- حَـياتـي من بعَدك ماهِي حيـاه

البـارت الثـلاثَـون:

مهما تطاولَ عنكَ ليلُ صبابتي
‏فأنا إلى فجر المُنى توَّاقُ

‏ما دام لي حُلُمُ اللِّقاءِ فإنَّني
‏أحيا بهِ ، مهما يطولُ فِراقُ

بسـم الله نُـكمل..

لمار قامت تدق الصدر:عندي ولا يهمك
وقامت وراها ليالي:عندي ولا يهمك بعد طبعاً نحتاج سيارتين نحن كثير ماشاءالله

- بيت رايد اللي مخيم عليه الحزن
رجع من الشركة ودخل البيت وهو يشوف ايمان تحط اكل لسامي التفتت له وهي تقول:الحمد لله جيت تكفى حاول في هناي تاكل حاولت فيها ولا تناظر فيني حتى خلها تاكل مايصير اللي تسويه
تنهد بضيق من حالها وقام اخذ الاكل وطلع لها فتح الباب وشافها جالسه وتناظر في الفراغ بهدوء موحش تقدم لها وقال وهو يجلس قدامها ويمسح على شعرها بحنيه:هناي ايمان تقول انك ما اكلتي قومي معي الحين وكلي مايصير اللي تسوينه لو خالتي موجوده ما كانت رضت بحالك
نزلت دمعتها من جاب طاري امها ونزلت راسها وهي تبكي بألم وهي تقول:ما اقدر
وانقطع كلامها بغصه بحلقها ماقدرت تكمل من بكائها ناظر فيها بحزن وقربها وهو يحضنها ويمسح على ظهرها وتركها تبكي وتفرغ اللي داخلها تنهد بضيق من شهقاتها وبعدها عنه وهو يناظر عيونها المليانه دموع: ماعندي شي اقوله ينهي حزنك لانه ما راح ينتهي ولا يختفي بس هذي الآيه دايماً تواسيني وتخفف عني {وَبَشِّرِ الصَّابِرِينَ الَّذِينَ إِذَا أَصَابَتْهُمْ مُصِيبَةٌ قَالُوا إِنَّا لِلَّهِ وَإِنَّا إِلَيْهِ رَاجِعُونَ أُولَئِكَ عَلَيْهِمْ صَلَوَاتٌ مِنْ رَبِّهِمْ وَرَحْمَةٌ وَأُولَئِكَ هُمُ الْمُهْتَدُونَ }
رفعت راسها تناظره حولها دايم ويواسيها دايم وما تركها ويحاول يخفف عنها قربت منه وضمته وقالت ببحه:مدري وش اقول بس شكراً على وجودك جنبي
تنهد وهو يشد عليها ويقول:انا جنبك دايم
ورفع راسه للباب اللي دق وبعدت عنه هناي ودخلت ايمان وهي تقول:هناي مريم جات
هزت راسها بهدوء"وقفت رايد ومريم وايمان معها اثرت فيها مره كلهم وقفوا معها حتى ايمان اللي كانت زعلانه منها نست زعلها ووقفت معها ولا تركتها بأيامها الصعبه"
ناظرت في رايد اللي كان يناظرها سرحانه وشاف خصلتها النازله ورجعها ورا اذنها وهو يقول:بتنزلين؟
زفرت بهدوء وقالت:ايه بنزل
رايد هز راسه بهدوء وقال:تمام انا بنام شوي على صلاة العصر بقوم عماتي اليوم بيجون
هزت راسها وقامت تطلع وتنزل لمريم
—
دخل الغرفه وناظرها نايمه تقدم لها وهو يعدل اللحاف عليها تقدم وهو يبوس جبينها وسرعان ما عقد حواجبه من حرارته ابعد عنها وهو يرفع يده على جبينها يحسه كانت حرارتها مرتفعه انصدم وخاف عليها جلس على ركبه وشال اللحاف عنها وشافها ترجف وتضم يديها تحاول انها تدفى مسح بيده على كتفها الحار وقال:رفيفي
رفيف تحركت بأنزعاج وهي تسحب اللحاف وتغطي نفسها

لكن تكلمت ببحه بعد ما انسحب مره ثانيه وقالت بتعب وهلوسه من الحراره:ماما خليني انام
هادي ابتسم وقال وهو يوقف ويجلسها ويجلس بجنبها شافها متضايقه منه وقال بابتسامة:حبيبي حرارتك مرتفعه انا هادي مو ماما
فتحت عيونها بتعب وتحس مو قادره حتى ترفع راسها وتشوفه ميلت راسها على صدره وهي تقول بهمس مُتقطع:هادي!
هادي أومأ براسه وهو يقول:اي هادي ياعيون هادي
رفيف غمضت عيونها وقالت بتعب:بنام
هادي:بس مو قبل أخفض حرارتك
قام وهو يسدحها على السرير ونزل للمطبخ اخذ صحن دائري وحط فيه مويه مايله للبروده واخذ قطعة قماش واخذ كاس في مويه وطلع للغرفه وتقدم وهو يحط الاغراض اللي جابهم على الكومدينه وصد ناحية الادراج وفتح احد الادراج واخذ حبوب فيفادول وجلس بجنبها وهو يرفعها وهي عاقده حواجبها بضـيق وبـكى ناظرها وقال:معليه بس عشان تنزل الحراره ابيك تاخذين الحبوب بس وارجعي نامي
هزت راسها بالموافـقه واخذت الحبوب وهي تشرب وراهـا المويه ورجعت تنـسدح وشهقت لما حست ببرودة الكماده اللي حطها هادي اللي قال بهـدوء وهو ماسك الكماده:بسم الله عليك
رفعت يدها تبي تشيلها لكن منعـها وقال وهو يمسك يدها وينزلها:اصبري شوي عشان تخف الحراره
نـزلـت دموعـها وهي تقول بصوت بـاكي:ابي امـي
تنهد وقـال يمسح دموعها:طيب بس خلي الحراره تخف واوديك
أن شاء الله
ارتاح لما شافها تغمض عيونها بأستسلام زفر بهدوء وهو يبدل الكمادات كل شوي تأملها شوي ورفع يده لا إرادياً لشعرها وهو يمسح عليه بهدوء وشوي وتنزل يده لبقايـا الدموع وتمسحـها بهدوء تام عشان ما تصحى بعد دقائق معـدوده وقف وهو يرجع كل شي مكانه ويقرب من السرير وينسدح بالجانب الثاني ويقرب منها ويمسك يدها عشان يحس فيها اذا ارتفعت حرارتها
—
- بيت ابو خالد
فتحت باب الغرفه وهي مُصره على قرارها تقدمت لغرفة امها وابوها ودقت الباب ودخلت شافت امها تصلي انتظرتها تخلص ناظرت حولها تضييع وقت والتفتت لامها اللي خلصن وتقدمت لها وهي تقول:امي ابي اقول لك شي!
ناظرتها ام خالد وقالت:تعالي حبيبتي اجلسي وقولي لي
جلست وهي تقول:امي انا مابي اتزوج تكفين كلمي خالتي قولي لها البنت تبي تخلص دراستها وماتفكر في الزواج ابي ارتاح مابي احس بتأنيب ضمير مابي احسسها اني ما ابي ولدها والله سيف طيب وخلوق وكفو دايم يكون موجود في اي مصيبه اطيح فيها مانسيت وقفته معي بس انا مابيه المشكله مو منه مني انا من تجربه مريت فيها وكرهت اعيدها يمه تكفين حاولي تقنعيها ولا تزعل مني ولا ابيها تتحسس مني وتكرهني بس شي مو بيدي والله"نزلت راسها وبكت بقلة حيله"