- حَـياتـي من بعَدك ماهِي حيـاه

البَـارت العّـشـرون:

‏- عيونك مثُل الغيم تروي وطن 

بـسم الله نبـدا
-
دخلت الغرفه بصدمه وهي مو قادره تستوعب كمية الحقد والحسد اللي بقلوبهم وش سويت لهم ليش يسون فيني كذا انا ما اذيتهم صبرت عليهم واستقبلتهم هذا جزات صبري وتعبي منهم متحملتهم ومتحمله غثاهم وكذا يردون علي وش اسوي الحين انزل اهاوشهم ولا انتظر يذلفون ولا ايش وش اسوي!!!
قررت انها تنزل وماتبين انها عرفت بعمايلهم بتنتظر الى ان يجي فواز وتقول له وتجيب حل لهالمصيبه

عند عبدالمجيد وريم
عبدالمجيد صحى من النوم اللي كانت غفوه وقلبت نومه عميقه ناظر حوله وماشاف ريم قام وغسل وجهه وتوضى وصلى وبعد م انتهى خرج برا الجناح ونزل وشاف امه وريم ورفيف وابوه جالسين يسولفون عن عمها
ريم بحزن:كلمته قبل شوي وصوته كان تعبان مره
ابو عبدالمجيد عدل جلسته من سمع نبرتها الحزينه قرب منها وهو يحضنها على جنب ويقول:يابنتي الله قادر بأن يشيل الارض كامله ولا يبقى منها شي قادر بأذنه سبحانه بان يشفى عمك
ام عبدالمجيد بحزن:ياحبيبتي باذن الله بيقوم بسلامه ادعي له
رفيف تحسست من هالموضوع وهي ماتحب احد حزين نزلت دموعها بحزن عليها
عبدالمجيد دخل بحزن عليها وقال بمزح يبي يغير جوها:من مزعل زوجتي
رفعوا روسهم عليها وابتسموا له تقدم وهو يجلس جنبها ويحضنها من كفوفها وهو يقول:من مزعلك قولي لي واذا مهددينك اغمزي غمزتين
ابو عبدالمجيد ابتسم وقال:انا م ازعل بنتي مير انت اللي مزعلها
عبدالمجيد:افا بس انا ما ازعل زوجتي ولا يالريم
ريم ابتسمت وقالت:عبدالمجيد مايزعلني
عبدالمجيد ضحك وقال:شفت يبه شفت
وكملت وهي تقول بابتسامه:لاني بصفقه يدري بي
ضحكوا كلهم الا عبدالمجيد اللي كشر وقال:افا بس
ابو عبدالمجيد بمزح:افا بس خابت الهقاوي فيك ياولدي
ام عبدالمجيد بمزح:ماتوقعتها منك ياولدي
رفيف:الصراحه توقعتها منك
ضحكوا على عبدالمجيد اللي قام يلاحقها ومسكها وهي يشقلب بها وعارف انه اكثر شي يخوفها
ام عبدالمجيد:بشويش ياعبدالمجيد لا تحرول بنتي ويتكنسل الزواج
ضحكت ريم بقوه من صدمة رفيف اللي قالت:افا يا يمـ..ولا كملت كلمتها الا وتصارخ من عبدالمجيد اللي شقلب بها دخل عليهم هادي اللي فتحت له الخدامه وقال بشهقه وهو يتصنع العصبيه:اترك زوجتي يالمجرم
عبدالمجيد ضحك وقال:تعال عشان احرولكم اثنينكم وبكره يقولون من زود الحب تزوجو وهم محرولين
هادي:اقول فكها بس بس لا نتعاون ونحرولك احنا مو انت
عبدالمجيد فكها وهو يضحك وتقدم وسلم عليه

وبعد ما سلم عليهم اخذ رفيفه وطلعوا مع بعض دق جواله ورد وقال:هلا والله وينك يالقاطع...لاا..تقوله صادق..لا حول ولا قوة الا بالله..الله يرحمهم يارب ويغفرلهم
رفيف كانت ساكته وهاديه بس لفت لما سمعت كلامه ودق قلبه بقوه من قال الله يرحمهم
هادي  بحزن:الله يرحمهم يارب..زين..ان شاءالله مع السلامه
رفيف بخوف:من مات
هادي:واحد من اخوياي اهله قبل يومين صار لهم حادث وماتوا ماقعد الا اخوه الصغير واخته
رفيف بفجعه:لا اله الا الله
هادي سكت وكمل يسوق اما رفيف نزلت دموعها وهي ماسكه على قلبها تهدي نبضاته اللي تدق بعنف هادي لاحظ هدوئها لف لها واخاف من شكلها وهي ماسكه على قلبها خاف انها انفجعت وقف السياره ولف عليها وهي يقول:رفيف
رفيف ناظرت له وقالت بعبره:ودني لهم
هادي بصدمه:رفيف شفيك
رفيف ببكى:تكفى هادي
هادي فك حزامه وفك المويه واعطها تشرب ندم انه علمها بس ما دري انها بتتأثر لانها سمعت المكالمه
هادي:رفيف اهدي بسم الله عليك شبلاك هذا طريق كلنا ماشين عليه
رفيف ناظرت له بعيون دامعه:هادي
قاطعها وقال:ابشري ياعيون هادي بوديك بس اهدي لا تخوفيني عليك
ضمته بضيق وحزن داهمها من يوم ما شافت حالة ريم اليوم