Cindereluh And The Alien Hunks

CHAPTER THREE

Dear diary,

'Di lalim akong giagian para lang makagawas sa balay. Daghan pa kaayo'g sugo akong stepmom og stepsisters nako, mura jud ko nila'g gipa-swelduhan oi. Mga baga sila'g nawng. Tungod sa ilang mga sugo, na-late na hinuon ko sa trabaho. Around 6:15 PM nako naabot sa peryahan. Nitakas ra pajud ko's balay, maong for sure mabugnoan ko nila inig uli nako. Pero bahala na, kihanglan nakong mangwarta.

"Kuya, sorry kaayo na-late ko. Daghan pa kaayo ko'g gibuhat sa balay gud. Nagpakaon ko's iring unya nagtahi pako's panty sa akong stepsister kay mag-churva daw sila's iyang uyab, and then-"

"Shh, shh! Husto na! I don't need to hear your reasons! Pag-prepare na kay sayang ang oras!"

"Imong kaltasan akong TF, Kuya? Ayaw lang, please! Kihanglan kaayo nako'g kwarta. Every cent counts."

"Fine, fine, 'way kaltas. Basta tarunga imong trabaho, kasabot ka? Impress me and the audience. Dapat in-character ka. Performance level jud ka, ha?"

"Unsaon man pag-performance level ni Ursula? Gusto ka mokaon ko'g kayo? Laban ra!"

"Shunga! Naa diay Babaeng Nukos nga mag-firedancing? Asa nimo gibutang imong utok oi?"

"Luh ha, why not? Let's be unique! Dapat naa ta'y atong own ideas and vision. We have to think outside of the box-"

"Sabaa oi! Daghan kaayo kang langas! Pag-ilis na'g costume didto 'kaw. Pagpa-make up na. Unsa pa man imong gihuwat."

Ila dayon kong gitabangan og butang sa akong costume. Pang-octopus ra gud nga attire. Ana sila, "perfect!". Angayan daw kaayo ko sa akong role. "Panit pa lang, nukos na nukos na," ana sila. Kasagpaon kaayo ko nila pero ako lang gipugngan akong self, diary. Mawagtangan 'nya ko'g trabaho. Basi'g goodbye masquerade ball pud ko.

Bushet oi.

Nganong di man parehas ni Cinderella akong life? Nganong 'wa ma'y fairygod mother diri nga motabang og transform nako? 'Di na unta ko kihanglang magpaka-nukos diring dapita.

Aw o diay. Reality ni, 'di ni s'ya fairytale. Walay fairy nga motabang nako para makuha si Prince. Ako'y kihanglang maningkamot. Sariling sikap anh ferson mga besh.

"Maayong gabii kaninyong tanan!" ni-shagi ang announcer. Naa ko naglingkod sa usa ka aquarium kauban ang babay'ng sirena. Gitabunan mi og kurtina.

"Angayan kaayo ka's imong role, gurl. Babaeng Nukos. Ha-ha-ha! Itom kay ka gud."

Nisaka akong kilay, diary. Aguy, aguy, kung makapanaway ang sirena. Basin gusto s'yang prituhon nako?

"Ikaw pud, angayan kaayo ka's imong role. Sirena. Mura ka'g isda's bato."

Nganga siya sa akong gisulti diary oi. O, unsa? Sukol pa ka? May gani 'wa na siya nitubag kay pritohon jud nako siya without second thoughts.

"Karong gabhiona, atong makit-an ang usa ka maanyag nga prinsesa sa kadagatan kauban ang itom nga pwersa sa usa ka babay'ng nukos. Atong ila-ilahon si Prinsesa Ariel og Reyna Ursula!" nadunggan nakong sulti sa announcer.

Nag-shinagitay og nag-pinakpakay ang mga tawo pagka-abli sa kurtina og pagkakita nila namo. Amazed kaayo ang mga bata nga nagtan-aw sa fake sirena sa akong tapad samtang nangahadlok sila nako.

"Kung kinsa'y gustong molabay og kamatis sa Babaeng Nukos nga si Ursula, kihanglan mobayad og baynte pisos para makakuha og tulo kabuok kamatis"

Nisiga akong mata. Unsa daw? Ila kong labayan og kamatis? Wait lang ha, 'wa man na'y apil sa among sabot. Ana siya nga mag-octopus costume ra ko og mo-atubang sa audience. 'Wa ko'y laing buhaton but to give them a good show, mao ra.