فل تثلج❄️طور التنزيل❄️

❄️الجزء 52❄️

#الجزء_52
#الفـــصــل_الثاني : #خريف_العشق 🍂
#Let_It_Snow ❄️
#🅂🄰🄵🄸🅈🄰_🄽🄰🄶🄰🅃 🔏
#𝓘𝓻𝓲𝓼

وقفات بيها طاكسي قدام باب دارهم و هي مستغربة من السيارة لي حابسة حداهم تماك ... خلصات و نزلات، مزروبة باغيا تلقا الدفتر ديالها بالخف ، ما عرفات راسها خلاتو هنا و لا طيحاتو فالمحطة ، داكشي علاش خلاتهم تماك كايقلبو و جات تقلب فدارهم بالزربة باش ترجع قبل ما يوصل وقت البرنامج ...
فتحات الباب بسوارتها و دخلات ... قرنات حجبانها و وقفات مسمرة فبلاصتها منين سمعات سميتها ... و صوتها حتى هو ، خرج حبيب و وقف فبلاصتو ما عارفش راسو باش تبلا .... شافت فيه و عينيها دامعين ، بنظرة خيبة امل و عتاب ... صونا تلفونها، حطاتو فوذنيها و بالها ما معاهاش اصلا ...

ايمن : لقيناه ! لقينا الدفتر ديالك غير رجعي!
هادية : تكلف نتا عفاك !
ايمن : ياك لاباس ..

قطعات التلفون بلا ما تجاوب و حطات صاكها و تلفونها فوق الطبلة لي عند الباب ... دخلات مترددة ، وقفات عليهم و تلاقاو عينيهم ...

هادية : ا (بلعات ريقها حابسة غصتها) ا اش جيتي ديري هنا !
هاينة : (وقفات من بلاصتها غادية ناحيتها) ه هادية !
هادية : ما تقربيش ليا .. خليك فبلاصتك ...

حبسات هاينة فبلاصتها و كلها كاترعد ... بينما هادية غير ما كاتزيد تشعل ، خرجات فيها عينيها و نطقات و هي كاترعد مزيرة على مخارج الحروف ...

هاينة : شنو جيتي ديري هنا ؟
سعيد : (محاول يلطف الجو) نسيتي منين قلتها ليكم ؟

شافت فابراهيم ما عارفاش شكون و لكن جاها فيه الشبه ديال بهاء ، قرنات حجبانها و عاود شافت فيهم حاسة براسها غادي تحماق ... تدخل حبيب باش يرمي كاع اللومة عليه .

حبيب : هادية انا لي طلبتها باش تجي ...
سعيد : (هز اللومة من على ولدو و نطق بوهن) انا بغيت نتسامح معاها ... (شاف فهاينة) شكرا حيت جيتي، شكرا حيت خلتيني نقولها... انا ندمان على داكشي لي درت فيك ، ندمان بلا قياس و كانتمنى شي نهار قلبك يبرد عليا و تسمح ليا ..
هادية : (بصدمة) علاياش ؟ (غوتات) علاش غادي تسامح معاها ؟ علاش غادي تتفكرها اصلا ؟ علاش تمشي وقتما بغات و ترجع وقتما بغات ؟
ابراهيم : يهديك الله ا بنتي ما تغلطيش فيماك !
هادية : (شافت فيه و ابتسامة سخرية على شفايفها) يما ؟ سمح ليا ا الشريف و لكن نتا غالط (ضحكات و هي كاتحك فراسها) انا يما ماتت ! انا يتيمة ! ما عنديش مي ... (شافت فهاينة) انا مي ماتت منين كانت عندي تسع سنين و خلات ليا مسؤولية على كتافي دكاتني فالارض ... انا مي هربات من العصا و هي عارفة بلي خلات لي غادي يعوضها و ياكلها فبلاصتها ... انا مي ما عاقلاش على ملامحها حتى ، على صوتها ، هضرتها ، غنيتها ، ما بقيت عاقلة على والو كايربطني بيها (ضربات على قلبها) انا مي ما عنديش ، انا مي خلات لي يسوا و لي ما يسواش يهضر عليا ، فوجهي و فظهري ... و خلات عمتي تدك فيا سمها كيف بغات .. و هي عارفة مزيان عمتي كي دايرة ...
حبيب : هادية تهدني (شد فكتافها)
هادية : (قاطعاتو بالغوات و تنترات منو) ما تقولش ليا تهدني ! سكااااات ، ما تهضرش ! ما غاديش نتهدن ! هادية عيات من الهدوء و تهدني .. ماشي هاد المرة !
ابراهيم : (هضر حيت شافها كيفاش احتارماتو فالاول) يمكن ايلا سمعتي المخبي غادي تسمحي ..
هادية : عفاك ا عمي ... انا ما كانعرفكش و ما باغاش نغلط فيك ، خليك بعيد ..
ابراهيم : ما يمكنش ليا نبقا بعيد و نتي كاتغوتي على عوينتي ...
هادية : (مسحات دموعها) يعني تقدر تهز عوينك و لا اش كاتجيك و تقدرو تخرجو ... انستو و شرفتو الله يجعلها اخر اللقاءات ...
ابراهيم : (بلع ريقو) الله يرضي عليك سمعي شنو كاين بعدا ... هذا ماشي اخر لقاء بغيتي و لا كرهتي !
هادية : (غوتات) ما بغيتش ! ما بغييييييتش ... حتى حاجة ما غادي تشفع ليها عندي ... راه سنين هادي ، يوقع لي وقع ، ما غادي نسمح ليك و ما غادي نعتارف بيك و ما عمري بغيت نعاود نشوفك مزال ! حنا ما محتاجينش ليك (ضربات على صدرها) لقينا بعضياتنا ... حتى هاد بابا لي باغي يتصالح معاك ما لقيناهش ... (شهقات كاتغزل) حتى حاجة ما غادي تخليني نسمح ليك، عطيتيني امل كاذب و لغد ليه خويتي بيا، نعست و نتي فعيني اعظم انسانة ، باس نفيق و نلقاك طحتي لاح*قر انسانة ... فين يبان الخبث ديال عمتي و فين يبان العصا ديال بابا و السبان ديالو .... و كان عندي امل ، كنت كانقول غادي يتنادم معاك الحال و غادي ترجعي ، غادي تسولي ، و ما حد العام كايدور و الاحتمالات كاتقل حتى صافي دازت خمس سنين و غسلت عليك يدي .... ما كنتيش معاي فاش طيبت اول مرة ، و فاش تحرقت اول ، فاش جاتني البيريود ، فاش دوزت المراهقة، فاش خديت الباك ، فاش خدمت كانغسل الماعن فالقهاوي ، فاش خديت الديبلوم ديالي فاش خدمت فاش شديت اول سالير فاش تخطبت ، فاش تخا*نيت ، فاش تكسرت ، فاش بغيت ، و فاش سمح فيا و خلاني ... (نطقات بالم و انكسار جرحها عمييييق فهاد اللقطة) حتى كنا مواعدين بعضياتنا بالزواج ، و ما ترددش ينقض وعدو ... ما عمرك كنتي معاي ، و نتي لي جبتيني لهاد الدنيا ، (نطقات بسخرية) كانشوف الماس كايهترفو بمرات باهم، العيالات ربايبهم و كايتهلاو فيهم و لكن نتي حتى ولادك ما صرفتي فيهم الربح !