بعد شهرين في بيت عناد ونجد، الجو كان هادي، بس فيه ريحة بخور تتغلغل في المكان، والمجلس مضوي بنور خفيف يعطي إحساس بالراحة. عناد كان جالس على السجادة جنب شبة النار اللي مولعها في زاوية الحوش، ومتلطم بالشماغ، يحرك الجمر بعصا صغيرة
نجد دخلت الحوش، ملفوفة بعبايتها، ووقفت عند الباب وهي تراقبه لكن طبعًا، ما تقدر تسكت، لازم تطقطق!
نجد بصوت مستفز: هاه، شيخ العرب وش تفكر فيه وانت كذا متلطم وكأنك تخطط لغزوة؟
عناد التفت لها بعيون ضيقة وهو يرفع حواجبه:أوه، أظن إني سمعت صوت واحد توه جاي يستهبل علي؟
نجد ضحكت وجلست جنبه: لاا، بس جد، شكلك كنك شيخ قبيلة، ناقصك سيف وتركب خيل!
عناد بضحكة خفيفة وهو يمد يده يسحبها تحضنه تحت فروته: إيه، وأنتي وش وضعك؟ داخلة تسوين مقابلة صحفية ولا جاية تستدفين؟
نجد وهي تحاول تفلت من حضنه تمثل الجدية:لا، لا، عناد أنا حرة لا تخليني أسير تحت حكمك!
عناد وهو يشد عليها غصب: حرة؟ لا والله؟ وش اللي حرة؟ أنتي حلالي وتحت حكمي!
نجد ضحكت بصوت عالي وهي تضربه على صدره: أوف أوف، شكلك متأثر بأفلام زمان!
عناد وهو يضحك:لااا، بس متأثر فيك، من جد، أنتي أعظم فتنة مرت في حياتي!
نجد رفعت حاجبها:أوه عاد لا تبالغ، احترم مشاعري!
عناد ضحك وهو يدف راسه عليها شوي:لا، والله، بدون مبالغة، بس قولي لي، وش تحسين فيه وانتي يحضني تحت فروتي كذا؟
نجد مسكت يد الفروة بيدها وهي تبتسم بخبث: أحس إني حرامية، وجايه أسرق منك الدفا!
عناد رفع حواجبه بصدمة مصطنعة: يا ساتر، يعني كنت غلطان يوم حسبتش جاية رومانسيه؟
نجد وهي تضحك: إيه، معليش، مو وقت المشاعر الحين، وقت إننا نطقطق عليك!"
عناد قرب وجهه منها شوي وقال بصوت منخفض: إيه، بس إذا انتهى وقت الطقطقة، تعالي شفتي ليه أنا أحبش بهالشكل؟
نجد تراجعت شوي وهي تضحك بتوتر: لااا، شكلك ناوي على شي، أبعد! ترا للحين كارهتك
عناد :إنا لله للحين؟ ارحميني يا بنت سياف شهرين وانا انام بالمجلس
نجد ببراءه:شسوي ولدك مب انا
ضحك عناد وهو ينطق :ايه أجل كذا انا اربيه خليه يجي بس
كانت الليلة، ليلة ما تنسى، بين النار المشتعلة، والقلوب اللي اشتعلت بفرحة أكبر، والدفا اللي صار مو بس من الفروة، بل من الحب اللي يجمعهم
الأيام تمر، وحمل نجد صار أوضح، البطن كبر والوحام بدأ يخف شوي بس التعب ما زال موجود. عناد كان حريص عليها بكل تفصيل لدرجة إنه صار يتابع معها حتى مواعيد الدكتور أكثر منها
