حبال من حرير

الحلقة السادسة

صلو على خير البشر
اللهم صل على محمد وآل محمد

#نسرين_الاسدي
#حبال من حرير

____________

طبل على الطاولة على خفيف مغني وهوا يحرك بحواجبه
::- لا عيني بغيابه شافت النوم
ولا كلبي بجفاه تحمل هموم.

يلوموني بمحبته واحمل اللوم
لوم الناس بيه سهام جتاله..
شيصبر العاشگ

حسن::- يا خاااالة
شبيك تغني اليوم الشيطان نايم براسك
ياسين::- ههههههه مادري
::- كون يجيك مأمون
::- لا دخيلك

::- مايجي تطمن راح وي ددومه
::- شبيك وي ادم تره خوش ولد
::- بس تصف وياه حتى انت اكرهك

::- مادري شكلك والله
كمت من مكاني يلا انا اروح بعد
::- ضل اتغده وياي
::- لا هم يلا الحجية وحدها

كمت جاي امشي اريد اروح بعدني احجي وي حسن ومانحس غير سمعنه صريخ بنيه جاي من بعيد گمنه ثنيناتنه نباوع لمصدر الصوت..

واخخ ياعلي المنظر الشفته كدامي سنين ما انساه ريحانه اي ريحانه والنار عالكه بملابسها وتركض بنص الشارع لا شال لاشي.. رجلي ماضلن يشيلني ماعرف شسوي..

ركض حسن سحب البطانيه من على الحايط وركض بأتجاهها.. لفها عليها وحظنها بقوه ويضرب بيديه يطفي بالنار.. وانا.. انا واكف بعدني بصدمتي...

روان
::- ركضنه بره من سمعنه الصريخ شفنه حسن محتضن وحده لافها ببطانيه..
صاح علينه::- بويه بووويه السياره ريحانه احترگت...

ركض ابوي شغل السياره وحسن شالها مصعدها ليوره وركبت امي وياهم وراحو وانا واكفه ماعرف شسوي ماعرف ياربي شلون صار هيج قبل نص ساعه احنه سوه..

تمشه يوسف لـ ياسين
::- شنو شلون صار هيج؟
::- ماندري كاعدين وسمعنه صريخها وركضلها حسن.
ركب بدراجته وراح.

شوي وصفت سيارة ادم، نزلو منها ومن شافونه بره كاعدين ووجوهنه ماتطمن اجو بسرعه
مأمون::- شنو شبيكم
كمت وانا ابجي واحجي وارجف ماسيطر على روحي
احتظني مأمون لصدره يحاول يهديني حظنته وضليت ابجي
::- ريحانه ريحانه احترگت.. حركوها.. رح تموت..

ادم
::-جانت روان منهاره ماتعرف شتحجي وشتسوي باوع مأمون لـ يوسف بتساؤول
يوسف: كاعدين مانسمع بس الصياح طلعنه لگينه حسن حاضن لبنيه ولافها ببطانية ركضو امي وابوي خذوها

روان::- سندس.. سندس هيه سبب هيه..
مأمون::- يلا كافي لا تبجين ان شاء الله مابيها شي روحو دخلو ليجوه جدو جاي يصيح روحوله.. يوسف روح كعد كريم خلي ينزل يمكم احنه رايحين وراهم.. يلا ادم..

رحنه واتصل مأمون على ابوه واخذ اسم المستشفى.. وصلنه لگينه امي والحجي وحسن وحتى ياسين واكفين بالأنتظار وصوت ريحانه وهيه تصرخ لأن جاي ينظفون الحروق صوتها يزرف الگلب.. خطيه هاي البنيه.. هلكد شافت عذاب وهيه بعمر صغير..