حبال من حرير

الخاتمة

صلوا على خير البشر
اللهم صل على محمد وآل محمد

#نسرين_الأسدي
#حبال_من_حرير

_______

روان

وصلنه لبيتنه وجان حُسين نايم خليته بغرفته واجيت افرغ الجنط
وشفت اهلي لحد الآن محد اتصل منهم كلش تفاجأت
كلت خل اكمل كلشي واتصل بلكي يردون هالمرة..

كملت تفريغ الجنط الهدايه وحد والملابس الي ينرادلها غسل خليتها بالغساله، كمل شُبر حمامه وگعد بالصاله
رحت اني هم دخلت سبحت غيرت ملابسي واجيت گعدت يمه

ردفت:- ضال بالي يم اهلي مااتصلوا علي شنو معقولة ماشافوا المكالمات

:-حبيبي اكيد مافارغين ومن يشوفون المكالمة راح يتصلون عليج، زين شهله شنو رأيج واحنه منتظرين اتصالهم احجيلج عني شوي، قبل من جنت شبُر القديم مو الحالي

ضحكت:- اكيد جنت مثل مأمون مو؟!

:-لا جنت اسوء منه، مأمون صح مشى بدرب اعوج بس ماسوا مثل ماسويت

:-خوفتني، ليش هو انتَ شمسوي اذا مأمون كل الي سواه وتكول اسوء منه؟!

:-روان، اني بمراهقتي جنت طايش حالي حال الطايشين جان عندي اصدقاء سوء رافقتهم مع الأسف وعلموني هواي شغلات مكسره ابسطها الجكاير واكبرها... البنات

انصدمت وفتحت عيوني مستفسرة:- بنات!! انتَ شُبر مو معقولة

:-اي مع الأسف معقولة.. قبل لا التزم بصلاتي واتقرب من ربي.. من جانت الدنيا اهم شيء، عندي والآخرة آخر همي.. ضعت مشيت بهواي دروب ماجان لازم امشي بيها، بس اكدر اكول الحمدلله رب ضارة نافعه لأن بسبب الي صار قررت اتوب واتوجه لربي

:-جاي احسك كلامك جبير ويخوفني اكثر

:-اني جنت الولد الوحيد على ٥ بنات امي وابوي هواي دللوني انطوني حرية وفلوس بدون حساب ولا مراقبة لهلسبب جنت اسوي كلشي
والاصدقاء الي رافقتهم وصلوني لدروب الحرام
وبعمر ال١٧ خذوني لمكانات بيهن بنات يشتغلن بالآجرة

:-آجرة؟ يعني يشتغلن تكسي مو؟ وين المشكلة عادي واذا بنات يسوقن ويشتغلن تكسي، صح مشايفه بعيني بس اذا شغلة علمود لكمة الحلال مبيها شي

ضحك وردف:- يرحم امك وابوك عمو بارق على هاي التربية، لج انتِ مو معقولة

:-ليش تضحك ترا صدك مابيها شيء يمكن ماعدهن شغل يشتغلن بسيارة

:-حبيبي آجرة مو يعني نفس سايق التكسي يعني بنات مو زينات الولد ينطونهن فلوس حته يسوون شغلات..

روان:- شغلات شنو بس لا لبالي!

اومأ براسه اي، ضربت جبيني:- خرب.. لا شُبر، الله عليك لا كول غيرها شنو هاي صدك تحجي انتَ ماتوقعتها منك والله