرسه؟
وليد بضيق:ابي اوري ماما ماتجي معنا!
ابتسمت تمارا وقرصت خده:ماما سوبر ماما بتساعد الاطفال والدكتوره هنا تدري ليه؟
وليد ببراءه:ليه؟
تمارا ميلت شفايفها بتمثيل:عليّ دوام وبزهق ابغا اسولف معها وتساعدني نساعد الناس وانت بتروح البيت وبكرا تجي مره ثانيه وبرضو بترجع البيت وماما معك
وليد بابتسامه:حقيقي؟
ابتسم سلطان:حقيقي
وليد بحماس لوح لنرجس بالوداع:باي ماما بجي بكرا وبقرا اذكري واصلي مع جدو وخالو وليد واجيك اوكيه؟
ابتسمت بخفوت:اوكيه
وطلعو لانه انتهى وقت الزياره وحمد دق على خالد وقال له يجي هؤ وإبراهيم وعياله ، وقف ابراهيم امامه:هلا شبغيت؟
حمد:تعال لحيلك
وابعدو العيال احترمًا وتقديرًا لهم ، حمد بصوت خافت:عبدالعزيز وعى واول من سال عنه نرجس علمناه باللي حصل وكذبنا ويوم وراه هاشم الاوراق انها معادها على ذمته انهار وماهدى الا بابره ، ابراهيم لو رجع عبدالعزيز وكلم نرجس ورجعها ترضى؟
ابراهيم:طبعًا لا
حمد:ادري ولدي غلطان وحيل بس لاهو ولانرجس ولاحدً منهم كان واعيًا على نفسه بهاك الوقت
ابراهيم طق بعصاه:وكرامت بنتي تعز علي واهم من ذا كله ولو مارفضت انا نرجس بترفض
حمد حط يده فوق يد ابراهيم:ننسحب من بيناتهم؟ وخلهم خله يحاول يبرّر ويعتذر
ابراهيم تنهد:حمد بنتي واعرفها زين واكثر منكم جميع وتهقاها لو وافقت ترجع تحسبها بترجع عشان عبدالعزيز ولاعشانها تبيه وتحبه وتعزه؟ صدقني لا اذا بترجع عشان ولدها اللي كل يوم تزود اسئلته عنه وخلصت أعذارها ولا ودها يدري وهو صغير مو فاهمً شي تحسب لو رجعت بتعطيه حقوقه الشرعيه كامله؟ بنتي واعرفها زين بتسقطها كلها عنه وتقوّلها للشيخ وتكتبها بالعقد بنتي ادري بها
حمد تنهد:طيب يمكنه مقدر ومكتوب ويمكن مكتوب يرجعون لبعضهم ولولدهم وش يدريك؟ يمكن نرجس تحن مع الايام وتنسى اللي صار وننساه حنا عشانها؟
ابراهيم:مالي دخل ولاني غاصبها عليه وان تمادا ياحمد انا اللي بكسر راسه ماعادها على ذمته!
حمد:يبي يرجعها طيب!
ابراهيم :اذا وافقت هي رجعت ماعده طلاق لفظ مطلقين قانون وشرع
حمد:وجاهزين بالمهر والعرس الجديد وكلشين تامر فيه نرجس تبشر ، قلبي متقطع على ولدي وبنت اخوي! ماشفته انت يابراهيم لو شفته تقول انت اللي بقتنعها ترجع ماهدا الا بمخدر ومهدى بجرعه عاليه عشان يهدى لفتره اطول
ابراهيم:اللي كاتبه ربي بيصير-نادا خالد وجا-عبدالعزيز كم طلقه طلق؟
خالد:ثنتين
لف ابراهيم لحمد:هي فرصه وبس وان رضت نرجس وان تمادا انا اللي بهد حيله قبل لايهدونه اخوانها سامع!
حمد:ماهو بمتمادي صدقني بس عطه مجاله
لف ابراهيم لخالد واختصر له وقال له يعلمهم كلهم ولاحدً يتدخل بهالموضوع سوا من البنات ولا العيال ونفذو كلامه ولا اعترضو ، بعد مرور يومين طلعت نرجس بكرسي متحرك ومعها مُساند الظهر وايضًا عصى الارتكاز عشان تمشي ، وصلو البيت ابتسم بتال ووهو توه انهى جهاز السير للعلاج الفيزيائي:جيتكم بالوقت الصح ها نرجسيتنا فيك حيل نبدا من الان؟
ابتسمت بخفوت وهي تشوفهم كيف يدارونها:اي
وفعلًا تقدم وليد وسندها عليه عشان يتثبت مُساند الظهر وركبه وهي كانت واقفه مُتكه على الحديده وتوازنها مو مره ، تقدم بتال ومسك معصمها:ثبتي يدينك عند كوعي
وفعلًا ثبتتها:احس بنار برجولي
بتال يحاول خطوه خطوه ببُطىء شديد يمشي:عادي عشان لك فتره مامشيتي عدل الحين وقفي
وقفت ورجولها ترجف وكانت بتطيح بس مسكها بتال، ابراهيم وقف بخوف:انتبه!
نرجس:مو هو رجولي تحرقني
بتال من وصل للنهائيه جلسها بشويش على الكرسي:الحين في تمرين عشان تساعدين نفسك وظهرك يتعالج اسرع واسرع ورجولك تتحرك من نفسها بس شمس شوي خلي بعد المغرب عشان مافي شمس والمويا شوي بارده -اشر على مكان جنب المسبح-شوفي بتجلسين هناك وبمرن رجولك بالمويا بس تغطسين رجولك عشان المويا تتحرك وتحركها معها لين ماتبدين تحسين فيها شوي شوي
نرجس:وظهري؟
بتال:الحين لابسه المُساند وخلاص تمام خليك عليه بس لازم تحاولين تفردين ظهرك
نرجس:تمام
ودفها جلسها عندهم ، تُقى بقلق:لمتى بتكون كذا؟
بتال:على حسب التمارين كل ماكنت اكثر ووقت اكثر رجعت تمشي بأسرع وقت
تُقى مسحت على ظهرها بحنيه:قريب قريب بأذن الله
ابراهيم:فيكم شده اسوي العشاء بكرا؟
تُقى:لوش؟
ابراهيم:لسلامه بنياتي وحفيدي
نرجس بتعب:مايحتاج بابا
ابتسم ومسح على راسها بحنيه:تعبانه؟
نرجس ماحبت تبين:لا
سُندس ملاحظتها من اول ووقفت تدفها معها بمزح:يالبيه الحين اسحبك بكيفي والعب فيك اصبري بنتقم منك!
وضحكو الموجودين ، وابتسم نرجس وهي حاسه وعارفه انها تنقذها واتجهو لغرفه نرجس وقفلو الباب وساعدتها تمدد ، وجلست قبالها:اعرفك تعبانه
نرجس تنهدت:مابي اوضح لوليد شي
سُندس مسكت يدها:بلغوك؟
نرجس بتفكير وهي تطالع السقف:ايه ومُستحيل ارجع
سُندس:عرفتي انه انهار وحطو له مُهدى ومسكن ومخدر بجرعه عاليه عشان يهدى؟
لفت لها:شالفرق ؟ وش بيفرق فيه الحين ؟ رجعه لعبدالعزيز ماني راجعه ولو اتواصل معه بيكون عشان ننسق اواقات وليد يقابله وبس!
سُندس تنهدت:نرجس اعرف والله انك تحبينه...
نرجس بعصبيه:سُندس برا!
سُندس:ماني مخليتك وحدك!
نرجس بصراخ:سُندس برااا!!!!
سُندس بخوف عليها:خلاص هدي والله بطلع بس لايصير فيك شي تكفين!
وطلعت بسرع وقفلت الباب وتنهدت بضيق وجابت كرسي وايبادها وسمعتها وحطت الكرسي عند باب نرجس وجلست ولبست سماعه وحده عشان تسمع نرجس ، تنهدت نرجس بعصبيه وضيق ورفعت شعرها لفوق تتنفس:ماحبه ماحبه ماحبه ماحبه ماحبه ماحبه ماحبه ماحبه ماحبه ماحبه ماحبه ماحبه ماحبه ماحبه ماحبه ماحبه ماحبه ماحبه ماحبه ماحبه ماحبه ماحبه
كانت سُندس ضايقه وهي تسمع كلامها وصوتها ، حاولت تقوم نرجس وضربت البطانيه بغضب بيدها وهي صايره تقدر تحرك يدينها شوي هالفتره وطاحت يدها على حيلها وجلست تنهمر دموع نرجس بضعف بدون حركه بدون صوت بتعب وصداع وقهر وحرقت قلّب وعصبيه كانت تشوف جوالها يرسل ويرسل ويرسل ويرسل ويرسل ويرسل ولاردت نهائيًا ولازالت دموعها تنهمر ، بعد نص ساعه:سُندس
وفزت فتحت الباب جتها:هلا سميّ
انصدمت من سرعتها:كيف سمعتيني!
ابتسمت بصمت وبان الكرسي اللي ورا نرجس بضيق:قفلي الباب بالمفتاح
وقفلته وجلست عندها بخوف وهي تمسح دموعها:نرجس لاتخوفيني شفيك!
نرجس دمعت بضعف:تعبت
وحضنتها وبدت تبكي وتبكي وتبكي وتلوم نفسها وتسب وتشتم ، بعد ماهدت مسحت دموعها سُندس بحنيه:شرايك تتسبحين واساعدك؟
نرجس بدون تردد:تمام
ابتسمت بحنيه وهي تطلع لبس ونرجس تختار حطت لها البانيو مويته فاتره بس لها بروده شوي ودخلتها بالكرسي للحمام وسمعت طق ، كانو اخوانها واقفين من ساعه ماقفلت سُندس الباب ، عدلت سُندس شكلها واكمامها وطلعت فتحت نص:هلا؟
خالد بضيق:وين نرجس؟
سُندس:تتسبح ليه؟
نَواف بضيق:ضايقه صح؟
سُندس بنكران:لا ليه؟
وليد وهو يحس بقهر:سُندس! سمعناها ترا
سُندس تنهدت:طيب؟
خالد:ليه متضايقه؟
سُندس:والله خصوصيتها معليش
سلطان بتفهم:خلاص اذا خلصت تعالو برا كنسلنا العزيمه بنشوي وعشان تسوي تمرين رجولها
سُندس:تمام
وقفلت الباب من لفو ، سلطان بصوت خافت:خلاص لاتضغطون عليها انتم! احمدو الله طلعت اللي بداخلها خلوها ترتاح دامها ترتاح مع سُندس وتتكلم خلوها متى ماحتجتنا بتقول لنا متاكد!
وليد بقهر وصوت خافت:ابوي كيف رضى وسكت!
خالد تنهد:اول شي كلهم كانو مسحورين والعياذ بالله وانفك والحمدلله موضوع الطلاق والرجعه بيد سُندس للان دامها بالعدّه ثانيًا ابوي ادرا وافهم مننا كلنا واكيد ماهو غاصبها على شي
نَواف:ونرجس مو قليله نرجس قويه وبتوقف على حيلها قريب وهي اللي بتردع عبدالعزيز وتندمه صدقوني نرجس مو قليله!
وليد بقهر:قاهرني ياخي قاهرني!!! كيف هانت عليييييه!!!! حتى اتصال رساله مايجي نهائيًاا!
خالد مسح على وجهه:نرجس هددته
طالعوه ، اكمل:هددته تخفي وليد عنه ولايدري ارضه من سماه لو طبت رجله هالبيت
نَواف:قلت لكم ماهي قليله!
سلطان:بس خالد مايصير ابوه ترا!
خالد:ادري هي قايله لي يبي يشوفه يشوفه برا هالبيت ولايطب ولايقرب المكان اللي انا فيه لو بيننا متر واحد نحرته بيدي
سلطان:خلو نرجس لحالها خلوها لحالها خلوها لحالها! ياوادم ماتعرفون نرجس انتم زين!! والله ان تترك هالبيت بكبره وتطلع ولاتدرون هي بخير ولا لا
وليد تنهد:بس قلبي موجعني سلطان عليها!! انت ماتشوف كيف تتحاشى اسئله وليد وكل مره عذر وعذر وتقول ادري لو شافه بس بيبكي يبيه
وجلسو بالمشب:ادري ولا لنا حق نمنع الولد من ابوه خلاص عاد اتركوهم يرجعون لبعض مايرجعون اتركوهم!
لفو العيال ، فِراس:اذا تقصدون نرجس انسو ترجع لعبدالعزيز
لف عليه نَواف:وليه؟
الياس:مستوعبين شتقولون السموحه بس مستوعبين انتم؟
بتال تكى:نرجس كل شي ولا كبرياءها وغرورها وكرامتها ماتتنازل عنهم لو لايًا كان مُستحيل
انس وهو يلعب بلوت:ولنفرض رجعت تحسبونها بترجع رجعه عاديه؟
سهم وهو يلعب بلوت:هاذا وجهي اذا ماخلت عبدالعزيز يركع عندكم يتراجكم تقنعونها
هتَان وهو يلعب بلوت:وبتسكب عليه ولاتعده شين بتسمع لنفسها وولدها وتبون لو رجعت لذمته ترجع لبيتها؟ إذا تحسبون كذا فانتم غلطانين
موج وهو يلعب بلوت:نرجس نرجسيه غرورها اهم شي عندها وكبرياءها اهم واهم
وليد تنهد وهو يصب لهم شاهي:ماخطيتو لاكن ماندري عن الايام نرجس تسوي اي شي عشان وليد!
سلطان اخذ البياله:لا تنسى انها وافقت عشان ابوي وعمي مؤكد اذا رضت ترجع بتحط شروط اول وجديد وتسقط كل حقوقه عنها وتجلس هنا صدقني
خالد وهو ياكل مكسرات:ماراح ترجع له نرجس اللي يخبرها
عند سُندس ونرجس ، نرجس دمعت:سُندس تعبانه جد تعبانه
سُندس بضيق وهي تحط لشعرها بلسم:مالومك مالومك ادري تحبينه وتعزينه وجدًا وادري اذا بترجعين عشان وليد وبس انا متاكد وبشكل كبير!
نرجس وهي تطالع الجدار:اذا برجع عشان وليد وبكتب بالعقد اني اسقط جميع حقوقه عني واني برجع عشان ولدي وبس
سُندس انصدمت:احس فكري؟ حقوقه
نرجس:معد يهمني سُندس معد يهمّني يبغاني ارجع لذمته يوعدني مايلمسني ولايقرب مني وانه راضي عشان رضى ربي عليّ
سُندس وهي تشطف شعر نرجس بالمويا:طيب لو وليد قال ابغا اخو؟
نرجس:مو هامني يكبر وحيد وخلاص كلنا معه ويكفي اني افكر اذا قال خل نرجع عشانه وبس بس مستحيل ارجع رجعه هينه والله لاوجع قلبه واخليه يبكي دم والله لاندمه على كل شي تسبب فيه والله لاخليه يركع عند رجولي يطالبني ارضى عليه واسامحه
سُندس تنهدت:نرجس فكري برضو برضى ربي عليك كلنا نعرف انك اذا رديتيه الملائكه بتغضب عليك وطاعته مقدمه على ابوك وامك
نرجس:بقول له تبيني ارجع لك ماتقرب مني ولاتفتح معي الموضوع نهائيًا وان فتحته بخلعك واتزوج غيرك
سُندس:طيب ليه مايحول ويجي يكلمك؟
نرجس:هددته
سُندس باستغراب:بوش؟
نرجس:اخفي وليد ولايدري وين ارضه من سماه
انصدمت:نرجس مايصير نرجس حرام! ابوه! قطع صله الارحام مايجوز
نرجس تنهدت:ادري. هددته انه اذا طب البيت اخفيه وكله اساسا كلام ماقدر احرم ولد من ابوه بس اذا يبي يشوفه خلود يوديه له برا
وسمعو جوالها يدق وجابته سُندس:ابو وليد
نرجس تنهدت:افتحي سبيكر
وفتحت سبيكر، عبدالعزيز بملامح مهلوكه:نرجس كلميني تكفين بس ابي اسمع صوتك! طمنيني عنك نرجس وربي لايلي ليل ولانهاري نهار ردي علي
نرجس برسميه:هلا ابو وليد شبغيت؟
عبدالعزيز دمع بندم:انا عبدالعزيز نرجس! عزيزك! نرجس ابي أرجعك تكفين والله ماقدر لابدونك ولابدون وليد تكفين والله مادري عن نفسي كاني نايم نرجس كاني نايم !!! احس بالالم بس مدري وش قاعد يصيييييير! نرجس انقلب حالي ! لي اسبوع من شيخ لشيخ من دكتور لدكتور ابي حل لعلتي بس حلها الوحيد انتِ وجيتك! نرجس انتِ طبي ودواي نرجس سبيني اشتميني اضربيني انحريني لو ودّك بس لاتكتمين شي بقلبك تكفين طالبك انا اعرفك زين واعرف قلبك؟
نرجس ببهدوء:شبغيت لاتنسى ماني على ذمتك !
عبدالعزيز بندم صرخ:ادري الله يلعني ادري الله يلعنننننني!!!
دخلت كِناز بخوف وصرخت وهي تاخذ الفازه منه:صاااااحي عبدالعزيز بتقتتتتتل نفسك!!!!! صاحي انت!؟!!!
جمدت ملامح نرجس وسُندس بدهشه ، كِناز بخوف:نرجس اغماء عليه اذا صحى يكلمك-وصرخت-هااااااااشم يببببببه هااااااااشم!
وقفلت نرجس الخط،سُندس تنهدت:ليه قفلتي؟
نرجس:سوسو اذا خلصتي شعري ابغا اطلع
سُندس:يدينك؟رجولك؟
نرجس طالعته بابتسامة:تسوينهم ليّ؟
ابتسمت بحُب وحنيه:انا كليّ فداك! تستعملي شفره ولا جهاز؟
ابتسمت نرجس:جهاز
ابتسمت وساعدتها تطلع وساعتدها تلبس ولبست قميص لونه اسود فيه فيونكات من تحت ومن اطراف الاكمام وكان نص كم وفي زي الزبركشه من عند الكتف لين الصدر وامام الصدر فيه فيونكه صغيره بيضاء والباقي بيبي بينك وجلستها على السرير وحطت منشفه تحت رجولها ، نرجس بدون شعور:شوي شوي سوسو
طالعتها بفرحه:لحظه نرجس حسييييتي!!!!
أبتسمت بادراك:عييدي!
وفعلًا بس مررت الجهاز ، نرجس ضحكت براحه :سوسو!!!!
ابتسمت بحُب:اصبري اخلص ونجرب تمشين
ابتسمت وتنهدت براحه وجلسو يسولوفن لين خلصت سُندس من نرجس وحاولت تمشي لاكن مع الاسف ماقدرت ، نرجس بضيق ابتسمت:يالله عادي حبه حبه
ابتسمت وجلستها على الكرسي وسوت شعرها ظفيرتين من الجُزء العلوي للنص وخلت الباقي مفتوح مكسر وذي طبيعه شعرها وطلعو ، ابتسم ابراهيم:جت شيختكم!
ابتسمت بخفوت وحُب ، بتال طالعها بابتسامة:الحين؟ عشان المويا ماتكون حيل بارده
ابتسمت :تمام
وفعلًا راحت وايضًا راحت سُندس معها تساعدها ، وجلست ونزل بتال للمسبح وهو يحاول يحرك رجولها على شكل سيكل بشكل خفيف ويمرنها ، ابتسمت نرجس وهي تطالعهم كيف يدارونها ويهتمون فيها:بتال
ابتسم وهو يحرك رجلها:سميّ ياعيون بتال
ابتسمت:تدري حسيت برجلي
ابتسم بواسع ثغره:اسااااالك بالله!
ابتسمت بتصريف:جلست سُندس على السرير والسماعه كانت فوق رجلي وحسيت فيها
ابتسم براحه:يالله الحمدلله يااارب كلها كم يوم باذن الله قبل العده تخلصين-وطالعها وهو يدلك رجلها بحنيه-ماتفكرين ترجعين لعزوز؟
كانت متكيه بيدينها تطالع ضرب المويا وحركته من الهواء:لا اذا برجع برجع لوليد وبس برجع كا أُم وبس مابرجع كا زوجه ولا برجع نرجس القديمه ومكاني ومحليّ واستقراري هنا وبسس واذا اصر وليد رحنا ننام هناك ليله ونرجع وبسس
بتال وهو يطالع عيونها بصوت خافت:بس عيونك تقول عكس كذا؟
نرجس طالعته:كيف عكس كذا؟
بتال بصوت خافت:اشوف حُبك نرجس حُبك واضح وجدًا بعيونك ودقات قلبك فاضحتك من جبت طاريه ترا هنا بعد مكان النبض-واشر فوق لوزه قدمها-نرجس واضح والله واضح حتى هالتك واضحه نرجس ذبول عيونك واضح حُبك وخوفك له واضح ترا اغمى عليه قبل شوي وبالطوارى مر بانهيار عصبي ووصفو له دكتور نفسي تدرين وش قال؟ قال طبي ودواي نرجس جيبوها ليّ ابي نرجس وبس واذا مو مصدقتني هاشم ولوفه مصورينه بالقروب ندري ماتفتحينه ولاتشوفين فيه ولاشي عشانه موجود فيه بس نرجس حُبك طالع عليك اوكيه اتفهمك واتفهم اخفاءك حُبك كبريائك وشموخك وعزتك وكرامتك مايهونون عليك ادري والله يلوم اللي يلومك بس ولا احد فيكم كان واعي نرجس كلنا كنا ملاحظين من وقت ماقال كنسل السفره ملاحظين وسكتنا ماحبينا نتدخل لانه يخصكم نرجس ادري ماتحبين احد يعرف وش بداخلك بس انا اعرفك زين نرجس! اعرفك وزين زين لدرجه تنصدمين من عرفي لك بس واضح مو ليّ انا وبس لا للكُل حتى يبه ابراهيم انسحب من بينكم وقال له فرصه وانا ماني متدخل بس انا قادر اني اشوف حُبك خوفك قلقلك كل ذا اشوفه واشوف كبريائك وعزتك وشموخك وكرامتك بعد كيف مكسورين بس تقدرين ترجعينهم لو تذلينه بس ارجعي له نرجس اريح لك وله ولولدكم ضناكم لاتشتتونه
سكتت بحيره وهي تطالع الموج ونطقت بهدوء وصوت خافت:مقدر بتال
بتال بتفهم:ايش بالضبط ماتقدرين ؟
نرجس وهي تطالع يدينها:ماقدر ارجع وكان لم يكن شي ماقدر اتجاهل واتنسى وارجع ماقدر حتى لو عشان وليد هالتنازل شايلته من بالي لاني ماقدر ماقدر ارجع لشخص اختار غيري وبالحرام لو بالحلال أهوّن بتاال أهون بكثير!! لاكن كلامه للان يدور ببالي ولاهو قادر يروح تزعيقه وتلفظه للان مو قادر يروح من بالي ونظارته مانسيتها بذاك الوقت كيف يناظرني كاني الد اعداءه مانسيتها بتال مانسيتها واللي شفته ماقدر انساه بعد! مُستحيل بتال
بتال بتفهم وصوت خافت:وش شفتي؟
نرجس طالعت عيونه:خيانته ليّ مثلًا؟ سبه وشتمه ليّ مثلاًا؟ قذفه وشكه فيني مثلًا؟ نظراته واسلوبه مثلًا؟ بختصار مو عبدالعزيز الاول بتال
بتال تنهد بصوت خافت:طيب فكري نرجس استخيري؟؟ والله مو هاين عليّ اشوفكم كلكم متبهذلين وتعبانين بسبت عيال حرام
طالعته:وش حكمهم؟
بتال بهدوء:قص^اص بعد اسبوع ماتشوفين اهلهم كل شوين هنا وهناك ؟ يبونكم تعفون ويبه ابراهيم ويبه حمد يكرشونهم
سُندس بحنيه مسكت يد نرجس:مثل ماقال بتال ، أستخيري انتِ مُحيره بين امرين وجدًا واضحه حيرتك نرجس
نرجس تنهدت بصوت خافت:خلاص خلوني وحدي!
سُندس:بجلس عندك مابتكلم
ابتسم بتال:خلصنا اليوم اذا صار شي معك باي موضوع بلغيني
ابتسمت بحنيه له وطلع دخل قسمه يبدل ولحقته تمارا ، تكتفت تمارا على الباب وهي تشوفه يطلع لبسه ، ابتسم وقبل خدها:شفيها دلوعتي؟
تمارا بغيره رفعر اصبعها بتهديد:قسم يابتال لو تنزل تيشيرتك قدامهم بلعننننك!!!
تعالات ضحكته وقبلها:تغارين؟
تمارا بنفي وغيره:من قال اغاااار!
بتال آبتسم وغمز:الا تغارين
تكتفت بدلع وهي عاقده حواحبها وصاده:كيفي زوجي وحليلي وحبيبي حراااااام؟
شالها بين يدينه:لا مو حرام-وقبلها-حرام انك تتركيني وحيد
وسعت عيونها بذهول:نزلني ياقليل الادب كريه كريه كريه!
ضحك ونزلها وقبل ارنبه انفها:الوعد اليله ياحلوه
قرص خدها ودخل ياخذ شاور ، طقت رجلها بالارض بداخلها(خير كلتبن احبك واغااااار عليييك)
ضحك وهو بالحمام:عادي قولي الي بتقولينه!
ابتسمت بحُب وكيف انه عارفها:اغار ارتحت؟ اغار زوجي وحبيبي وحليلي مثل ماتغار اغااار وربي يابتال لو طلعت بلعنك اسبح بتيشيرتك عاااادي!!!
طلع وهو ينشف شعره وقبلها وانحنى لمستواها بابتسامة والمنشفه على راسه:سميّ وامري واللي تبينه يصير ودّك بغيره؟
جلست تنشف شعره بابتسامة دلع:لا ياحبيبي
ابتسما وتنهد بحُب وحضنها بقوه:ااخ ياكُبر حبك بقلبي والغرااام اكثر؟
ابتسمت ومسكت دقنه بدلع:يبغى لوه تخفيف شوي
ابتسم وحاوط خصرها:يبغى لوه؟ طلع عرقك؟
تكتفت بدلع:اش بوه عرقي؟
ابتسم وسند جبينه على جبينها:جايب راسي وبقوه واللي تتكلم حاليًا جايبه راسي اوووف-وصفر-حرررريقه بالاحمر
ابتسما ودارت بدلع:حلو؟
ابتسم وشبك يده بيدها:انتِ محليته حظيظه قطعهً ملازمتك يومها كله
تكت على كتفه وهم يمشون بدلع:وانتا ملازم عُمري كلُه!
ابتسم بهمس:أحبّك
ابتسمت بخجل ودلع وصمت ، وطلعو وجلسو برا وجا حمد واهله باستثناء عبدالعزيز ، وقف وليد بعبوس امام حمد:وين بابا
جلسو يسولفون عشان يضيعون الموضوع لاكن ايضًا بيسمعون ردهم ، حمد بحنيه جلسه على ركبته:أمك وش قالت لك؟
وليد مسح دمعته:تقول راح بعيد عشان دوام ومابيجي بس-دمع-انا شفته امس بالمستشفى مع عمه كِناز ليش تكذبون عليّا!
ونزل من حضن حمد وراح داخل ودموعه تصب وكاتم شهقاته ، وقفت سُندس بصمت ودفت كرسي نرجس دخلتها داخل لانها تعرف ومُتيقنه من الي جواتها ، ودخلت الغرفه ولقت وليد حاضن المخده ويدمع بصمت وهدوء غير عادته ، وحضنته:شفيك ياماما؟
كان وليد هادي وجدًا وساكن ومايتحرك ، ارتاعت نرجس وبعدت من حست فيه مايتحرك وحاولت تصحيه:ماما لودي وليد يامي انت طالعني
وكان مايتحرك وهلعت نرجس وهي ترجف وتحركه:وليد!
__________________________
احداث لذيذه جدًا ادعو لي اجيب بالقدرات100😔❤️❤️ ، الاحداث القادمه مؤلمة جدًا اعتذر عِنها واذا صار انفصال موت شي مالي دخل نسيت له كتبتهم اساسًا هههههههههه استرو ما واجهتو تراي انزل لكم بدون لا اعدل واددق بالبارتات اعذروني واسترو ماوجهتو ونبهوني اذا في اخطاء🤣🤣🫣🙏🏻، أعتذارً لـ غيابيّ فسرته بالانستا❤️🌷 وصلو التعليقات40+،أعتذر على التاخير بِـ التنزيل لاكني تعبانه وجدًا مضغوطه هالفتره اعذروني اذا تاخرت ، انتظر ارئكم بِـ حسابي انستا
{len.1o1} سيُصبح التنزيل هُنا فقط ، لاستبيح النقل
والاقتباس ماحلل القراءه بدون تفاعل🌷
قِراءه مُمتعه ، اعتذر اذا وجدتم خطاءً أملائي
الإ لقاءً أخر 🩶🌷