فل تثلج❄️طور التنزيل❄️

❄️الجزء 13❄️

#الجزء_13
#الفـــصــل_الأول : #لذة_محرمة
  #Let_It_Snow ❄️ 
#🅂🄰🄵🄸🅈🄰_🄽🄰🄶🄰🅃 🔏
        #𝓘𝓻𝓲𝓼

وسط بيت طاغي عليه اللونين ، الابيض و الباج ، و على سرير داير متوسطو .. ناعسو و مدور بيه الوسايد ، كايتقلب يمين و شمال و باين عليه الانزعاج من الحلم لي كايراودو فاللاوعي ديالو ... مرة مرة كايتمتم بشفايفو بكلمات غير مفهومين ...

" كانت خارجة من العمارة فين خدامة ، و هو حاط عليها ، غير فتحات باب سيارتها بغات تركب و هو يوقف عليها محاصرها ..

حاتم : (بنشوة انتصار) و اخيرا طحت عليك !
هادية : (قلبات عينيها ، على غير عادة و قرنان حجبانها مكرهة) ايلا كنتي نتا مسالي و ما عندك ما يدار ، انا لا ... غارقة من راسي تال رجلي ، و باغا نرتاح فعظامي .. داكشي علاش بعد من طريقي ، ضرب على نمرتي و خليني نعيش هانية  .
حاتم : (شد فيديها) هادية عفاك سمعيني !
هادية : ما عندك ما تقول ! و ما كاين ما نسمع ..  لي شفتو راني شفتو و لي وقع راه وقع .. و حتى واحد فينا ما يقدر يتقبل لاخور بالماضي ديالو ... صافي سالينا
حاتم : (نزل على ركابيه) سمحي لي ، سمحي ليا ،  عفاك ! كنت مرفوع ! الغلط ديالي ما حسيت بيه حتى فقت .. و (نزلات دمعة من عينيه) و ف الحقيقة
هادية : ( تنترات منو مقاطعاه) علاش ديما عزيز عليك الدراما ، درتي هندقة منين خطبتيني ، درتي هندقة منين خنت*يني ، علاش داير معاي عمايل ضريني و بكا سبقني و شكا ..
حاتم : انا غادي نقول لي ليك كل (شهق) كلشي ! انا ما نقدرش بلا بيك !
هادية : قبل ما تقول كلشي ، انا درتها ! درت حتى انا كيما درتي نتا مع نعمة ! بلا ما ضيع طاقتك . "

غوت على حر جهدو حتى ناض قافز من بلاصتو ... دخلات عليه مو بلهلا يطريه ليها خايفة عليه ، جلسات بجنبو كاتقلب فيه لا يكون بيه شي حاجة و هو كاينهج بحال ايلا كان كايتحارب ، شد على راسو و زيراتو البكية ....  هزات القرعة ديال الما لي حدا راسو فتحاتها و مداتها ليه يشرب و يرد نفسو ...

فتيحة : بسم الله عليك ! ياك لاباس ؟
حاتم : (هزهز راسو و نطق بصوت ثقيل) لاباس لاباس !
فتيحة : ايه الله يعطي حالك لعدوك و لي ما يبغيك ، الله يعطي حالتك لديك عدوة الله ! مكبرين ليها الشان و زايداها بالتعفار ، قليلة الحيا .. من نهار فسختي خطبتك ، عقدة و تحلات من فوق قلبي و لكن حالتك ما كاترجع غا اللور اللور . ياكما تكون سحرات ليك !
حاتم : (ساط بالجهد) مي ما تبدايش ..

دخلات وراها ختو مخرجة عينيها فشنو كاتقول مها ...

انتصار : نتي فعار الله اميمتي ، ولدك  لي دار علاش تفسخات الخطبة ... هي ما عليها والو ، لاش غادي تسحر ليه ؟ تفكات منو و هنات السوق !
فتيحة : لهلا يحييك ا مغصوبة الايام ، توقف مع بنت الزنقة بلاصة ما توقفي مع خوك ..
انتصار :  (تنهدات) واقفة مع الحق !
فتيحة : فين ماش تلقا بحالو ؟ الواحد كايغلط و لي قلبو كبير راه كايسمح .. و لكن ما نتسناهاشي منها ، الجيعانة لاخرة
انتصار : (بسخرية) همم منين يديرها معتصم و يخو*ن حليمة مع صاحبتها ، ديك الساعة نشوفو واش بقات فالقلب الكبير ، ايلا ما تجرجريش باباه فالمحاكم ما راك فتيحة السرغيني !
فتيحة : (بانزعاج) يعطيه الشلل قبل ما يفكر حتى فيها  !
انتصار : هاااا ! لي ما ترضايهش على بنتك ما ترضايهش على بنات الناس ! و لا غا حيت يتيمة مسكينة ما عندهاش مها و باها مريض بغيتي ديريها تحت السباط ، الحمدلله لي ما كملش ربي هاد التزويجة ، كنتي غادي تعيشيها الويل !
فتيحة : بنتي مكاتبة معاه ، هو باقي ديال راسو ما منحقهاش تتحاسب معاه و هي باقي ما دارها فعنقو .
انتصار : (بسخرية) ايييه رقعي ...
حاتم : (ناض واقف كايشوف فانتصار و عينيه معقودين) زمي فمك عليا و دخلي سوق راسك !  انا وياها غادي نرجعو و هاد الهضرة ما نبغيش نسمعها مزال ! غادي نقنعها باش تسمح لي و دابا تشوفي !
انتصار : (هزات كتافها باشنئزاز) و عاودها لطاسيلتك ! انا ماشي شغلي فيك ، ايلا رجعات ليك راها بلا نفس !
حاتم : (زير على يديها مخلخلها بلا والو لي فيه كافيه و القطعة مكملة عليه)  زميه ، سكتي ، صبحنا على الله ، كمارة د الويل ! نتي ماشي باقا فيك هادية ، نتي حاسداها حيت صغر منك و غادي تتزوج ، كنتي غادي طرطقي حيت خطبت وحدة صغر منك ... و نتي بقيتي بايرة !
فتيحة : (عضات على شفتها مأزمة على حال بنتها) نعل الشيطان ! هنيوني !
انتصار :(شافت فمها منخلاه) نوضي ا ماما نوجدو الغذا حراك يوجد فالوقت ... راك عارضة على الناس .
حاتم : شمن ناس ؟
فتيحة : و ماشي اليوم كان كتب الكتاب ديالك ، خالاتك كانو غادي يجيو ، و منين درنا بناقص قلت ليهم باش يجيو نتجمعو و صافي .
حاتم : همم غير خرجو عطيوني التيساع دابا
انتصار : (تمتمات و هي خارجة) الجايحة الكحلة لي تضربك ...
فتيحة : (شدات فيديه) الله يرضي عليك ، بعد عليها و ما تبقاش تسممها بهاد الكلام .. حشومة ݣاع ! و البنت لي غادي تخليكم ديرو هاكا الله يقطع حسها من الدنيا