فل تثلج❄️طور التنزيل❄️

❄️الجزء 34❄️

#الجزء_34
#الفـــصــل_الأول : #لذة_محرمة
#Let_It_Snow ❄️
#🅂🄰🄵🄸🅈🄰_🄽🄰🄶🄰🅃 🔏
#𝓘𝓻𝓲𝓼

شاف فيها و عقد حجبانو ، خصوصا منين دمعو عينيها ما عحبوش الحال .. و هي مسحات عينيها بالوربة ما راضياش تبين ليه ضعفها كيفما كادير مع خوتها !

عثمان : و علاش البكا !
ريا : ما بكيييتش ! (حنحنات)! كمل شنو وقع من بعد ؟
عثمان : خوت با مصطفى بغاو حقهم فالورث ، و خرجوني من الدار ما نتسال والو ، عطاوني رزيمتي و خلاوني لا حنين لا رحيم من غير ربي ، نبات عند هذا و هذاك و نخدم فلي كان المهم ندبر قوت نهاري ، كان الصيف ديك الساعة ، ما كانش الوضع صعيب عليا ، و لكن منين وصل شهر تسعود و دخل البرد ضربوني الحيوط ، و خفت نبقا حياتي كاملة متشرد و انا لي كانو عندي احلام و طموحات قداش ، قررت نمشي لشي ملجأ نجلس فيه ديك الست سنين لي عندي على الاقل ناخد غا الباك و نخرج نضبر على راسي ثاني ، حليت رزمتي و لبست حوايجي الجداد ، حطيت يدي فالجيب و انت نلقا تصويرة با و واحد الراجل عمرني شفتو ، رقم التلفون عليها و العنوان حتى هو ... و مكتوب عليها بالحرف : *ايلا حتاجيتي شي حاجة و ما كنتش موجود طلبها منو* . (تبسم) و صافي البركة لي كنت جامع شديت بيها الكار و جيت للهنا ، عند الحاج ، حل بابو فوجهي و عمرو ردها ، كبرني مع ولادو و تحت جناحو ..
ريا : (تنهدات بارتياح) الله يكثر خيرو .. و ختك كاتهضر معاها ؟
عثمان : علاقتي بيها مزيان ، مزوجة و عندها ولد سميتو عثمان ، مرة مرة كاتجي تشوفني و لا انا كانمشي نشوفها ؟
ريا : و ديك المرا ؟
عثمان : (هز كتافو) عادي هي كاتقول انا ولدها و انا عمرني قلت ليها مي. و هذا ما كان ! هادي هي قصتي ! اش بان ليك ؟
ريا : (تبسمات ليه و هزات كتافها كاتقلب على الكلمات المناسبة) ما يبقاش فيك الحال و ما تتحسسش من الموضوع ، زايدون ما عندك مناش تحشم ، ما درتي حتى حاجة ما بخاطرك !
عثمان : يعني ما عندك حتى مشكيل بسبب الماضي ديالي ...
ريا : (تبسمات و مع تأثرات نيفها حمار و خدودها تزنكو بانت ليه كيوت بلا قياس) ههههه علاش غادي يكون ! (تنهدات) كلنا عندنا ماضي معنكش ، حتى ايلا باغا يكون عندي مشكيل ما عنديش الحق !
عثمان : (بترقب) و علاش ؟
ريا : عمري هضرت ليك على لي ولداتني حتى انا ! و اكيد غادي يسحاب ليك ميتة ! ياك ؟
عثمان : ايييه !
ريا : و لكن لا ، هي سمحات فينا و زادت مع الطريق ، علاش ! حيت بابا كان معيشنا جهنم ، و هي ما قداتش تصبر ، ما قدراتش تزيد و انساحبات بحال ايلا حنا ما كاينينش ..
عثمان : (طبطب على يديها) نتي لاباس ؟
ريا : (تبسمات ليه) بيخير كاع ... لقيت هادية ، هزات و تحملات و صبرات كثر من اي واحد ... كانو هوما بجوج السباب باش جينا لهاد الدنيا و لكن حتى واحد فيهم ما تحمل مسؤولياتنا ، هوما باركة عليهم رضاو شهوتهم و حنا يضربنا الريح
عثمان : ختك انسانة حديدية !
ريا : تماما
عثمان : حتى انا ما ننكرش فضل الخالة روخاش و الخالة هاينة عليا !
ريا : (تبسمات ليه) و هادو شكون ؟
عثمان : روخاش هي يمان بهاء و ميسان لي تربيت معاهم و هي مرات الحاج اللولة ، منين ماتت مسكينة تزوج وراها الحاج بالخالة هاينة لي كانت كاتربينا ! (حك قرفادتو) شي ربع سنين عاد باش تزوجو .
ريا : مزيان ، الله يسخر ..
عثمان : و على سيرتهم ، من دابا يومين كاين حفل ذكرى زواجهم ، دايراه ميسان ! تبغي تحضري ؟
ريا : (خرجات فيه عينيها) لواه ، (بقا كايشوف فيها بجدية) و ما عندها معنى ! ب بصفتي اش غا نمشي معاك ؟
عثمان : (تنهد و ما لقاش انسب من هاد الفرصة باش يعبر) بصفتي انا معجب ..
ربا : (حلات عينيها مصدومة) هممم ! ب بمن ؟
عثمان : بيك ... كاتعجبيني هادشي غير حيت ما بغيتش نزرب عليك اما راه كانبغيك .
ريا : (علات حجبانها و مدات يديها للكاس تشرب جغمة تسلك بيها صدمتها) لواه ! عثمان ماشي ضحك هذا !
عثمان : (تبسم) دابا فين عمري ضحكت معاك بحال هاكا !
ريا : (توترات و بدات كلها كاترعد ، الفرشات كايضربو فكريشتها جرية من ديكشي الرفيع و النفس تزيرات فصدرها بقوة ما قلبها بدا كايضرب بالجهد) واش كاتقصد اش كاتقول ؟ كاتهضر من نيتك ! دغيا لحقتي ؟
عثمان : ما كانلعبش هنا ! و ماشي دغيا ، راه عام و ربع اشهر و حنا كانهضرو مع بعضياتنا !
ريا : و لكن عاد تلاقينا !
عثمان : ما كاتحسي بوالو من جيهتي ؟
ريا : (حنحنات) م ماشي هكاك .. غير جاتني غريبة ! شنو لي شفتيه فيا و جدبك ليا لهاد الدرجة !
عثمان : كلشي ، من هضرتك ، لتفكيرك ، لاخلاقك ، كلشي فيك جدبني ليك و خلاني نفكر باش نأسس دار و نوي الحلال ، بغيتك حتى قبل ما نشوفك، و منين تلاقينا زدت طحت، و بالنسبة العائق الوحيد هو الماضي ديالي منين نتي تقبلتيه صافي ما بقاش عندي لاش نبقا حابس باش كانحس ... ما كانطلبش منك تبادليني نفس الشي و لكن عطيني فرصة ، و بالنهاية الحب ماشي هو السر لي كايخلي الدار تعمر ..
ريا : و و لكن هو (عضات على شفتها و بلعات ريقها ما عارفاش كي دير تخرجها ، التقزدير فيها عشرة لزيرو ، كاتجي تال عندها ما كاتبقاش عارفة ليه طريق) ح تى انا معجبة .