الصافي... طارق اللبيب

الحلقة الثانية

عطيه فتح الباب وجا طالع رحب بيهم.. مرحب مرحب والله .. نورتو البلد شرفتو الديار .. اتفضلو بالباب التاني .. وشال الشنطة براهو .. ومشى على الباب التاني ..
البيت فاتح في شارع ماشي شرق غرب .. والبيت فاتح شمال .. فيهو بابين .. باب كبير وهو الجزء الساكن فيهو عطية.. وباب صغير .. وده الخاتيهو ليهم يسكنو فيهو هم .. اها مشى على الباب الصغير .. البيت نص فيهو غرفتين مسقوفات بالخشب .. فاتحات في برندة مقفلة مقفولة بالزنكي الملقم ..
ومطبخ بالناحية الغربية .. والحمام في الناحية الشرقية مشترك مع حمام الجزء التاني من البيت حمامين منفصلات يعني ..
المهم البيت كويس لاسرة صغيرة .. وفي النهاية نص بيت يعني .. على قدر الحوجة .. لكن مافيهو مكان ضيافة واستقبال رجال ..
الحاجة الغريبة وعجيبة .. انو البيت مفروش.. فيهو اربعة سراير بي لحافاتها وملاياتها .. وازيار ملانة موية .. ومكنوس ومرشوش ..
وحتي المطبخ فيهو العدة الضرورية .. حلتين وصحانة وكبابي .. وسيرمس وبوتجاز وانبوبة ووو .. يعني حاجات متواضعة لكن كافية ..
والامين حايم في البيت ويعاين .. وايمان ماشة وراهو .. وعطية قاعد جمب الباب .. وماسك الصافي من يديهو وبسال فيهو .. ازيك يا الصافي .. الصافي قاليهو .اهلن .
قاليهو انت كويس ؟ الصافي قال ليهو ايوة كويس .. ولا بطني طمت ولا طرشتا .. امي ساكت شالت كيس .. قالت لي الباص بخج البطن .. والزول بطرش .. لكن انا ولا طرشت ولاشي ..
عطية قال ليهو ياخي انت زول تحفة ههه
اها والبلد كيف ؟
الصافي ماجاوب على السؤال.. لكن سأل سؤال . قال ليهو انت ياعمو هسع غنمكم وينن ؟ ماعندكم ولا نعجة؟
قال ليهو ماعندنا نعاج يا الصافي ..
قال ليهو طيب بتشربو شاي الصباح بشنووو؟؟
وبتاكلو الفطير بشنوووو؟ بتكلم بيديهو وبجر الواو بتاعة شنووووو ..
(هههههه فعلا الصافي تحفة)..
الامين وايمان جو على عطية ..
الامين قال ليهو ياعطية .. انت البيت كان مسكون ؟ ولا العفش ده حق منو؟
قال ليهو لالا يا الامين.. لا كان مسكون ولاحاجة ..
العفش وينو هو ؟؟ .. ياهن السراير والازيار .. والمواعين الفي المطبخ؟
ديل حقاتكم انتو .. على بال ماتدبرو اموركم .؟
الامين قال ليهو ياعطية شنو ياخي التعب ده؟؟ .. ياخي بتبالغ .. انت ماكفاية انك دبرت لينا السكن ؟
قال ليهو مافرقت يا الامين.. انا وانت واحد .. بس ان شاء الله البيت عجبكم .. قال ليهو والله ماكنا متخيلين ذاتو بكون بالطريقة دي .. ياخي ده زي بيت على ود حمد .. علي ود حمد ده من الاغنياء في الحلة ..
وايمان شكلها فرحانة بالوضع .. ومبسوطة من البيت .. ودايرة تشكر عطية وباقيه ليها تقيلة ..
قامت براحة كدا قالت لي الامين اشكرو يا الامين .. ادعي ليهو اعمل اي حاجة ..
الامين قال ليهو والله ياعطية ربنا يجزيك خير ياخ.. والله ماقصرت .. ان شاء الله نخدمك في الايام الطيبة.. والله معروفك ده ح يفضل دين في رقبتي ..
قال ليهو ده شنو يا الامين الكلام البتقول فيهو ده؟؟ ياخي نحن اخوان زي اولاد الام والابو ..
اها انا بمشي بي غادي.. البس احصل السوق.. الليلة مخصوص مامشيت عشان انتو جايين .. اها يازول عطية مشى طوالي بي غادي لي بيتو .. موش عشان يبلبس وبس .. كمان عشان يديهم راحتهم .. والمراة تملص هدومها وكدا .. ساق معاهو الصافي ومشى .. وخلا ديل براهم .. وايمان بقت ترتب في الحاجات .. وتنضم براها .. والله غايتو عطية ده.. الله يبارك في ايامو .. هسع عليك الله من غيرو كنا ح نتصرف كيف ..
وبتتكلم براحة .. الامين ماسامع حايم برة .. بعاين للزقاقات.. وبتفقد في الشبابيك ..
بعد عطية لبس .. جاهم يودعهم .. وجاب معاهو الصافي ..
على كل حال استقرو نفسيا كدا .. بعد ماطلع عطيه .. الامين طلع بعدو بشوية على السوق القريب .. سوق الشمالي .. وجاب ليها الخدار وللحمة والعيش وقال ليها ظبطي الغدا انا داير لمن يجي عطية يلقا الغدا جاهز.. الزول ده كفاهو من اكل العزابة ونسوان السوق ..
ختا ليها الحاجات واخد ليهو ونسة مع الصافي ومرق ..
في نفس اليوم زي الساعة 3 كدا نسوان الحلة الجيران اتلملمن وجن يسلمن عليها ويتعرفن عليها .. وكل واحدة جابت معاها غدا .. نظام جارة جديدة وكدا .. ودي ميزة في ناس عطبرة والدامر قد نادرة في بقية المدن .. قعدن اتونسن مهاها واتغدن وشربن الجبنة.. والصافي طلع الشارع مع الشفع يلعب .. طبعا جديد كرت على الاولاد .. وقاعد بعيد .. وهم كانو بلعبو في نص الشارع.. بطقشو البلي .. وهو طبعا" اللعبة دي مابعرفها ..
قال ليهو تعال العب معانا .. قال ليهم لالا دي مانخابرا .. واحد قال ليهم يعني مابعرف ليها ..
بس قاعد في الضل وبتفرج فيهم .. بعد شوية جو شفع اتنين ساكين ليهم كديسة .. صغيرة كدا وضعيفة .. ماقادرة تجري كويس .. الصافي وقف بقى يعاين ليهم ..
ديل البلعبو في البلي وقفو اللعب .. وبقو جارين معاهو .. قبضو الكديسة.. والصافي يعاين. واحد فيهم خبطها بي نص طوبة في راسها ..
الكديسة داخت .. والصافي قال ليهم .. لا لا ماتكلتلوها خلوها تمشي لامها .. امها بتكون راجياها ..
واحد قال ليهو امشي لامك انت .. بتكون راجياك ..
وتاااح ادو الكديسة طوبة تاني .. الكديسة دشرت الدم بي خشمها ونخريها .. وسلمت الروح .. وهم يضحكو ..
يازول الصافي ده انفقع بالبكا ..
وديل طيرو عينيهم بقو يعاينو ليهو مستغربين .. ده مالو ده؟؟
الولد ده بكى بكا .. لامن مخاخيتو سالن .. والدموع دي ماتديك الدرب .. وقام مشى دخل البيت يجعر .. لقى النسوان الكانن مع امو يادوب طالعات .. واحدة مسكتو دايرة تتكلم معاهو.. نتل يدها كدا ودخل ..
المراة قالت لي رفيقتها تلقى الاولاد البرة ديل دقوهو .. اصلهم قليلين ادب ومامربيين ..
دخل لي امو .. امو طالعة من الغرفة شايلة عدة الشاي.. مدخلاها المطبخ .. ختتها في نص الحوش.. وجات جارية عليهو .. مالك يا الصافي .. الدقاك منو؟
قال ليها مافي زول دقاني.. بس الاولاد كتلو الكديسة العيانة ..
قالت ليهو كتلوها كيف ؟.. قال ليها ضربوها بالطوب في راسها ..
لامن مانخرتها جابت الدم .. ايمان مسكتو قشت ليهو وشو وخشمو ونخريهو بي طرف توبها .. سبحان الله .. (الام) .. لا بتقرف ولابطنها بتطم .. و قالت ليهو خلاص ماتبكي ديل ربنا بحاسبهم براهم .. انت ماكتلتها انت ماك معاهم ..
قال ليها الحلة دي كعبة .. ارحكاكي اهلنا .. قالت ليهو اصلا ما ح نقعد كتير.. بس انت اصبر شوية .. احتمال الكديسة امها تجي عشان نديها لبن ونمشي نرجع اهلنا .. قال ليها كويس .. وشكلو اقتنع بي كلام امو .. لكن برضو مازال بتنهد ممغوص .. مشى طلع في السرير .. بي باقي بكاهو .. ويتنهد
ودخل في نومة .. والوكت ده الامين مافي .. لانو لو كان قريب .. مابستحمل يسمع الصافي ببكي ..
ايمان ختو نايم ودخلت تجهز في الغدا .. والساعة ماشة على خمسة وشوية
بعد شوية جا عطية دق الباب .. ايمان قالت ليهو منو؟؟
قال ليها انا عطية يا ايمان .. افتحي الباب .. قالت ليهو دقيقة النلبس توبي .. لبست توبها وجات .. فتحت ليهو الباب .. سلمها كيسين .. وقال ليها وين الامين؟؟
قالت ليهو والله مانخابراهو .. من الضهر مافيش ..
قال ليها كويس انا بمشي بي غادي بنتظرو لامن يجي .. قالت ليهو الله يبارك في ايامك يا عطية .. ويديك الفي مرادك .. فتحت الاكياس .. لقت الشعيرية والبسكويت ولبن البودرة . وصندوق بتاع باسطة ..
قعدت تتبسم براها .. قالت شوف عطية.. التقول بالله سمع الصافي.. من الصباح شوقو في باسطة ..
بعد شوية الامين جاء ..
قالت ليهو كنت وين يا الامين؟؟ .. قال ليها طلعت كدا لاقدام.. على السوق بتاع حي المطار قدام كدي ..
قالت ليهو ده وين كمان؟؟ نعلو مو بعيد؟؟
قال لالا قريب .. عندي صاحبا لي قديم مشيت اسلم عليهو ..
الامين بعرف عطبرة كويس .. وفي السنوات الفاتت كان بجي مرة مرة .. يعني جا عطبرة كتير ..
لكن ايمان ماجات غير تلات مرات .. واحدة لي بكا مع نسوان شوقار .. واحدة جات لي اوراق ثبوتية .. واحدة ماعارف شنو المهم ..
هو بعرف عطبرة اكتر منها ..
اها حكت ليهو الحصل مع الصافي في الشارع .. قال ليها حرام عليهم والله.. الصافي ولدي معاهو حق .. كيف يكتلو الكديسة المسكينة ..
هسع تلقيها مسوينها لعبة ..
قالت ليهو غشيت عطية بي غادي؟ جا قبالك بشوية.. وبكون جيعان .. دقيقة انا مجهزة الغدا .. النديك ليهو تشيلو.. تمشي ليهو بي غادي ..
ودخلت على المطبخ حفيانة .. جات شايلة الصينية.. وتتبسم وتعاين للامين .. قال ليها مالك يا ايمان .. ؟
قالت ليهو مافي شي والله.. حاسة بي روحي فرحانة ساي ..
هاك شيل الصينية . امشي امشي وتعال بقول ليك بعدين .. شال منها الصينية ومشى بي غادي لي عطية ..
وقعدو يتغدو ويتونسو ..
عطية قال ليهو اها ان شاء الله ايمان البيت يكون عجبها ..
ان شاء الله ماشكت من حاجة .. قال ليهو والله تمام مرتاحة ومبسوطة تتبسم براها ..
قال ليهو والله ايمان تستاهل .. وانت تستاهل يا الامين .. انتو هسي بقيتو لي اهل وتقلة ..
انا من متين ما اكلت لي اكل ينفعني ..
الامين طبعا متوقع انو عطية يقول ليهو لقيت ليك شغل .. وماداير يسبق الحوداث ويسألو ..
وعطية ساكت مسااافة كدا.. وقال ليهو عارف يا الامين .. والله انا واقع في مشكلة كبيرة خلاص ..
قال ليهو مشكلة شنو يالطيف.. يالطيف .. والامين وقف الاكل ..
قال ليهو والله مشكلة صعبة يا الامين .. وانا ماداير ناس البلد يعرفوها.. اذا انت بتعاهدني انك تسكت وما تتكلم .. انا بقولا ليك ..
قال ليهو افوو يا عطية .. انت لو شايفني قوال وبتاع كلامات ماتقولا لي ..
عطية قال ليهو لالا والله.. انا واثق منك.. لكن خايفك يوم خشمك يعتر .. وتكلم ايمان .. والكلام كان وصل الحريم.. تاني خلاص .. اذاعة لندن ذاتها تكون مقصرة ..
قال ليهو مافي زول بعرف مني انا يا عطية ..
قول بس المشكلة شنو؟ وانا بقدر اساعدك بشنو؟
الى اللقاء ....