فل تثلج❄️طور التنزيل❄️

❄️الجزء 111❄️

#الجزء_111
#الفـــصــل_التالث : #دعيها_تثلج
#Let_It_Snow ❄️ 
#🅂🄰🄵🄸🅈🄰_🄽🄰🄶🄰🅃 🔏
#𝓘𝓻𝓲𝓼

فبيتها كاتوجد راسها، و كل ما يصوني تلفونها تقطع عليها .... ولفات على تصرفاتها ، وقتما رشقات ليها كاتصوني ... جوج ولا ثلاتة ديال المرات وكاتقطع .. و كيما ما بقاتش كاتشغل راسها بتزنزيتها، ما غاديش تتهول حتى هاد المرة و تجاوبها ...

قدام المرايا واقفة كاتشوف انعكاسها ... قفطان واقف محزماه بمضمة ديال الذهب دايرة لخاطر لهادية عليها لابساه، و شعرها مطلوق على كتافها، هزات العكر من على الكوافوز و دارتو فوق شفايفها .... خلات كلشي خفيف، ايلا ما حققوش فيها مزيان ما يباتش بلي دايرة مايكاب ...

تبسمات و الفرحة ما قاداهاش ، واحد الهدوء و واحد السكينة نزلو عليها بوحدهم، وهي كاتشوف داكشي لي حلمات و تمناتو يتحقق، ها هو خايد كايتحقق ... وان شاء الله حتى حاجة ما غادي توقف عقبة فطريقها وتوقفها .

تندق فالباب و دخلات ريا ..  لابسة كسوة موالمة المناسبة و جامعة شعرها مخلية عنقها يتهوا ...  جلسات فوق الفراش المقابل معاها وضحكات ليها .

ريا : عاحبك الحال ؟
ساندية : (شافت فيها و تبسمات) بزاف ... اصلا كلشي غادي على حسب ݣانتي ... علاش نا غايعحبنيش الحال ؟
ريا : (تنهدات) ماشي باغا نغص عليك فرحتك، ولكن عقلي فرحان و قلبي مغبون..

جلسات حداها و شدات فيديها بكل حنان، بحال ايلا كاتعامل مع بنت صغيرة وماشي وحدة ناضجة ...

ساندية : وعلاش ؟
ريا : فرحانة حيت ارون، وفرحانة حيت نتي فرحانة، غير ما بغيتكش تزوجي بهاد الزربة، (تغرغؤو عينيها) دايرين الزلة و كايطلعو فوق العمارية علاش نتي تزربي و تغبني راسك ... هي ليلة فالعمر ، كانوجدو ليها على حقها و طريقها و كاناخدو وقتنا، ماشي قررنا اليوم و تزوجنا اليوم . فشكل لا ؟
ساندية : (تبسمات و مسحات ليها دمعتها قبل ما تقيس خدها) هي ليلة فالعمر كلها كيفاش كايتخايلها ...

شافت فكسوتها لي معلقة قدامها خداتها ليها هادية فاش خرجو يتقضاو على دوقها ....

ساندية : و انا تخايلت عرسي يكون هاكا ، ما فيهش قوة اللباسي، وما فيهش قوة الناس، كسوة بيضة ديال الحرير خفيفة ، مع شابو، نتوما و راجلي حبيبي لا اقل ولا اكثر.  داكشي علاش ما تغبنيش . هادشي لي انا باغا و لي باغاك تفرحي ليا عليه
ريا : (زيرات على يديها) متأكدة ؟ ماشي زعما مرض عمي لي مخليك تزربي.  
ساندية : ههههه واش كون كان هو كنت غادي نسمح فهادشي اصلا، ما نلبس كسوة ما ندير حفلة ، نتزوج و نزيد مع الطريق، بابا غير كان سبب فانو الامور تمشي بالزربة . و هو الحمدلله بيخير ، مهما انو هضر معاي يعني راه ماشي شي حاجة ݣغاف ولكن كاتبقى خاصني نطمن عليه وبلا والو توحشتو ... داكشي غير اسباب ... و بلا هاد التفسيرات كاملين شفتيني فالخطبة اللولة كي كنت منريفيا حيت حتى حاجة ما كانت غادة بالرغبة ديالي، اما دابا انا مرتاحة و عاحبني الحال . من ورا شنو وقع مع علاء خديت قرار هو ما عمرني نضحي بشي حاجة نفسي فيها على قبل شي حد اخر .