تمسك بيدها كوب قهوة لكن ما شربت منه ولا رشفة وكانت عيونها معلقة على الشارع برا و كأنها تنتظر أحد يجي ويرجع لها بنتها والصمت كان يسيطر على المكان إلا من صوت أنفاسها الثقيلة
دخل عناد وجلس قبالها ناظرها بتمعن شاف الحزن اللي آكل ملامحها حاول يهديها بشويش
عناد:نجد لا تعذبين نفسش بهالشكل وطن ما هي بعيدة وصدقيني الوضع مؤقت
رفعت راسها له بعيون مليانة دموع مكبوتة
نجد:مؤقت؟ كيف أقدر أعيش وهي بعيدة عني؟ كيف أنام وأنا ما أدري وش يصير فيها؟
عناد أخذ نفس طويل و قرب منها أكثر وحط يده على طرف الطاولة ونبرته كانت جدية بس هادية
عناد:وأنا نفس شعورش وما تفكرين إن قلبي مرتاح؟ لكن نحتاج نكون أقوى ونثبت إننا الأحق فيها إحنا ما راح نترك وطن يا نجد
هزت راسها وكأنها مو مقتنعة انخفض صوتها وهي تنطق :أم متعب تعرف كرهها لي؟ كيف أثق إنها تهتم فيها مثل ما تستحق؟
ردت عنها غصن اللي كانت جالسة بجنبها من البداية بس ساكتة:نجد لا تعطينها أكبر من حجمها إحنا بنبدأ معركة قانونية والبنت بالنهاية ترجع لكم لا تشيلين هم
نجد وقفت فجأة وتركت الكوب على الطاولة وبدأت تمشي في الصالة وكأنها تحاول تهرب من إحساسها بالعجز ومسكت راسها بضيق والدموع اجتمعت بعيونها ونطقت _أنتو ما تفهمون هذا مو عن قوانين ولا محاكم هذا عن بنتي! عن جزء مني بعيد عني وأنا هنا ما أقدر أسوي شي
عناد وقف قدامها مسك كتفها بلطف ونظراته كانت مليانة جدية:نجد وطن ما راح تضيع وأنا موجود راح أسوي كل شي عشانها بس نحتاج صبر ما ينفع ننفعل بهالطريقة
سحبت كتفها من تحت يده و التفتت عنه وقالت بصوت مكسور:وأنا وش أسوي بهالصبر؟ أحسني أختنق يا عناد
عناد قرب منها مرة ثانيةو لكن هالمرة نبرته كانت أهدى وحاول يكون أحن:تختنقين وأنا معك؟! لا يا نجد، وطن بتكون معنا قريب
غصن وقفت وقطعت الحديث:طيب يا جماعة ليه ما نرتب خطواتنا؟ الحين أهم شي المحامي يتكلم مع القاضي ويشرح الوضع إحنا نحتاج نثبت إن
أم متعب مو مناسبة للبنت
نجد أخذت نفس عميق ورجعت جلست وهي تحاول تهدي نفسها ونطقت :الله يكتب اللي فيه الخير بس أخاف. أخاف الوقت يضيع ووطن تبتعد أكثر
عناد جلس جنبها ناظرها بنظرات كلها حنان ونطق :وطن ما هي بعيدة يا نجد قولي يا رب وبإذن الله الأيام الجاية تحمل لنا الفرج
عناد ظل يناظرها وهو يحاول يلقى الكلمات المناسبة الجو كان ثقيل كل واحد يغرق في أفكاره لمن نطق:نجد تعرفين إن كل خطوة سويناها لهاللحظة كانت محسوبة لا تخافين إحنا ما سوينا شي غلط
رفعت نظرها له وهي توتر أصابع يدها ببعض وكأنها تحاول تفهم وش اللي ممكن يصير ونطقت :عناد أنا ما أخاف من القوانين أخاف على قلب بنتي هذي بنتي اللي حملتها بتعب الشهور كيف أثق إنها بخير بعيد عني؟
