الصافي... طارق اللبيب

الحلقة الثانية عشرة

عطية والامين طلعو من العذابة فرحانين فرح شديد .. الحمد لله .. والامين كان مقلق قلق غريب.. بس داير باي طريقة يسافر لانو خلا ايمان متألمة الم لايحتمل ..
عطية قال ليهو اصبر لا باكر .. الليلة الجمعة باكر اركب الصباح بدري .. وامشي اصلا الوقت معاك..
قال ليهو انت عارف ياعطية .. انو القروش دي مابتكفي العملية .. وانا ماشي الخرطوم .. اشوف احمد ود خالة ايمان .. لو يديني ان شاء الله.. والله ماعارف اعمل شنو ذاتو .. قال ليهو يازول خليها على الله .. بس لازم تنتظر لا الصباح ..
المهم اصر عليهو انو ينتظر للصباح ..
الصافي في البلد امو فارقة عليهو فرقة شديد.. وماقادر يستحمل فراقها وبحاول يحفي مشاعرو عن ناس البيت عشان مايقولو شافع صغير..
وهسي في اللحظة بتكلم مع خالتو قال ليها انتي ياخالتو امي دي ما كلمتك عيانة عندها شنو؟
قالت ليهو امك بس عندها صداع ..
قال ليها لكن الصداع ده يروح منها متين وتجي؟؟ .. والله انا اشتقتا ليها ..
قالت ليهو والله يا الصافي.. هسي هي سافرت الخرطوم للدكتور .. عشان يعالجها .. بس انت في صلاتك ادعي ليها ربنا .. قول ربنا يشفيها وترجع لينا بالسلامة ..
قال ليها انا طوالي بقول .. بقول ياربنا تشفي امي .. وجع الراس يروح منها ..
وربنا اصلا اي حاجة اقول ليهو اعملها لي.. بعملا لي .. وهسي امي حيبقيها كويسة .. انا متأكد .. بس ماعارف متين حيبقيها كويسه ..
قالت ليهو وانا متأكدة يا الصافي .. ربنا ما ح يخيب ظنك .. وانت كل ما صليت ودعيت .. كل ما امك بقت كويسة .. قال ليها كويس انا عندي حاجة بدعي بيها .. كلمتني بيها امي .. قالت ليهو دعاء ذالنون موش؟ قال لسها ايوا انتس الكلمك منو؟
قالت ليهو ده طوالي بتقولو امك من زمان.. نحن حافظنو منها ..
وبقى كل مايصلي .. يقول دعاء ذي النون عليه السلام الوصتو بيهو امو .. لا اله الا انت سبحان اني كنت من الظالمين ..
الليلة الصافي قام بالليل .. وقعد على حيلو .. وجا رقد جم خالتو.. قايلها دي امو.. كان ناسي انو امو سافرت.. (نعسان وكدا) فجأة انتبه انو دي خالتو ما امو ..
قام رجع سريرو .. وقعد يبكي بانتحاب خفي .. من شدة شوقو لي امو ..
خالتو حست بيهو ببكي .. عرفت انو ببكي عشان فاقد امو .. وعملت فيها نتيمة ..
المهم هو قام من السرير .. الولد اتوضا برة وجا فرش المصلاية وقعد يصلي ..
وخالتو مراقبة .. وفي صلاتو قعد يبكي.. بعد ماصلى ركعتين .. رفع ايديهو الصغيرونات ديك وقال ..
يا الله انا كتير قلت ليك اشفي امي.. وروح منها الصداع .. وقلت ليك جيبها لي سريع.. انا اشتقت ليها .. يا الله انا بحبك شديد .. وبحب امي ..
لو انت ما داير تعالجها .. خلاص بس خليهم يودوني ليها.. في الخرطوم ..
لكن انت ماحصل ابيت لي في حاجة .. خليها تبقى كويسة بس .. ثريا خالتو قعدت تبكي جنس بكا .. وكاتمة بكاها .. وقالت يابختك يا ايمان اختي .. فعلا ولدتي وربيتي.. الله يحفظك يا الصافي .. ماشاء الله تبارك الله .. ياريت الاولاد كلهم زيك يا الصافي ..
الكلام ده كان يوم الجمعة بالليل .. وفي نفس اليوم ابوهو كان مسافر بكرة الصباح ..
الامين شايل هم الدنيا والعالمين .. من الالم العند ايمان وماقادرة تحتملو .
اها يازول الصباح .. قام معاهو عطية ووصلو الموقف.. وركب وودعو.. وقال ليهو اول من تصل اضرب لي تلفون عند عمر .. انا بمشي ليهو مخصوص .. عمر ده جار الدكان الباعوهو ده ..
وقال ليهو يا الامين ماتنسى كلام ذا النون .. قال ليهو حضر ان شاء الله ..
اها يازول الامين اتحرك.. وعطية نيتو الطيبة .. وقلبو الابيض ظاهرة فوق نظرات الوداع.. الودع بيها الامين ..
المشكلة المؤرقة الامين.. انو الاربعة مليون الشايلا دي .. ما بتم حق العملية .. لكن كان جواهو يقين.. انو ربنا بفرجها عليهو ..
الامين وصل بحري الحنينة .. زي الساعة 11 ونص .. ونزل طوالي على البيت ..
لقى الوضع في البيت طبيعي .. وسلم على الناس .. وقال ليهم ايمان كيف ؟ قال ليهو يهديك بتورق في الملوخية ؟
الامين نطط عيونو قدر الفنجان .. طوالي قام جاري عليها ..
شنو يا ايمان؟؟ انا خليتك راقدة وماقادر تتكلمي ..
بعد سلمت عليهو .. قالت ليهو والله الحبوب الاداني ليهن الدكتور ديل.. قويات شديد يا الامين .. انا من البارح بعد صلاة الجمعة .. حسيت باني بديت اخف شوية شوية ..
صحيت الليلة صلاة الصبح .. لقيت الالم شبة اختفى .. بس لسه حاسة بي راسي تقيل يعني .. قال ليها خلاص بس انتي الحبوب دي ماتوقفيها.. لغاية مايجي يوم العملية.. انا اكتر شي مزعجني الالم ده .. لو بروح الالم لغاية يوم العملية بنشيلو من جذورو وخلاص ..
قالت ليهو الله يسهل يا الامين .. اعفى لي يا الامين .. تعبتك معاي شديد.
قال ليها انتي بتقولي شنو يا ايمان؟ .. انا والله في شان شفاكي وعلاجك.. ابيع نفسي في سوق العبيد .. بس انتي تكوني كويسة ..
قالت ليهو والله الحمد لله يا الامين.. انا البشوفني هسي.. مايشوفني امس الصباح .. امس حسيت اني ما بقعد لغاية المساء .. بس الحمد لله.. الناس في صلاة الجمعة .. حسيت الصداع بدا يخف .. وكل راس راس ساعة بخف بخف .. سبحان الله .. من العشاء نومت.. بعد ما كنت بساهر الليل زي لمبات الجامع .. نومت الحمد لله قمت قبيلك مع الفجر نشيطة وجسمي مرتاح.. والصداع شبه مختفى بس حاسة بالتقل زي ماقلت ليك والخدر ..
قال ليها بدا يخف من صلاة الجمعة ؟؟
قالت ليهو اي نعم ..
قال ليها سبحان الله نفس الوكت الانا .......... وقطع الكلام ..
قالت ليهو نفس الوكت شنو يا الامين؟؟ .. مالك قطعت الكلام ..
طبعا هو داير يقول ليها ده نفس الوكت الاتخلصت فيهو من قروش الحرام .. لكن غلبو يتم الكلام .
قال ليها نفس الوكت الكنت بدعي ليك فيهو.. حسيت بانو ربنا استجاب لي ..
قالت ليهو ماحكيت ليك واخدت ليها بسمة كدا .. شفت يا الامين قبيل قبا الصبح .. و انا نايمة حلمانة بالصافي بدعي لي دعاء يضحك .. بس مافرزتو بقول في شنو .. لكن حسيت انو ربنا حيستجيب ليهو.. سبحان الله ..
والله ياجماعة ناس كتيرين ممكن يقرو القصة دي.. ويقولو دي مبالغات .. لكن والله الزول البكون عندو يقين بالدعاء .. بشوف العجائب من رب العالمين . بس المشكلة انو الناس بقت يقينها ضعيف .. واجابة الدعاء كتير من الناس بقو بشوفوها من المعجزات .. لكن والله الناس لو مسكت في ربنا ..والحت في الدعاء والله يشوفو العجب .. واسأل مجرب ..
المهم الامين ارتاح نفسيا .. والزول ده فرح شديد بي انو ايمان خف منها الالم .. وقال ليها بس الشي الطالبو منك الحبوب دي.. ماتوقفيها ابدا ..
قالت ليهو والله ان شاء الله يا الامين ..قالت ليهو يا الامين انا طالبة منك طلب.. ياريت ماتردني .. خلي صديق اخوي يمشي يجيب لي الصافي عليك الله يا الامين ..
قال ليها انا يا ايمان والله ذاتي اشتقت للصافي .. لكن كلها كم يوم وتعملي عمليتك وتمشي ليهو.. مافي داعي نتلتل الولد يسافر ويجيب داك ويجي .. قالت ليهو انا كلمت صديق وماعندو مانع.. بس راجين موافقتك ..
قال ليها كويس كويس .. ان شاء الله . هسي احمد وين ؟ قالت ليهو مارجع من الشغل .. الملكة وعشة وناس البيت كلهم مستبشرين خير .. لانو قبيل في جارتهم دكتورة صغيرة كدا.. جات الليلة الصباح .. قالت ليهم مادام الالم خف م.. عناها البتاع ده ماياهو الحاجة الخايفين منها ديك ..
وقالت ليها وقفي المسكن .. نشوف لغاية المساء البحصل شنو ..
قالت ليها المسكن من البارح المساء تاني انا مابلعتو .. بس شغالة في الحبوب الاداني ليها الدكتور .. قالو مضادات حيوية ..
الامين مشى بي غادي لقى صديق قاعد .. سلم عليهو وبسأل فيهو ..
قام صديق قال ليهو .. يا الامين ايمان دي دايراني اسافر اجيب الصافي ..
وانا من راي المفروض اسافر اجيبو .. لي نفسياتها ساي . رايك شنو؟
الامين قال ليهو كويس خلاص.. باكر سافر طوالي ..
قال ليهو باكر ليه يا الامين هسي بمشي موقف شندي.. الضهر بكون هناك.. باكر بجيبو وبجي .. فطر واتحرك مشى يجيب الصافي ..
الكلام ده كان يوم السبت .. والمفروض ايمان يكون عندها مقابلة يوم الاتنين .. عشان العملية ح تكون يوم التلاتا ..
لغاية المساء مافي اي مسكنات .. لكن رجع صداع خفيف جدا مستمر .. بس مقدور عليهو ... وبالليل قدرت تنزم عادي .. وصحت الصباح .. وكدا يومين بدون مسكنات والصداع موجود بس خفيف.. يعني مافي اي مقارنة بينو وبين الصداع الجات بيهو من اهلها ..
.. اها تعالو نشوف لمن صديق اخو ايمان وصل لي للبلد عشان يسوق الصافي ..
اول ما صديق وصل البيت ودق الباب.. (سالام عليكوووووم) .. الصافي سمعو ,, قال ليها ثريا ثريا.. والله اشارطك ده خالي صديق ..
قالت ليهو كضاب .. صديق البجيبو شنو؟
قال ليها اها من كم لي كم؟؟ قبل مايجي .. قالت ليهو .. من حبة منقة لي حبة منقة .. قال ليها اها عايني ليهو ده منو؟
والصافي جري يسلم على صديق .. مسكو من يدو كدا بسلم عليهو والصافي بعاين للباب.. داير يشوف امو وابوهو جو ؟
صديق قال ليهو (ها جنا ها) .. بتعاين لشنو؟ امك في الخرطوم ..
الصافي جاهو احباط .. ومد قدومو كدا .. صديق قال ليهو لكن يا الصافي انا عندي ليك بشارة.. تدفع كم واقولا ليك ؟ قال ليهو بديك حبة المنقة ..
قال ليهو ياتوحبة منقة ؟ قاليهو حقة شراطي مع خالتي ثريا .. بس انت قول لي البشارة ..
قال ليهو يا زول ااتفقنا .. البشارة هي ....... وسكت قعد يضحك..
قال ليهو عليك الله يا خالي تقوووول .. والله هسي انا ببكي ليك .. بطول حسي ..
قال ليهو لالا اوعك .. البشارة هي انو انا سايقك الخرطوم باكر الصباح لامك وابوك .. يازول الصافي ده قعد ينطط ويعرض
زي عرضة ناس الدلوكة .. ههه ..
صديق قال لي ثريا ابوي وين.. ؟ قالت ليهو ابوي تحت في الزراعة ..
قال ليها البشارة الاكبر من كدا ,, انت ماعارفاها ..
ايمان الصداع خف منها شديد .. واحتمال ماتحتاج لاي عملية.. ولا جراحة .. قالت ليهو اوعك تكضب .. المرض العندها ده قالو أصلا مابروح ياصديق.. الا يكتل الزول ..
قال ليها والله الحقيقة في دكتورة صغيرة كدا .. قالت احتمال المرض ده مايكون عند ايمان من اساسو .. قالت ليهو ان شاء الله ياصديق من خشم ولي باب السماء ياود امي ..
الصباح يازول صديق لبس الصافي الصباح بدري وشال ليهو هديماتو في هانباك وساقو من ايدو على المواصلات .. اها لمن وصلو هناك .. كان اللقاء مبكي بين الصافي وامو .. اول من جا دخل البيت كدا عاين لي امو ماقدر يتكلم بس دموعو نازلة وجا مسك امو من نصها كدا ماقادر يصلا فوق عشان يسلم عليها بالاحضان وبقش في وشو بي توبها كدا عشان يزيل اثر الدموع وتاني يعاين ليها في وشها ..
اول كلمة قال ليها يمة انتي بقيتي كويسة صح ؟ قالت ليهو احسن
انت كيف اوعا يكون عملت ازعاج لي خالتك ؟
قال ليها انا شافع صغير بعمل ازعاج .. ؟
قالت ليهو ماشاء الله يا الراجل الكبير شايفة شنبك قام ههه
قال ليها لالا ماقدر ده كمان انتي ؟؟ الجماعة كلهم فقعوها ضحكة من كلام الولد الاكبر من عمرو بي كتير .. وسلم على الناس كلهم
وقعد في الكرسي وخلف كراعو .. طبعا الصافي بحاول يتصرف زي الناس الكبار ومابرضى الزول يقول ليهو يا شافع ولا كدا ههه
وناس البيت كلهم بس بتابعو في حركاتو
المهم الصافي وصل بحري .. وايمان مازال الصداع معاها بس خفيف.. وكل مرة تاخد ليها رقدة ومرة مرة تستفرغ .. الله يستر عليها .. الكلام ده كان يوم الاحد .. وبكرة المقابلة مع الدكتور .. ربنا يجيب العواقب سليمة ..
الى اللقاء ..