فل تثلج❄️طور التنزيل❄️

❄️الجزء 44❄️

#الجزء_44
#الفـــصــل_الثاني : #خريف_العشق 🍂
#Let_It_Snow ❄️
#🅂🄰🄵🄸🅈🄰_🄽🄰🄶🄰🅃 🔏
#𝓘𝓻𝓲𝓼

كاتخدم التمارين لي تعطاو ليها ، هي نوعا ما عندها مشكيل فالعربية و ما يجي لبالها غير يماها لي كانت كاتعاونها فيها، تنهدات و طللات على تلفونها ، دخلات للمحادثة ديالهم تشوف واش وصلوها الميساجات و لا باقي كان باقي غير شرطة وحدة ...

جيلان : بففف ، غبرات بزاف هاد المرة ! كان ضروري زعما يمشيو لجزيرة ما فيها تا الريزو بحال عباد الله ...

و هي كاتهضر مع راسها دغيا تقلبات الشرطة لجوج و تلونو باللون الازرق ، تبسمات و قبلات حتى المكالمة لي كانت واردة ...

جيلان : هااااي !
هند : حبوبتي ... صافا بنوتي ؟
جيلان : صافا الحمدلله و نتي ؟
هند : بيخير اللهم لك الحمد ..
جيلان : و غبرتي عليا هاد المرة ياك لاباس !
هند : عيطت ليك هادي ثلت ايام تقرببا و ما جابوتينيش !
جيلان : (علات عينيها فالسقف كاتفكر) اه، اه عقلت، كنت خارجة، عيطت ليك مني رجعت و ما شدش ... و بقيت كانتسنا ، كملنا خمسطاش اليوم ما هضرناش مع بعضياتنا !
هند : توحشتك ا ماما حتى انا و الله، و راك عارفة هنا ما كاينش الريزو خاصنا نهبطو لسونطر ... وقتما وصلت كانعيط ليك نتي اللولة .
جيلان : (هزهزات راسها) و عرفت ، ديكشي علاش بقيت كانتسناك ! توشحتك بزاف
هند : حتى انا توحشتك، راه جايا خمس اشهر ما شفتك ، ما عنقتك، ما بستك، بزاف عليا انا هاد الفراق، انا فقنت و كبدتي فقنت اخور ...
جيلان : (بنضج) و المرا بلاصتها حدا راجلها ، و هادشي لي كاديري نتي ... انا ما باقيش فيا الحال و متفهمة الوضع و الله
هند : (تنهدات بارتياح) يخلي لي انا العاقلة ديالي !
جيلان : اهم شي عندي هو راحتكم ...
هند : الله يرضي عليك ... (تبسمات) ايوا يا لالا فين خرجتي ! درتي صحابات ! اش فايتني؟ ولفتي المغرب و الجو ؟
جيلان : غزال الجو هنا ، و الناس ديال هنا ، و كلشي هنا زوين ... و ولفت بحال ايلا تزاديت هنا ، و بالنسبة للصحابات ، درت وحيدة ! و هي لي خرجت معاها
هند : مزيان ، كاتقرا معاك ؟
جيلان : لا كبر مني ، ببزاف ..
هند : (عقدات حجبانها مستغربة) و مالك عليه ..
جيلان : حبابة ، ارتاحيت ليها ، و تقريبا كاتفكرني بيك
هند : (بسخرية) زعما باغا تعمري بلاصتي ! ماشي دوينا على هادشي ا جيلان ؟ (قرنات حجبانها) ما غاديش تعمر ، انا ماماك ! و حتى واحد ما يقدر يجي فبلاصتي !
جيلان : (خرجات فيها عينيها) هااء و انا عارفة ، و ما قلتش نعمر بلاصتك! غير كاتفكرني بيك فهضرتها و التعامل ديالها و صافي ..
هند : (تنهدات) همممم خرجتوا بوحدكم ؟
جيلان : توء ، (علات حجبانها) كان معانا حتى بابا
هند : (دارت ليها طن فراسها) هممم و انا نفهم !
جيلان : (تبسمات ببراءة) هههه و صراحة ما كرهتش تكون مراتو ، يشوف معاها حياتو و يديرو وليداتهم ...
هند : همم الله يسهل عليهم
جيلان : و عليكم حتى نتوما ! (بدلات الموضوع) مزال ما غاديش تجيو ، قربتو تكملو العام تماك ... ما سخيتوش ؟
هند : قريب انشاء الله ، الخدمة ديال عمك فؤاد علاين تكمل و غادي ندخلو للمغرب فخطرة حتى حنا و نستقرو تماك ... ما كاين لاش نبقاو ففرنسا !(نطقات بتأكيد) يسالي فؤاد خدمتو و ها حنا معاكم ، باش تجي تسكني معاي
جيلان : (تلاشات ابتسامتها بمجرد ما سمعات كلامها الاخير ، عقدات حجبانها ! و نفات براسها) لا لا ، نتي مع راجلك انا اش دخلني بيناتكم حتى نجي نجلس عندكم !
هند : نعم ! راني ماماك زعما !
جيلان : ماشي وقت هاد الهضرة و لكن منين جبدتي الموضوع نوضح ليك واحد النقطة باش نسدوه ، عمي فؤاد ماشي بابا حتى نجي نجلس فدارو ... هو عزيز عليا و عندو بلاصة فقلبي و لكن ما كانشوفش راسي معاكم مكونين عائلة سعيدة .
هند : (بلعات ريقها) ع علاش ؟ ارون قال شي حاجة ؟
جيلان : اش غادي يقول ؟ واش انا بنت صغيرة مزال يدير ليا شي حد غسيل الدماغ ؟ كانهضر معاك انطلاقا من قناعتي ! اه صغيرة و ما عندي عقل فعينيكم و لكن راكم خمس سنين و نتوما مطلقين و عماين هادي باش تزوجتي ، شوفي شحال داز عليا و كانشوف راسي قادرة ندير استنتاج و لي هو كالاتي : كانتمنى ليك نتي و بابا الخير و ديرو وليداتكم حتى نتوما مع نصفكم الثاني . و لكن انا غادي نبقا حياتي كاملة رجل هنا و رجل لهيه ، ما غادي ننتامى لحتى عائلة من لي غادي تكونو نتوما ، حيت كانت عندي عائلة و تقسمات ، ماما مشات فجيهة و بابا حتى هو (هزات كتافها بمعنى غير مبالية) و عادي فرحانة ليكم و الله ، حسن ما تعيشو معذبين مع بعضياتكم بسبابي ... و لكن صافي انا عائلتي كملات و ما نبغيش نكون متطفلة على شي حد فعلاقتو الجديدة ، انا جالسة مع بابا حيت حقي هذا و حيت عندي سميتو و كنيتو و من الواجب ديالو يرعاني و يهزني .. أما عمي فؤاد فانا غير بنت مرتو و عمرو يشوفتي بنتو ديال بالصح
هند : و حتى باباك ايلا تزوج ما غاديش تكوني بنت مرتو !
جيلان : (هزات كتافها) ما كايهمش ، المهم عايشة فرزق لي جابني لهاد الدنيا ...
هند : (دمعو عينيها) و لكن راه حتى انا عندي الحق فيك
جيلان : و انا ضامناه ليك ، غادي نبقا نجي عندك شي ويكاند .. و لكن الاستقرار لا .. غير نسايه .