حبال من حرير

الحلقة الرابعة والعشرين

صلوا على خير البشر
اللهم صل على محمد وآل محمد

#نسرين_الأسدي
#حبال_من_حرير

________

روان

ثاني يوم اخذ مأمون نجمه للدكتور يطمن على حالتها وعلى علاجها شلون جاي يمشي، ضليت بالغرفه مادري شسوي ضوجه وين أروح.

طلعت سمعت طگطگه بالمطبخ أستغربت الأعرفه محد بالبيت، من ثولي كبل عبالي حرامي.. وين اكو حرامي يجي من صباحية الله؟

مشيت بخطوات بطيئة و سورة البقرة بصوت القاريء حيدر محسن البزوني ليريح المسامع والقلب ماليه المكان

مديت راسي شفت شخص بس مكفاه الي، لابس تراك شتائي غريب منو هذا !! تحمحمت وصحت:- منو انت وشسوي هنا وشلون دخلت؟

لزمت ربطتي قوي وهو التفتلي، عزاااا هذا شُبر، شكد غبيه روان يعني اذا طالب حوزه يصبح ويمسي بالدشداشه اول وتالي يغيرها..

ابتسم ونزل راسه:- ها خويه

روان:- اوو شُبر اعذرني جنت عبالي بس دشاديش تلبس من شفت تراك عبالي واحد غريب
شكد ثوله لخاطر الله هسه هو سائلج كايلج شي دكيتي سوالفج كلهن.

بدا يرجع الأغراض الي جان يغسل بيهن بالكاونتر:- عادي ما صار شي، الريوگ كامل اكعدي أكلي

نزلت ردن دشداشتي وكعدت وهو كمل لبيده وطلع من الثلاجه أجبان بمواعين خلاهن على الطاولة كدامي.

حبيت اكسر حاجز الصمت ونطقت:- انت تشتغل بالبيت، يعني تنظف وهيج؟

رجع مدري شيسوي يم الطباخ وجاوبني:- اي اكيد بحكم نجمه متكدر انا اكمل كلشي بس كل أسبوع نجيب عاملة تنظف البيت تنظيف عميق

روان:- حلو متستنكف اكو هوايه شباب يعتبرون شغل البيت والمطبخ بس للمرأة ومن واجباتها فقط.

شُبر:- هذول الأشخاص تربو في بيئه ما بينت الهم هل شي غلط من صغرهم او شافو معاملة الآب للأم على هذا الأساس ف أنطبعت بالهم انو المرأة مكانها المطبخ وهذا الشي كلش غلط ومو صحيح..

اكو نساء حاليا تشتغل ومربيه اطفالها أحسن تربيه بوقت بعض الرجال بس بالأسم او عاقين والديهم او ميديرون بالهم على اولادهم او عبالهم الرجوله بكثرة النساء.

تنهدت:- والي يضحكون على البنات يكلولهم احبج ويروح يتزوج غيرها

بسرعة التفتلي عاگد حواجبه بأستغراب، عضيت لساني الوم بروحي شحجيت خرب..

نشف ايديه وتنهد كايل:- اي صح هواي اكو هيج اشباه الرجال لأن ليكسر أنثى بأسم الحب مو رجال هذا، بس يبقى السبب من البنيه بنفس الوقت لأن لازم تكون ذكيه واخر همها تثق بشخص غريب متعرفه بأسم الحب، ليحب يتقدم من الباب.