- حَـياتـي من بعَدك ماهِي حيـاه

البـارت الثـانَي والثّـلاثـون:

كأن أحبابنا غابوا .. تنفَّس وانطفى القنديل .. وتبلَّل بالدمّع منديل .. وخصلات الشعر شابوا .. أظن أحبابنا غابوا

بسـم الله نُـكمل..

لمى هزت راسها بالموافقة وهي مبتسمه والتفتوا كلهم على اللي قالت بحده وناويه الشـر:لا والله انا امها ولا سويت كذا تجين يالدخيلـه تهتمين في بنـتي!
لمى ضمت ساره بخوف منها ناظرتهـا ساره وقالت:لا تخافين حبيبتي انا معـك!
اشواق بّـشر:انتي تحمين بنتي مني؟
ساره بصبر:لو سمحتي بنتك ماتبيك ممكن تطلعين قاعده تضرينها
اشواق تقدمت من لمى وهي تقول بحده:تعالي ياقليلة الادب تضمين خطافة الرجال اللي خطفت ابوك مني!
لمى بكت بخوف وهي تشد على ساره اللي تحاول تمسك اعصابها عشان لا تزيد خوف لمى وقالت بحده:لا تخليني اكرر كلامي اكثر اطلعي لا تشوفين مني شي ما يرضيك ولا يرضيني
اشواق ناظرتها بسخريه:وش عندك تعالي وريني!
ساره ناظرتها والشر يتطاير من عيونها:انتي تعرفين سبب صبري للحين ان كان في راسك حبه نطحنها ان شاء الله بعيد عن لمى اطلعي وبلحقك
دخلت ميهاف مبتسمه وتقول:سوسـ...
انقطع كلامها من شافت الانسانه اللي واقفه وقالت بصدمه:انتي!!
ميهاف بغضب تركت اللي في يدها وهي مو منتبهه للمى وتقدمت وهي تمسك اشواق من زنـدها وتقول بعصبيه:انتي وش جابك ياقليلة الخاتمة يالبجيحه وش تبين
اشواق وهي تضحك بستفزاز:ابي بنتي
صرخت ميهاف بغضب وهي تقول:ماعندك بنت عندنا يالحقيرة
وسكتت على صوت بكاء والتفتت وشافت لمى اللي حاضنتها ساره انفكت يديها من اشواق وهي تركض للمى وهي تقول بندم:عيون عمه انا آسفه حبيبتي
زاد بكاء لمى اللي شدت على ساره وقالت ميهاف بضيق:آسفه لمو ما كنت اقصد
لمى ناظرتها وهي تبكي وتقدمت وضمتها وهي تقول:عمه بعديها عني
ضمتها ميهاف وقالت:لا تخافين حبيبتي بتروح الحين
قامت ساره وقالت بحده وبصوت خافت:تعالي نتفاهم برا
اشواق مشت وهي تضحك بستفزاز وساره وصلت حدهـا استفزتها بشكل مو معقول وقالت وهي تقفل الباب:شوفي يا تطلعين من المستشفى يا ادخلك اي غرفة هنا وربي ما اخلي دواء بهالمستشفى يعالجك!
اشواق وهي مستمره بضحكها:اي وش بتسوين يعني
ساره:تبين تعرفين وش بسوي؟
اشواق بضحكه:اي ابـ.. ما كملت جملتها الا صرخت من ساره اللي سحبتها مع شعرهـا وهي تجرهـا بين الممرات اللي من حسن حظها كانت فاضيه تقريباً ودخلتها احد الغرف وقالت:الحين اعرف اتصرف معك
دفتها على الجدار ومسكتها مع زندهـا وهي تقول:مو من مصلحتك تكسبين شري لاني زي ما اداوي اجرح ومو اي جرح نصيحه مني لك لا تعاديني ولا تلوين ذراعي بـ لمى اللي تكون بنتك مع الاسف
اشواق دفت ساره وهي تقول:بنتي وبكيفي مو عشانك اخذتي زوجي يعني تاخذين بنتي
تقدمت ساره بشر وضربتها كف وهي تقول بعصبيه:طليقك وبنتك اللي خسرتيها من زمان لا تنسين بنتك الحين بنتي ولو شفتك تقربين منها صدقيني بدمرك بيديني
ودفتها بقوه وطلعت وهي تحاول تهدي نفسها والغضب تملكها من كل جهه
ركضت ميهاف لها وكان مشاري معها وشايل لمى ابتسمت وهي تقول:لمو
لمى ناظرتها بدموع وهي تقول:سوسو
فتحت ذراعيها لها وقرب مشاري منها لما شاف لمى فتحت يديها واخذتها ساره وهي تناظر في مشاري اللي يناظرهـا وهو يبي يسألها عن اللي صار ناظرته ساره وهي تطمنه بعيونها وتحضن لمى وهي تقول بابتسامة:عيوني انا وشفيها؟
لمى شدت عليها وهي تقول:مافيني شي
ضحكت ساره وهي تفتح المكتب حقها وتدخل وتقدمت من الكرسي وجلست وهي تتنهد وقالت:لمو حبيبتي لا تخافين هذي ماما ما راح تضربك مره ثانية خلاص؟
لمى:يعني ما تقدر تضربني!
ساره ابتسمت:ايه لان سوسو معك
ضحكت لمى بخفه وهي تسند راسها على صدر ساره وهي تقول:احبك سوسو
توسعت ابتسامة ساره وغمضت عيونها وهي تشد عليها
ناظرت ميهاف ساره بحب وقالت بهمس لمشاري:ياحبي لك بس ياسارونه وياحظك فيها يا اخوي!
توسعت ابتسامة مشاري اللي كان يناظر فيها من عند الباب وقال بهمس لميهاف:ياحظي
ميهاف دخلت وقالت:لموش تعالي نطلع نمشي برا في الحديقة!
لمى وهي للان سانده راسها على ساره وقالت:ابي سوسو
ساره وهي تناظر مشاري اللي يبي يعرف السالفة وقالت وهي تحاوط وجه لمى بحب وتقول:لمو انا بكون هنا روحي مع عمه الحديقة والعبي شوي وتعاليني طيب حبيبتي !
لمى هزت راسها بالموافقة وهي تنزل وتمسك يد ميهاف اللي قالت:اي عشان سوسو ولا عمه ماهمتك
ضحكت ساره بخفه وهي تشوف لمى تحضن عمتها كمحاولة اعتذار منها تنهدت لما قفل الباب وتقدم منها وحاوط وجهها وباس جبينها وبعد وهو يسحب كرسي ويجلس ويقول:اولا شكراً على اللي سويتيه مع لمى وثانياً زوجتي العزيزة ممكن تسمحين لي اعرف وش السالفة؟
تنهدت بضيق وقالت:زوجـ..اقصد طليقتك جات!
مشاري توسعت عيونه بصدمـه وغضب وقال:وين جات هنا!
هزت راسها بـ ايه وقالت بسرعه لما قام:معليك تفاهمنا وطلعت الحين من المستشفى اجلس !
جلس ومسح وجهه وعدل جلسته وناظرهـا بسرعه:سوت لك شي؟
ضحكت وقالت بغرور:انا تسوي لي شي قليلة السنع هذيك والله تخسى
ابتسم على غرورهـا وقال:يالمغروره بس يحق لك الغرور ياحـّرم مشاري
صرفت انظارهـا بخجل على ارجاء المكتب وكمل وهو يقول بجديـة:وش صار بالضبط قولي لي
تنهدت وبدت تقول له اللي صار من دخلت عليها اشواق لين طلعت من الغرفة اللي فيها اشواق
قال بابتسامة:يالبى زوجتي الذيبه
ابتسمت بخفه واخذت قهوتها وقالت بضيق:كله منها قهوتي صارت بارده
سحب كرسيها لجهته وقال:بس كذا اجيب احلى قهوة ياشيخه كل شي الا ضيقتك يا بعـّدي
ابتسمت بخجل من قربه وقالت:لا عادي اصلاً شربت مابي اكثر
ناظر عيونها وقال وهو ينزل نقابها:ابي اشوف وجهك الزين وبعدين اذا كنا لحالنا مابي اشوف النقاب ذا عليك
انحرجت لما نزل نقابها وهو اللي كان ساتر خجلها والحين بان خجلها له وهو عاجبه الوضع قالت بتوتر:مشاري!
مشاري ناظرهـا وهو خاق على خجلها:لبيه
بلعت ريقها وقالت:بعد شوي لحد يدخل ويشوفنا كذا قريبين من بعض
ابتسم وقال:وش فيها زوجتي
نزلت راسهـا وحست انها بتبكي من خجلها
بعد لما حس فيها وقال بابتسامة:خلاص بعتقك لكن لعلمك زواجنا قريب ما تحمل خجلك ذا
رفعت راسها وناظرته وقالت:متى؟
مشاري بروقان:خلال هالشهر ما راح نطول ترا
ساره اللي ما كان عندهـا اي مشكلة سكتت
وقرب منها مشاري وباس خدهـا وطول وبعد شوي وهو يقول:ما ينمل من خدك بس نبي نترقى لمرحلة جديده
زاد خجلها من فهمت قصده ودمعت عيونها من الاحراج وقالت بدون ماتحس:مشاري اطلع
ضحك بقوه وهو لمح دمعه من عيونها وقال:خلاص يا ام دميعه بطلع
وطلع وهي مسكت احد الملفات وهي تهفه عليها من الحراره اللي داهمتهـا