حبال من حرير

الحلقة الثانية والثلاثين

صلوا على خير البشر
اللهم صل على محمد وآل محمد

#نسرين_الأسدي
#حبال_من_حرير

_______

ريحانه:-

تحمحمت بسرعه رادفه:- هلا سندس تفضلي

ياسين:- اني اترخص

:- سلملي على حسن وياك

:- ان شاء الله يوصل، عن اذنكم

ضلت تباوع وراه وهي مبتسمه التفتت علي هامستلي:- تحققت امنيتكم مو، على خير خوش راسمه خطه هالمرة

هتفت بسرعه:- انتِ شجاي تحجين؟! ترا مالي خلك العرك والمشاكل الي بيه مكفيني لو تدخلين لو ترحين

ضحكت:- لا ليش اروح، ادخل اكيد ادخل

دخلت سلمت وعمتي والبنات ردن السلام واني گاعده على اعصابي كلش خايفه من جيتها

التفتت لعمتي:- الله يساعدكم ام روان منين تتلگونها الولد بالسجن والنسوان ماخذات حريتهن ع الاخير ليكول فرحانات بلي صار

نسمة:- هذا قضاء وقدر محد اله دخل وشنو تردينهن يسوون يبجن ويلطمن، هو ان شاء الله كم يوم وطالع

:- بس هاي الكم يوم شمدريج شراح يصير بيهن، ولازم تتوقعين الي مسويها منكم وبيكم حته يخلص منه ويحلاله الجو

توترت من كلامها وخفت يمكن هسه تتبله علي ويصدكونها

بس مهره كمزت من يمها ليكول تحسست من كلام سندس
وعاطت بيها:- هيي انتِ شنو هذا التمسلت الي جاي تكولينه؟!
كاعده ببيتنه وتحجين علينه شنو شايفه نفسج ضبي السانج احسن قبل لا اطلعج منه

ضحكت سندس والتفتت عليها:- وشدعوه عليج انتِ انتفضتي هيج، يمكن اني مااقصدج واقصد غيرج
بس هي معروفه الي بعبه طلي يمعمع وانتِ ما شاء الله النهار كله بسيارتج وتفرفرين منو يدري شتسوين ما تسوين

نهضت مهرة وحجت بعصبية:- بعدني لحد الآن متحملتج لأن انتِ ببيتنه بس وروح امي يا سندس اذا ما سكتي هسه وراويتينه عرض اكتافج اطردج

نهضت مبتسمه بأستفزاز وردفت:- مايحتاج راح اروح لأن ما يشرفني اكعد ببيت بي نسوان مثلجن بس مو قبل لا احجي العندي

اجت عمه صبرية جانت بسوك:- خير مجتمعات اليوم لحبايب

سندس:- ان شاء الله كل الخير خيه

صبرية:- ماجنج ناويه على خير ابد

مهره:- اي وصارلها ساعه تحجي علينا ليكول تايهيلها متستحي قليلة ادب

طكتها سندس ضحكها:- والله يامهره سوالفج متنحزر ابد شبيج هلكد خفتي اني اشك لو انتِ وريحانه متفقات لو عندج شغلة ضامتها خايفه اني عارفتها وهلكد منفعله

مهره:- لج انجبي من شنو واخاف منج اني واثقه من نفسي معندي شي

صبرية:- شلون نسوان خوان بَره وحده تكول للثانيه انه ارعن منج