နာမ် / Complete /

EPISODE - 29

-Unicode-

အင်အားကုန် တစ်ဟုန်ထိုးတိုးတက်နေတဲ့
ဟေရိုလာကင်မ်တိုင်းပြည်ရဲ့ မြောက်ပိုင်းသည် စစ်မပြီးပြတ်သေးရာဒေသဖြစ်သည်။
ကျူးကျော်စစ်အတွက် ခုခံနေကြဆဲဖြစ်ကာ တိုင်းပြည်နယ်စပ်သည် ရာသီစက်ဝန်းတစ်ခုလုံး သွေးချောင်းစီးနေရမြဲ။
ဧကရာဇ်က ဘယ်လိုမှမစီမံပေးဘူးလား မေးရင် စီမံခဲ့တာပေါ့..အကောင်းဆုံးစစ်ဗျူဟာတွေ အကောင်းဆုံးလက်နက်တွေ အကောင်းဆုံးမြင်းတွေနဲ့ ရိက္ခာအလျှံအပယ်တွေကို သေချာစီမံခဲ့တာ။
တစ်ဖက်ကရန်သူ့တပ်ကိုအလွယ်လေး ချေမှုန်းပစ်နိုင်တဲ့အထိ ဧကရာဇ်ရဲ့ဗျူဟာနဲ့ လက်နက်တွေသည် သာမာန်လူလိုက်မမှီနိုင်တဲ့အဆင့်မှာချည်း။ ဒါဆိုဘာကြောင့် မပြီးဆုံးသေးတာလဲ...
ပြဿနာသည်အတွင်း လောက်ကောင်တွေရှိနေခြင်းကြောင့်။

ဗင်ရိုမြို့မှာတပ်စွဲပြီး မြောက်ပိုင်းနယ်စပ်ကို ဦးဆောင်ကာကွယ်နေသူသည် ကြင်ရာတော်လီဟေရှင်းရဲ့ အဖေဖြစ်သူ သေနာပတိလူကြီးမင်းလီ။
ဧကရာဇ်ထောက်ပံ့တဲ့ အရည်အသွေးမြင့်လက်နက်တွေရဲ့ သုံးပုံတစ်ပုံကိုသာ စစ်အတွက်သုံးပြီး ကျန်နှစ်ပုံကိုလက်ဝါးကြီးအုပ်ထားသည်။ တစ်ပုံကို ရန်သူ့တပ်ဘက် ဈေးကြီးကြီးနဲ့မှောင်ခိုရောင်းစားပြီး ကျန်တစ်ပုံကို တိတ်တဆိတ်သိုလှောင်ထားသည်။
မြို့တော်က ပို့လာတဲ့ရိက္ခာတွေကို အရည်အသွေးနိမ့်တဲ့ဆန်ကြမ်းတွေနဲ့ လှဲလှယ်ပစ်လိုက်ခြင်းတွေကြောင့် ဗျူဟာက ဘယ်လောက်ကောင်းကောင်း စစ်သည်တွေက ခုခံနိုင်ရုံသာအင်အားရှိပြီး ထိုးဖောက်အနိုင်ယူနိုင်ဖို့မစွမ်းသာနိုင်ဖြစ်နေကြသည်။
မြောက်ပိုင်းမငြိမ်းချမ်းနိုင်ရတဲ့ အကြောင်းအရင်းတွေနောက်မှာ လီအိမ်တော်ကကြီးကြီးမားမားရှိနေခဲ့ပါသည်။ လီအိမ်တော်ရဲ့တစ်ဦးတည်းသော သခင်မလေးလီဟေရှင်းက ဧကရာဇ်ရဲ့ကြင်ရာတော်ရာထူးကို ရောက်သွားတဲ့အခါ အတင့်ရဲလာမှုတွေက ပိုပိုသိသိသာသာ။
ဒီလိုအရေးတွေကြိုမြင်လို့ လီဟေရှင်းနဲ့လက်ဆတ်မယ်ကြားတော့ သခင်လေးမင်ယွန်းဂီသည် အရှင့်ကို ဝင်သတိပေးလာခြင်းသည် မှားခဲ့တာတော့မဟုတ်။

"ကျွန်တော်တို့လုပ်နေတာတွေ ဧကရာဇ်ရိပ်စားမိနေတယ်သေနာပတိလီ။ ညီလာခံမှာသံသယဝင်စပြုနေပြီ"