فل تثلج❄️طور التنزيل❄️

❄️الجزء 83❄️

#الجزء_83
#الفـــصــل_التالث : #دعيها_تثلج
#Let_It_Snow ❄️
#🅂🄰🄵🄸🅈🄰_🄽🄰🄶🄰🅃 🔏
#𝓘𝓻𝓲𝓼

تحط الغذا و دارو على الطبلة كاملين ، كايهضرو مع بعضياتهم ما خطاها هي و ولدها ساكتين ، هي كاتاكل فصمت و حبيب كايشوف فيها كيفاش ذابلة و مكونة فبلاصتها ، حسها ما تسمعش ، و بقات فيه ... باين عليها مقهورة ...

ريا : الله يعطيكم الصحة الماكلة بنينة ...
ميسان : ماما قاداتها على قبلكم مخصوص ...
ريا : (تبسمات ليها بحرقة) ز زوينة ، الله يعطيك الصحة ...
هاينة : (شافت فيها و تبسمات) بالصحة و الراحة ..
هادية : سمحو لينا عذبناكم معانا ..
ابراهيم : ما كاين لا عذاب لا والو ، نتوما من دابا الفوق من اهل الدار ما كاين لاش هاد الرسميات
هادية : شكرا ..
بهاء : (كايدفع لهادية الماكلة بفرشيطة) كولي .. باركة من العجب ..
هادية : الله يجعل البركة و الله يخلف .. الحمدلله
بهاء : ما كليتي والو !
هادية : تبارك الله ...
ساندية : خالتي الله يعطيك الصحة ، (تبسمات فرحانة) رديتيني للصغر ثاني ... (خدات لقمة من زعلوك) و الله حتى نفس البنة ديال شحال هادي
هاينة: بالصحة و الراحة ا بنتي ...
حبيب : الله يعطيك الصحة ..
عثمان : (شاف فريا)ما كليتي والو !
حبيب : الله يخلف .. تبارك الله عليكم
هاينة : الله يبارك فيك ...

الجو فشكل، مكهرب بيناتهم ، و هوما متشنجين ما قادينش ياخدو راحتهم ، حتى الهضرة باش تخرج من حلقهم كايلقاو فيها صعوبة ... ماشي ساهل يطلقو و هي معاهم و لكن ما كاتمتلهمش كاتمتل ناس اخرين عندهم الحق فيها عليهم ... هادية لي ما كاتحقدش حاقدة ، و ريا لي شعوانة مقصحة ، عينيها عليها مازالوش ، كاتقول شحال من مرة يا ترى شفتها و ما عرفتهاش، واخا كاتشبه ليا... اما حبيب بزاف ديال الاسئلة كايدورو فراسو ، و لكن حتى هو ما باغيش يعرف اجابتهم ... كايفضل يتعاطف معاها من بعيد على انو يجرح القلب لي ضمو و يهرس ختو، هي عمرها قالت لا ما تهضروش معاها و لكن كايفضل ما يكونش ناكر للخير، قدمات بزاف ديال التضحيات على قبلهم، مشات و هو عندو تقريبا ثلت سنين و هادية لي ربات، نعسات، رارات، وكلات، لبسات، صبنات، قرات، ايلا كان شي حد عندو الفضل فهادشي لي هو عليه دابا فأكيد غادي تكون هادية و حتى واحد من غيرها ... و حتى حد ما يقدر يجي فمقامها و لا يستاهل يهرس ختو على قبلو ...

ناضت هاينة تشلل يديها ، و تبعاتها ساندية، تبسمات ليها و خدات الفوطة لي مدات من عندها ...

ساندية : شكرا ...
هاينة : العفو ...
ساندية : الله يعطيك الصحة ، الماكلة كانت بنينة ... و فرحت لي عاودت شفتك بيخير و على خير.
هاينة : (طبطبات على ظهرها) الله يرضي عليك ا بنتي ...
ساندية : (شافت وراها و بلعات ريقها مترددة من الحركة لي هي مقبلة عليها) خ خالتي ... بغيت نسولك ايلا كان ممكن !
هاينة : (بخوف) ياك لاباس ؟
ساندية : (عضات على شفتها) ما مشيتيش بخاطرك ياك ؟ (شافت فيها بترقب)
هاينة : (تبسمات ليها) ساندية بنتي ، (تنهدات مأزمة) انا شفتك ديك النهار ، و نتي شفتي شنو وقع، سكتتي ، قلت عادي من حقك و لكن علاش كاتسوليني بحال ايلا ما فراسك ما يتعاود ؟
ساندية : (نفات براسها) الا ماشي سكت، ما يمكنش انا نشوفك بعيدة على ولادك و ولادك محروقين عليك مستحيل نسكت، الطبيب ديالي قالي بلي الصدمة هي السباب لي خلاتني ننسا، انا عارفة بلي شفت شي حاجة ماشي هي هاديك و لكن شنو هي .... (هزات كتافها) ما عرفتش! و دابا عفاك ايلا ممكن تعاونيني بشي حاجة تقدر ترجع ليا ديك اللقطة لي نسيت غادي نكون
هاينة : (قاطعاتها بلباقة) نتي ناسية ، ايلا قلت ليك اي حاجة تقدري تيقيها ...
ساندية : غير حطيني فالموقف ... شي حاجة تعاوني ... انا عاقلة راسي فقت لقيتهم كايقولو مشيتي. ..
هاينة : (تبسمات و الفرحة غادي تنقز ليها من عينيها، شدات فيديها مزيرة عليهم و نطقات بحماس) زعما بالصح متيقة انا ما مشيتش لخاطري ؟
ساندية : (هزهزات راسها و عينيها دامعين) حاسة ... و عمي الله يرحمو قالي شفتي ، و نتي دابا كاتقولي شفتي ، بقات فشنو شفتي ...
هاينة : فايزة ما قالتش ؟
ساندية : (قرنات حجبانها) ع علاش ! ماما عارفة !
هاينة : كلشي عارف ، ما خطا ولادي ...
ساندية : و شنو وقع ا خالتي .. (شدات فيديها بترجي) عفاك، قوليلي !
هاينة : ما غاديش نقولك حتى تعقلي على خاطرك و لا غا يقولو انا لعبت بذكرياتك ..
ساندية : (زيرات على يديها) غير شي حاجة عفاك !
هاينة : (ما باغاش تطلق من الحبل لي غادي ينقص عليها شحال من حاجة و فنفس الوقت خايفة تقول شي حاجة و ترجع اللومة ليها) فايزة تقدر تقولك ..
ساندية : و كاتوقعي واحد سكت على الحق هاد المدة كاملة غادي يجي دابا يقول شي حاجة ؟
هايمة : معاياش كنتي موالفة تفيقي فصغرك .. ؟
ساندية : السبعة و نص كانمشي نجيب الحليب ...
هاينة : (تبسمات) تماك فين شفتي لي شفتيه ... من غير ما نقدر نزيد حيت كلشي غادي يرجع عليا من بعد ... تفكري على راحتك ...
ساندية : (تنهدات) صافي شكرا ... خالتي فين الحمام عفاك ...
هاينة : تفضلي معاي من هنا