فل تثلج❄️طور التنزيل❄️

❄️الجزء 5❄️

#الجزء_الخامس (5)
#الفـــصــل_الأول : #لذة_محرمة
#Let_It_Snow ❄️
#🅂🄰🄵🄸🅈🄰_🄽🄰🄶🄰🅃 🔏
#𝓘𝓻𝓲𝓼

تنهدات و شافت بعيد ثاني ، حطات راسها على كتفها ، كاتحس بيها ام ثانية ، بحالها بحال هادية ، كبرات وسط منهم و على يديهم ... كايفهموها بلا حتى ما تهضر .. نطقات بصوت منغنغ حابسة البكية بالزز ، ما لقات منين تصيبها ، كية ختها و الحݣرة لي حاسة بيها ، و لا كلام عمتها و التخرويض لي فيها .

ريا : مــاشي فوضع يسمح ليا نصبر على ثقالتها و كلشي عارف ما عنديش اعدى من هاد الاسقاطات . (شافت فيها بترقب و غير ما قال ليها راسها سولات سؤال عمرها سولاتو) انا ما عاقلاش عليها بزاف .. واش بالصح كانشبه ليها ؟
ساندية : (حنحنات متهربة من الجواب باش ما تجرحهاش) احم ، و حتى انا ما عاقلاش مزيان ..
ريا : واخا هكاك كنتي كبر مني و عندك ذكريات معاها كثر مني ؟
ساندية : (تنهدات مستسلمة) اه فالزين سبحان الخالق صورة طبق الاصل ... نتي وياها واحد و لكن و فالتعامل هي ما كانتش قاصحة بحالك ، عمتك غير كاتبغي تبين زعما بلي الطبع الحاد ماشي من عندهم . (تبسمات) و كلنا عارفين لي كاين (غمزاتها) طباعها هوما طباع هادية ... مهدنة و ما كاتحركش الدجاجة من على بيضها .

**
تعشات العشية و المغرب علاين تأذن ، خارج من الدار مقاد حالتو كيما العادة و بين يديه التلفون كايخنتش فيه ... حتى خرجات ليه من الجنب ... ما عرف راسو باش تبلا .

ميسان : عزيزي .
بهاء : (شاف فيها بمعنى طلقيني عارف ديك عزيزي ماشي لله) شبغيتي ؟
ميسان : (ببراءة) خرجني عفاك ، قنطت !

عينيها لي فلحظة كايكونو هايجين و فلحظة كايوليو هاديين ، زرقة البحر لي فيهم كاتبدل على حساب مودها ، و فالاغلب كاتكون شوفتها حارة ، حيت طباعها حادين مع البراني . خلاوه يتبسم بلا هواه و يحط يدو على خدها بحنان ...

بهاء : ما عييتيش من القنط ؟ ههههه ديما قنطانة
ميسان : (باست راحت يديه و هزات كتافها) و هادشي لي عطا مولانا ، بغيت نخرج ندور نشري شي حاجة و نرجع .. و ما عندي صحابات ما عندي ونيسة ، نموت انا نموت ؟ (خرجات فيه عينيها)
بهاء : غذا نخرجك .. وعد ، دابا خليني نمشي نقضي شغالي
ميسان : (تبسمات ليه ببرود) علاش كاتواعدني و نتا عارف راسك ما غاديش توفي ؟
بهاء : (عقد حجبانو ) موالف نكذب عليك و لا نعطيك وعد و ما نوفيهش ؟
ميسان : (بسخرية) همم اذن ما فراسكش غذا نتا مسافر !
بهاء : (باستغراب) كيفاش ؟ لين ؟
ميسان : (تنهدات) خويا واش كاتفلا عليا

جرها من يديها جلسها فوق الكرسي و شاف فيها بترقب حيت ديال بالصح نسا واش عندو شي سفر و لا خدمة ... و ايلا مشا حتى سولو الحاج و ما عطاه راس الخيط مشا فيها خلا .

بهاء : ميسان ! (باس راسها) الله يرضي على بنتي ، انا مشا من بالي هادشي ، شنو قال لي الحاج !
ميسان : و غير السيمانة لي فاتت على الطبلة ديال الفطور رصا معاك و قال ليك بلي غادي تمشي نتا و عثمان على قبل الصفقة ديال الحرير ؟
بهاء : عثمان فراسو ؟
ميسان : (هزهزات راسها بالايجاب و نطقات باستهزاء) لا يكون جاه الزمايمر بحالك الله اعلم ..
بهاء : همم (هز تلفونو عيط ليه بدون تردد و بقا كايتسنى ثواني قليلة) واش العشير
عثمان : عمرك طويل كي الجرو
بهاء : (شداتو التبوريشة) الجرو يهرمك ..
عثمان : فينك ؟
بهاء : عاد خارج ايلا بغا ربي !
عثمان : مزيان منين باقي فالدار