فل تثلج❄️طور التنزيل❄️

❄️الجزء 2❄️

#الجزء_الثاني (02)
#الفـــصــل_الأول : #لذة_محرمة
#Let_It_Snow ❄️
#🅂🄰🄵🄸🅈🄰_🄽🄰🄶🄰🅃 🔏
#𝓘𝓻𝓲𝓼

هادية : و حتى انا كانبغيك ، (سكتات لوهلة و كملات) و كانبغي مستمعينا الكرام ، شكرا على مباركاتكم و على تهنيئاتكم ، شكرا على كلشي ... شرف ليا تكون عندي عائلة بحالكم ، و كيما عبرتو ليا على محبتكم ما نحتاج نوصيكم تحبو بعضياتكم ،و عتارفو لبعضياتكم ، ما تخليو حتى حاجة فقلبكم ، باش ما يجيش النهار لي تندمو ، (تنهدات بارتياح) و دابا و صل الوقت باش نقول ، وصلنا لنهاية امسيتنا ، ابتداءا من غذا الزميل طارق غادي يطلل عليكم فبرنامج اعترافات هادية ، ابتداءا من السبعة و نص حتى للتسعود و نص ، تواصلو معانا على الرقم ****** نعاود ، ****** كانتسناو اعترافاتكم و كلامكم الزوين .. و طلب اخير .. دعيو معاي بالتسير و التوفيق و من عندي سنة سعيدة مسبقا ! تصبحو على خير

حيدات الكاسك و تبسمات لطارق لي جالس مقابل معاها .. بادلها الابتسامة و فعينيه حزن دفين ..

هادية : تبارك الله عليك
طارق : لهلا يخطيني عليك
هادية : (هزهزات راسها) بالصح ، شكرا على كلشي
طارق : كوليها ... نوصلك ؟
هادية : (نفات براسها) لا لا قال ليا حاتم غادي يجي وراي !
طارق : داكوغ (عنقها خفيف) تهلاي فراسك و الله يكمل عليك بالخير
هادية : (بادلاتو التعنيقة) شكرا ربي يحفظك ليا ... (شافت فيه بترقب) غادي نتقلق منك ايلا ما جيتيش (بغا يهضر و قاطعاتو) فراسي ما عزيزش عليك ديك الأجواء ، و لكن هادية لي غادي تتزوج ، خاصك تشاركها فرحتها
طارق : اوكي يكون خير ...
هادية : (هزات صاكها حطاتو على كتفها) تهلا فراسك
طارق : ان شاء الله ..

خرجات من الاستديو و هي كاتشوف باقات الورد فكل مكان ، كايترسلو ليها بمناسبة زواجها ، نزلات من المصعد و وقفات قدام الباب كاتسنى فيه ، مرة مرة كاتشوف فساعتها و كاتزيد تتلوا فمونطوها حيت البرد ديال بالصح ، منين عيات جبدات التلفون من صاكها و عيطات ليه ، كايصوني حتى كايفصل الخط بوحدو ، عاودات ثاني و ثالت حتى لقطات الخط ..

حاتم : وي هادية ؟
هادية : خلعتيني عليك ! ياك لاباس ؟
حاتم : و والو باس ! اش غادي يكون زعما !
هادية : و ياك قلتي غادي تجي ورايا حيت طموبيلتي كاتصلح ؟
حاتم : همم ، اه ، راني غير واحل فالخدمة ، راك عارفة الكونجي و راس العام حريرة محرحرة ... ما ساليتش
هادية : واخا ، صافي الله يعاونك !
حاتم : امين
هادية : تهلا فراسك
حاتم : بسلامة عليك .

ياله بغات تهضر و هو يقطع الخط فوجهها ، تنهدات متأسفة على حالو ...

طارق : باقي ما مشيتي ؟
هادية : (دارت شافت فيه) حاتم مشغول و هاني غادي ناخد طاكسي
طارق : و صافي غير ياله نوصلك
هادية : دارنا ماشي فطريقك ، ما كاين لاش نعذبك
طارق : (فتح ليها باب السيارة) طلعي و باركة من الهضرة الخاوية
هادية : (تبسمات ليه بهدوء و طلعات) واخا ا سيدي شكرا ..
طارق : عفوا .