فل تثلج❄️طور التنزيل❄️

❄️الجزء 37❄️

#الجزء_37
#الفـــصــل_الأول : #لذة_محرمة
#Let_It_Snow ❄️
#🅂🄰🄵🄸🅈🄰_🄽🄰🄶🄰🅃 🔏
#𝓘𝓻𝓲𝓼

منسجمة معاهم فالهضرة حتى نقز ايمن ..

ايمن : فقتي التوقعات ديالنا ! ما ظنيتش تكون عندك هاد الخبرة و السلاسة كاملة و الشعبية اكثر ..
هادية : (علات حجبانها و دايرة ابتسامة على شفايفها بالزز ، حسات بحال ايلا نقص من قيمتها) الحمدلله على فضله .
ايمن : ايه بالصح (شاف فساعتو) كلكم لغيو شنو عندكم فالبروغرام هاد النهار و ياله نحتافلو بهادية ..
هادية : (تبسمات) شكرا و لكن غير سمحو ليا ، غا يخصني نمشي عندي شي شغال دابا (شافت فساعتها) حتى راني تعطلت .
ايمن : شنو دابا غادي ترديها ليا فوجهي .
هادية : (باحراج) ما كرهتش و لكن ما نقدرش ، نهار اخر ان شاء الله.
ايمن : واخا الالا ، ها حنا كانتسالوك خرجة على حسابك !
هادية : ان شاء الله ... (لوحات ليهم بيديها) بسلامة عليكم ! و شكرا ليكم !

خرجات و وقفات قدام الباب كادور عينيها فالشارع ياكما تلمحو ، عارفاه قريب منها ، و لكن فين ... منين فقدات الامل و كاع ما لمحاتو ، فتحات سيارتها و طلعات فيها ، دارت السمطة و جبدات تلفونها من الصاك حيدات ليه الوضع الصامت و تفقداتو ياكما يكون رسل ليها شي حاجة و لا عيط و ما سمعاتوش ..

هادية : زعما كون كملتي على خيرك و رسلتي ليا شي حاجة تهز ليا الموود ، و لا والو ،( شافت فانعكاسها لي على المرايا) يا هادية وليتي طماعة بلا قياس و متطلبة اكثر ... و هادشي ما كانش فيك ! (تلاشات ابتسامتها و نطقات بحصرة) عمري تسنيت شي حاجة من شي حد ، عمري فكرت فشي حد ، عمري تزيرت و قلبي تقصح و جاني لبالي شي حد . حتى جا بهاء ! انا عارفة راسي تعلقت بيه و عارفة كانشوفو منقد بالنسبة ليا ، و لكن ...

حطات يديها على قلبها لي تسارعو دقاتو و تبسمات على حالها ، خدودها تزنكو حشمانة غا مع راسها ...

هادية : يمكن هذا هو !

صونا تلفونها و قفزات عليه باش تجاوب ، خاب املها نوعا ما منين لقات ساندية و ماشي هو و واخا هكاك جاوبات رفيقة دربها بكل حماس ...

هادية : و العشيرة كي جيتك !
ساندية : (حنحنات) ناضية ! و حبيتك !
هادية : (عضات على شفتها) يا حليلي .. هاح عليك ... كي جاوك المواضيع
ساندية : (بارتباك) ها ! مم مزيان !
هادية : (علات حجبانها و نطقات ببرود) ما سمعتيش ياك !
ساندية : (حكات قرفادتها و تنهدات) جيت مع اللخر ، خرجت مع ارون و جيلان !
هادية : ايه ا العشرة ، الله يجازيك بيخير
ساندية : (ضحكات) ههههههههه ما يبقاش فيك الحال ، مزال يامات الله قدامنا ارا ما نسمع .
هادية : ايه ، ما علينا ، ما غاديش تجي اليوم ! راه خاصني نعرف كي دازت الخرجة ؟
ساندية : شكون قالك اختي انا ماشي فداركم اصلا ..
هادية : هاح ا قلبي ..
ساندية : و اجي خلاص راني عارضة عليكم اليوم !
هادية : علاش ؟
ساندية : سوقك ! انا عارضة قولي مرحبا و زيدي و نتي ساكتة !
هادية : واخا ، ريا و حبيب كاينين ؟
ساندية : حبيب ها هو حداي و ديك السايبة باقي ما رجعت .
هادية : نجي ما نلقاهاش وايلي وايلي اش غادي ندير ..
ساندية : الله يجيبك على خير ... ها حنا كانتسناوك .
هادية : تمام .