👑 ဘယ်သူကိုယ့်လောက်ချစ်မလဲ 👑
အပိိုင်း(၁၀)
ဒီဇင်ဘာလ၏အအေးဒဏ်ကို ဂွမ်းကပ်ထူထူ၏အကာအကွယ်နှင့်ကြံ့ကြံ့ခံနေရသည်။ဒူးတွေရင်ဘတ်နဲ့ထိကပ်လုမတတ်ကွေးထားရင်း ချိုးချိုးချွတ်ချွတ်လှုပ်ရှားသံတွေနဲ့စကားသံတိုးတိုးကြောင့် ကိုယ့်အိမ်ကိုယ့်ရာမဟုတ်တာကို သတိထားလိုက်မိခြင်းဖြစ်သည်။
ဟုတ်သားပဲ..၊ ညက အဂ္ဂါဦးသျှောင်အိမ်ကိုရောက်ခဲ့တာတွေ၊ အဖြစ်အပျက်တွေအားလုံး တစ်ခုချင်းပြန်မြင်ယောင်လာမိသည်။တစ်ခါဖူးမျှအိပ်မက်ပင်မမက်ခဲ့ဖူးသော သစ်သားအိမ်သေးသေးလေးမှာ ဒီဇင်ဘာ၏ဆောင်းညတစ်ညကို ဖြတ်ကျော်ခဲ့ရပြီ။
အသံတွေကိုသေချာနားထောင်ကြည့်လိုက်တော့ အဂ္ဂါဦးသျှောင်နဲ့သူ့အမေစကားပြောနေသံပင်။ပိုပြီးသေသေချာချာပြောရရင် သူ့ကိုသူ့အမေနှိုးနေခြင်းဖြစ်သည်။
"ငါးနာရီထိုးနေပြီ သား၊ ထတော့လေ.."
"ဟာ!...အစောကြီးရှိသေးတာပဲ၊ ခဏ..ခဏလေး ပြန်အိပ်ပါရစေဦးမေမေရာ အိပ်ရေးမဝသေးလို့ပါ"
သူ့အသံက အိပ်ချင်မူးထူးနဲ့ဗလုံးဗထွေး။
"အိပ်ချင်ပြန်လာမှဆက်အိပ်၊ ကောင်မလေးကိုပြန်ပို့ပေးလိုက်ဦး၊ သူ့မိဘတွေစိတ်ပူနေမှာပေါ့.."
"ဘယ်ကကောင်မလေးလဲ"
ခုထိနိုးသေးပုံမရ။ယောင်နနနဲ့ပြန်မေးနေတဲ့ပုံ။
"ကဲ!..ဒီကလေးနဲ့တော့ခက်နေပြီ၊မင်းညကခေါ်လာတဲ့မိန်းကလေးပေါ့၊ သား...ထ ထတော့၊ ပြန်လာမှဆက်အိပ်"
ချော့မော့ပြောနေသည့်သူ့အမေအသံက ချိုသာမှုတို့နဲ့ညွှတ်ပြောင်းလျက်။ အိမ်လေးကသစ်သားအိမ်လေး၊ အိပ်ခန်းကနှစ်ခန်းတည်း။ အခန်းနှစ်ခုကိုသုံးထပ်သားနဲ့ကာရံထားသဖြင့်ဟိုဘက်ဒီဘက်အသံတွေထိုးဖောက်ကာအတိုင်းသားကြားနေရသည်။
အဂ္ဂါဦးသျှောင်က တစ်ဖက်ခန်းမှအိပ်ပြီး ဒီဘက်အခန်းမှာသူ့အမေနဲ့အိပ်ခဲ့ရ၏။အခန်းက အရမ်းကြီးမကျယ်ပေမယ့် အထဲမှာခုတင်ကနှစ်ယောက်အိပ်သာအောင်ကျယ်လို့တော်သေးသည်လို့ပြောရမလား။
YOU ARE READING
ဘယ်သူကိုယ့်လောက်ချစ်မလဲ
Romanceအလှမ်းကွာလွန်းပြီးမတူညီတဲ့အသိုင်းအဝိုင်းနှစ်ခုကနေမွေးဖွားလာတဲ့သူတို့နှစ်ယောက် တက္ကသိုလ်တစ်ခုတည်းမှာအမှတ်မထင်ဆုံရာက...မာနခပ်ကြီးကြီးကောင်လေးနဲ့ခပ်စွာစွာမာနကြီးကြီးကောင်မလေးတို့အမုန်းတွေကြားကနေဘယ်လိုချစ်သွားမလဲဆိုတာ....(မင်းသားကခပ်ကြမ်းကြမ်းနဲ့အရွဲ့ဆ...
