حبال من حرير

الحلقة الثالثه والثلاثين

صلوا على خير البشر
اللهم صل على محمد وآل محمد

#نسرين_الأسدي
#حبال_من_حرير

_______
مهره

كعدت من النوم شفتها الساعه بال١٠ كمت بسرعه وفتت للحمام

كملت وطلعت اخذت موبايلي واتصلت ببارق
تآخر ومارد، فصلته ورجعت اتصلت مرتين ثلاثه ماكو مايرد

دزيتله رساله بسرعه:- رد بسرعه ضروري عوف الشغل شويه

ضليت انتظر فوك الربع ساعه يلا اتصل
رديت:- صباح الخير حبيبي

:- صباح الخير، شنو الموضوع قلقتيني

تجاهلت طريقة كلامه البارده وياي وبلعت غصتي رادفه:- اريد اروح يم البنات ضايجة

سكت شوي بعدين ردف:- لا مهرة ماكو روحه
اني من ارجع من الشغل نروح سوه، لأن صفوان اتصل بيه عنده موضوع وياي من ارجع نروح سوه

عفت كلشي وسألت مستفسرة بنبرة قلقه:- ليش صفوان شيريد منك، اقصد شعنده وياك

:- ما كلي، كال تجي ونحجي، يلا راح اسده هسه عندي شغل، ومثل ماكلت ماكو روحه مو ترحين.

سده واني ضليت متفاجأة وخايفه بنفس الوقت
هو من سالفة ميساء وضاج مني وهسه صفوان.. معقولة راح يكله على سالفة المركز؟!!
لا مستحيل ماراح اخلي لازم احاجي نور بسرعه

اتصلت على نور واني واكفه على اعصابي
:- يلااا رددي، خرررب

انتهى الأتصال وماردت رجعت اتصلت مرة ثانيه
ردت اخيرآ حجيت بسرعه:- هاي وينج نور مو گلبي حيوكف

بس اجالي صوت زينب:- هلا عمه، ماما ماموجوده راحت للسوك هي وامير

:- اااخ، خرب حظي.. صفوان وين؟!

:- بالشغل عمه، ليش محتاجة شيء

:- لا ما محتاجة، بس من ترجع امج كليلها تخابرني بسرعه بدون اي تآخير

ضليت ادور بالغرفه مثل المخبله حاسه راسي راح تنفجر من القلق
شسوي هسه، ياربي ساعدني ماريد بارق يعرف
ماعندي غيره ماريده يعوفني، خايفه ياربي شسوي؟!

دك الموبايل اخذته بسرعه وصحت:- اي نوور

قطوف:- مهرة، هاي اني قطوف يامن ماراح يعوفني

:- وهسه شسويتي، شصار؟!

:- راح اسوي مثل ما گتيلي واوافق لأن بعد ماعندي خيار ثاني، بس ماريدج تعوفيني خليج وياي لأن كلش خايفه من هاي الخطوة

:- لا، لا تخافين اني وياج انتِ بس خلصي موضوع الزواج هسه والباقي سهل ابقي سايريه لحد ما نوصل للي نريده فهمتي علي

:- ماشي راح اسوي، بس اني خايفة يآذيني يامن متغير مهرة، احسه شخص ثاني، حاسه نهايتي راح تصير على ايده