الصباح في بيت ابو عناد
في الصالة كانوا الكل مجتمعين أبو عناد كان جالس قدامه دلة القهوة وكومة تمر وأم عناد بالمطبخ ترتب السفرة نجد جالسة جنب وطن تحاول تمشط شعرها اللي كل شوي تهرب منها
غصن دخلت وهي تنطق بصوتها العالي:وين القهوة؟ وين الناس اللي بتسولف معي؟ خلاص يومين وأروح
عناد وهو متكي على الكنب رد عليها بنبرة ساخرة:وأخيرًا بنفتك من صوتش البيت بيصير أهدأ وأجمل
غصن ضربته بالمخدة ونطقت :ما حد سألك وبعدين بجلس على قلبك
نجد وهي تحاول تهدي وطن اللي تبكي:غصن ترا الزواج مو بس فساتين وكشخة ترا مسؤولية كبيرة لا تطيرين بالعجة
غصن جلست قدام نجد وقالت وهي تتصنع الجدية:مسؤولية؟ ماشاء الله عليش أنتي طبعًا
أستاذة الزواج المثالية! عناد لا يسمعش يمكن ينسحب
عناد قفز من مكانه وهو ينطق :أنا؟ أنسحب؟ يا بنت أبوي لو تعرفين بس كم مرة أفكر أهرب منكم أنتم الثنتين
أبو عناد وهو يصب لنفسه فنجال:يا عيال ترا الزواج ما هو لعبة غصن انتبهي خليش سنعه مع زوجش لا تزعجينه بكثرة الكلام
غصن وهي تحاول تخفي ضحكتها:يعني إنت يا يبه شلون صابر على أمي؟
أم عناد دخلت فجأة:سمعوني؟ وشو اللي صابر علي؟ ولا إنت يا غصن يا قليلة الادب خليش ساكتة اليوم بنروح السوق نجيب أغراض زواجش ومالش كلمة!
عناد ناظر غصن وفطس ضحك وهو ينطق :من حفر حفرة لأخيه وقع فيها كنتي تبينهم يتهاشون ولقمتي
غصن ميلت شفايفها وهي تنطق :افا بس منو قال وبعدين أمري يمه يا اطلق زوجه
ام عناد رمتها بالمخده وهي تنطق :اصه اصه وقومي كملي اغراضش
بعد العصر بالسياره
عناد:وش تبين زيادة يا غصن؟ والله كأنه زواج ملكة مو بنت أبو عناد
غصن ردت بحدة:لا تدقق أنت آخر واحد يتكلم شايف نفسك بأفخم ثوب يوم تزوجت
نجد التفتت عليه وهي تمسك ضحكتها:عناد لا تنسى إنك حجزت القاعة عشان تتفاخر كأنك بتتزوج ملكة بريطانيا
عناد، وهو يحاول يغير الموضوع:طيب خلاص أنتم الحريم ما لكم إلا المظاهر وطن تعالي عندي بابا خليهم يتهاوشون لحالهم
وطن مدت يدينها لعناد لكنها ضحكت وقالت:لا
أم عناد:شف بنتك عنيدة مثلكم انت ونجد الله يعين غصن إذا جابت أطفال بعد الله يعين مافيكم واحد نقول بيجون عياله هادين
غصن: لا عيالي يا يمه بيجون احسن من عيال ولدش وبعدين تعرفون أنا أشطر منه وأحسن في التربية
عناد بضحك :الله أكبر اقول اهجدي بس بنشوف والله احس بلاقي عيالش بالشارع وهم لابسين لبسهم الداخلي لحاله ذاك شسمه حق الحفاظ وشعورهم منفوشه ياخي مثل ماكنتي وانتي بزره
