فل تثلج❄️طور التنزيل❄️

❄️الجزء 28❄️

#الجزء_28
#الفـــصــل_الأول : #لذة_محرمة
#Let_It_Snow ❄️
#🅂🄰🄵🄸🅈🄰_🄽🄰🄶🄰🅃 🔏
#𝓘𝓻𝓲𝓼

جمعات صاكها و لبسات الصبادري ديالها ، ردات ليها جيلان البينوار و التقاشر ، جمعاتهم حتى هوما و خدات من عند جيلان التلفون كاتسجل فيه رقمها تحت طلبها ... رداتو ليها منين كملات و هي تشد فيها بيديها بجوج بطريقة حبابة ...

جيلان : عفاك خلينا نوصلوك ..

رمشات فيها عويناتها و هوما كايبريو دغيا قدرات تأثر فيها ، بلعات ريقها و هزهزات راسها بالايحاب ، نطقات بصوت مرعود و ما عارفاش لاش شاداها الرعدة ... معنكشة لا يمشي يعرفها ارون و تبان ليه برهوشة و لا شي بلان ...

ساندية : (همسات) بشرط !
جيلان : و لي هو ؟
ساندية : ما تعيطيش ليا بسميتي !
جيلان : (باستغراب) ها .. علاش ؟
ساندية : شي نهار غادي تعرفي علاش .. ممكن دابا ؟
جيلان : (هزهزات راسها) مشات ..
... : (بنبرة استفهام) قلتي لي سميتك ؟
جيلان : (نقزات بالزربة) مم مينة ! سميتها مينة !
.. : (صغرات فيها عينيها) العجب ! ماشي بحال هاكا جابلي بالي عيطتي ليها
جيلان : (حنحنات) مي ، سميتها أمنية و كايدلعوها بمينة ...
ساندية : احم ، تقرببا !
... : متشرفين ابنتي ، و انا راينا !
ساندية : شرف ليلي !
جيلان : مشينا دابا ؟ (هزات صاك على كتفها) انا سبقتكم نعلم بابا

خرجات سابقاهم و خرجو وراها راينا و ساندية كايهضرو فامور سطحية ، صواب و صافي ، وقفو عند سيارة ارون ، بقا كايحقق فيها بلا حيا بلا حشمة ، ما باين فيها غير عينيها و مع ذلك مشبهة ليه بيها ...

راينا : طلعي ا بنتي !
ساندية : شكرا ..

فتحات الباب و هي كاترعد ، جلسات حدا جيلان بينما جلسات راينا القدام بجنب ولدها .... و توكلو على الله .

جيلان : فين ساكنة باش نوصلوك !
ساندية : همم ! (حنحنات) تقدرو تحطوني ف*** ؟
جيلان : عطينا العنوان بالضبط ! ما تحشميش عادي و الله ، ياك ابابا ما فيها والو !
ارون : مرحبا !
راينا : شحال عندك من عام ا مينة !

ارون علا حجبانو منين سمع السمية ، شاف فيها من خلال المرايا القدامية و طلق وذنيه ..

ساندية : احم ثلاتين !
راينا : العقبة ل 100
ساندية : ان شاء الله !
راينا : و شنو كاديري فحياتك !
ساندية : خدامة !
جيلان : بالصح ! فاش ؟
ساندية : ماشي شي حاجة ! عندي مݣازان فالمول !
جيلان : بالصح ! يعني وقتما مشيت لتماك نقدر نتلاقا بيك
ساندية : وقتما بغيتي نتلاقاو انا كاينة ، رقمي عندك !
ارون : و ديالاش هاد المحل !
ساندية : (بارتباك) ديال البنات ! خاص بݣاع داكشي لي كاتحتاجو البنت وقت البريود !
جيلان : (لقطاتها) ما تقوليش ليا سميتو Warm Vibes !
ساندية : (هزهزات راسها) فايت ليك جيتي ليه ؟
جيلان : (نفات كلامها) لا ، و لكن بابا كان جاب ليا من تماك كادو ، حيت (حنحنات و حطات يديها على صدرها) انا جيلان ارون عاطف بلغت هادي ربعطاش اليوم و اخيرا !
ساندية : (ضحكات) مبروك عليك ، البنوتة الصغيرة كبرات و ولاو عندها مسؤوليات ...
جيلان : شكرا شكرا ، الله يبارك ليك و لكن هادشي كايعني بلي فايت ليك تلاقيتي بابا !
ساندية : (خرجات فيها عينيها) احم ، ما عقلتش !