حبال من حرير

الحلقة الواحدة والثلاثين

صلوا على خير البشر
اللهم صل على محمد وآل محمد

#نسرين_الأسدي
#حبال_من_حرير

_______

ريحانه

عاط الشرطي:- اخوك متهم بحيازة المخدرات و ترويجها

مأمون:- بس شنو الدليل انتم متأكدين؟!

:- الدليل عدكم
سحبوا الشرطة حسن للگراج  وهو يدفع بيهم لزمه واحد حيل من رگبته 
وعاط بي:- افتح الدراجة ولك

حسن:- رح افتحهاااا ورح تشوفون ماعندي شيييي

:- تصيح هم احتفظ بصوت رح يفيدك بالمركز

واكفين نباوع من الشباك والرجفه بكل اجسامنا منظر يخوف كل واحد شكبره ومطوقين المكان ولازمين حسن والولد واكفين يمهم مترقبين.. فتشوها زين

وسحبوا منها اكياس صغار بال٢٠ كيس اكثر انصدمنه بلي شفناه وهو هم بينت على ملامحه الصدمة ولا كأنه هو الي مخليهن وصدك جاي يشتغل بيهن

عاط الشرطي:- شفت الدليل جان موجود هنا كل الوقت يلا للمركز

كلبشوا حسن واخذوا سحل للسيارة وهو يردد:- مو الي، والله مو الي، ماعرف شيء عنهن ولا اعرف شلون اجن هنا..

شهگت من ضربو بوكس وسحبو للسياره

التفت للولد وصاح:- مأمون هذول مو الي والله، صدكني مأمون، لا تعوفني مأمووون

اخذوا صعدوا بالسيارة وراحوا بسرعه واحنه مو مستوعبين نزلت دموعي وخليت ايدي على بطني متأذيه، ليش حسن؟  ليش ضيعت نفسك وضيعتنه وياك؟

آدم:- هسه شنسوي مأمون، اكيد مالازم نبقى واكفين هيج خلينه نلكه حل

مأمون:- ماعرف آدم، بعدني مامستوعب الي شفته
حسن مو كال النه هو تايب ليش رجع، ليييش

كريم:- عوف هذا الحجي مأمون ويلا خل نروح ورا مانكدر نعوفه وحده امشييي

مأمون:- لا كريم، انتم ضلوا هنا بس اني وآدم نروح
وها ديربالكم ابوي يدري بشيء سكتوا هسه لحد ما نشوف شراح يصير

ركبوا مأمون وآدم بسيارة آدم وراحوا للمركز بسرعه
واحنه ضلينه نترقب عسى ولعل نسمع اخبار زينه وحسن يرجع وما ينسجن

ضلت عمه صبريه تلطم وتبجي وتردد:- راح الولد، يمه راح يخلص عمره بالسجن، مالحك يشوف جهاله
الله يعينك على هاي البلوه خويه بارق يمه حسن يمه

سمع جدو الصوت وضل يصيح:- صبريه شبيج تنعين شصار ولج، وين راح بارق

مسحن البنات دموعهن وراحت يمامه لعمتي تحاول تسكتها
وروان ركضت لجدو حته تطمنه ما صاير شيء
مانريده ينقهر نخاف عليه وحته لو حجينه اله عباله على ابوي مو حسن