الصافي... طارق اللبيب

الحلقة التاسعة

  الظاهر انو الامين رجعت علاقته مع ايمان .. وايمان حاولت ان تتناسى احاسيسها .. والموضوع مشى طبيعي .. والقروش بتاعة القمار دخلت في البضاعة .. ومرت الايام ..
وفترت العلاقة بين الامين وبين عطية .. وعطية جاهو عقد عمل للسعودية . بواسطة صديقه العزيز موسى ودكنور .. واتخلص من دكان العدة في ظرف اسبوع .. وسافر الخرطوم للاجراءات ..
والامين فارق ناس عبدالمنعم ..
وعبدالمنعم فرحان انو حرم الامين من ندى .. وندى قطعت من الامين تماما ..
اما الصافي فحكاياتو تستحق الرواية فعلا" ويستاهل البطولة ..
..
الصافي الان مقبل على امتحان الانتقال من تانية .. لي تالتة وكان طالب مميز في الدراسة ونضيف وعاقل جدا ..
ونص الفصل بقو اصحابو .. نسبة لانو زول كريم .. وبحب دايما يصالح الاولاد المتشاكلين .. يوم حصلت قصة في المدرسة ..
الاولاد عندهم حركة اسمها حركة التدويرة .. بعملو للواحد حركة مغيظة عشان يزعل ويهيج ..
اها يوم في واحد من الطلبة اسمو سامي.. الاولاد في فسحة الفطور ختو ليهو موزة .. مفجخة في شنطتو .. سامي زول احمق لمن جا لقى الكراسات ملغوسة .. وراها الصافي .. قال ليهو عان ختو لي شنو في شنطتي ..
الصافي قال ليهو انت ولاتزعل .. ارح نمشي ننضف الكراسات بالمنديل .. ولامشكلة ..
قال ليهو انا كان عرفت الولد الختا لي الموزة دي .. هنا مابخليهو ..
الصافي قال ليهو انت مافي داعي تبقى شرير .. لو كان هو شرير ..
كدا المشكلة بتكبر .. والاستاذ بزعل منك .. ويكلم ابوك وابوك يزعل منك .. وامك وابوك يتشاكلو ..
الولد سرح مسافة كدا .. في كلام الصافي وقال ليهو كلامك صاح
انا ولابسأل ..
اها الطلبة لمن جو .. ولقو سامي نضف كراساتو .. ولا زعل ولا انفعل .. والحركة بتاعة التدويرة طلعت فالصو ..
سألو سريا كدا .. قالو ليهم ده الصافي مشى نضف معاهو الكراسات ..
اصلا في اتنين كدا .. من الاولاد عديمي التربية .. بتاعين الفصل .. البعملو الحركات دي .. هم العملو الحركة دي لي سامي ..
قالو نحن لازم ندور الصافي ذاتو ..
واحد قال ليهم .. انا بكرة بجيب لي معاي كيس فيهو عصير كركدي تقيل .. اول ما يجي الاستاذ .. والطلبة يقومو يقولو وعليكم السلام .. نرمي للصافي الكيس في الكرسي بتاعو .. وهو يقعد فيهو وبنطلونو يتملي .. وكلهم قعدو يضحكو ..بقت بتخيلو منظر بنطلونو من وراء مليان لون احمر زي لون الدم .. اتخيل ديل طلبة لسع ماكملو التسعة سنوات ..
وفعلا باكر الولد جاب معاهو كيس صغير كدا .. فيهو كركدي تقيل لامن مسود .. ورابط الكيس خاتيهو في شنطتو ..
اول من الاستاذ دخل الولد طلع الكيس .. وطلقو خلاهو فاتح .. الطلبة وقفو .. الاستاذ السلام عليكم . الطلبة وعليكم السلام ورحمة الله .. الولد طوالي رمى الكيس في كرسي الصافي ..اول من الصافي قعد حس تحتو في بلل .. اصلا ما قام ولا اتحرك .. وبقى الحصة كلها ما مركز فيها .. بس مركز في البلل الحاصل تحتو ده .. وخايف انو يكون بال بدون مايشعر ..
وبقى يفكر .. يتحلا من القصة دي كيف؟ .. لو قام طلع الناس بشوفو البلل في بنطلونو من ورا .. حتى بعد طلع الاستاذ .. والاولاد في الفصل كلهم اتحركو .. هو بس قاعد متسمر في كرسيهو ..
وطبعا الاولاد ديك كاشفنو .. ومنتظرينو يقوم بس .. عشان يقعدو يضحكو عليهو .. وهو مصر انو مايقوم .. وبقت المشكلة لمن يدخل الاستاذ للحصة الجاية .. لزوم يقوم .. طلع الدفتر بتاع الرسم اسمو الاستكتش وختاهو قدامو .. اول من جا الاستاذ بتاع الحصة التالية .. وقف .. وخت الدفتر بي وراهو كدا .. عشان يغطي البلل من الناس الواقفين وراهو مباشرة .. ههه
وكت الناس قعدو .. قعد براحة .. وسحب الدفتر ختاهو راجع في الشنطة ..
ومنطط عيونو .. وخايف من زول يكشف الحاصل .. الحاصل اللهو ذاتو ماعارفو ده شنو ..
دي كانت الحصة الاخيرة .. والبلل موجود .. بس طبعا البنطلون اتشرب اللون الاحمر .. والطلبة ديل كلهم طلعو .. جري علي البيوت .. والصافي قاعد متسمر .. عندو اصحابو اتنين بتكلمو معاهو .. الصافي انت ماماشي البيت؟ .. وهو بقول ليهم امشو امشو انتو .. انا بمشي بعد شوية .. في النهاية خلوهو ومشو .. والشفع الاتنين ديك العملو العملة . واقفين برة وبعاينو ليهو بالشباك .. وهو ماعارف ديل بعاينو كدا ليه .. وهم دايرين يشاهدو المضحكة ..
اها غايتو ربك رب الخير في استاذ طلع من مكتبو لقى الاولاد ديل واقفين في الشباك ..نهرهم قامو جارين .. جاء على الفصل عشان يشوف الاولاد ديل بتفرجو في شنو؟
لقى الصافي قاعد براهو في الفصل.. وعيونو ملانة دموع .. وخايف مرعوب ..
الاستاذ قال ليهو مالك يا الصافي؟؟ مالك قاعد براك في الفصل؟؟ .. الصافي ابا يتكلم .. لانو ماعارف يقول شنو ؟ الاستاذ قال ليهو قوم يا الصافي.. قوم امشي البيت.. الصافي برضو قاعد متسمر ..
لمن الاستاذ مسكو من يدو عشان يقومو ..
قال ليهو يا استاذ انا يمكن بولتا .. الاستاذ وقفو على حيلو كدا.. وعاين للكرسي .. لقى الكيس بتاع الكركدي فاضي.. لكن فيهو قطرات بسيطة راكنة في الاطراف .. وعاين لي بنطلون الصافي لقاهو مبلل ..
قال ليهو الكيس ده شنو يا لصافي؟ .. انت جبت معاك عصير من البيت؟ وختيتو تحتك؟؟ ..
قال ليهو لالا يا استاذ ماجبت معاي حاجة .. الكيس ده ماحقي ..
الصافي عرف انو الاولاد .. عملو فيهو العملية دي .. والاستاذ بقى محتار في العملية دي ..
قال ليهو خلاص يا الصافي.. انت ما بولت ولا حاجة .. ده كيس فيهو عصير .. الظاهر نساهو واحد من الاولاد .. وانت قعدت فيهو ..
الصافي قال ليهو لالا يا استاذ مابمشي كدا .. الا تنشف ..
قال ليهو ياولد نحن دايرين نقفل الفصل خلاص .. الصافي قعد يبكي ..
ويقول ليهو الاولاد برة .. بضحكو علي هم لسه في الشارع .. يقولو انا بولت ..
الاستاذ قعد يفكر ولقى حجة الولد مقنعة ..
قال ليهو طيب .. انا عندي ليك فكرة .. خش الحمام وكب موية في هدومك كلها .. في القميص .. وفي البنطلون من قدام .. يعني كدا مافي زول بعرف يا الصافي صح ؟
قال ليهو ايو صح .. وقام جاري جري على الحمام .. في الحمام في جركانة كدا مقطوعة .. بس بقى يملا فيها ويكب فوق راسو وهدومو اتبلبلت تب .. وبلا البنطلون كلو .. وجا طالع .. هههه بقى زي العصفور الكان واقع في الزير يحليلو .. هههه ..
لمن جا طالع .. الاستاذ قال ليهو يا الصافي امكن واحد من الاولاد خت ليك الكيس ده بالقصد؟
قال ليهو امكن ..
قال ليهو كويس لو عرفت حاجة زي دي .. لازم تكلمني عشان نعاقبو .. قال ليهو حاضر يا استاذ ..
وجري جري على البيت .. وبتلفت في الشارع .. مافي اي زول من الطلبة واقف ..
المهم يازول وصل البيت .. امو استغربت في الولد ده مبلول كدي مالو؟ .. مع انو البلل بدا ينشف .. لكن استغربت جدا ..
جاتو جارية .. ومسكتو كدا ؟؟ الصافي؟ مالك يا الصافي ؟؟ الموية دي شنو؟
قال ليها احح .. دقيقة دقيقة .. ارتاح شوية واحكي ليك ..
وشال نفسو وختاهو .. تحس بيهو زي القال الحمد لله وصلت البيت وزووول شافني مافي .. مشى غير هدومو .. وجا قعد ليها في نص السرير .. ورفع رجليهو وربعهم كدا .. وبدا يحكي في القصة .. من قصة الموزة الختوها لي سامي في شنطتو .. وامو قاعدة قدامو وهو يحكي .. ويغمض في عيونو ويبلع في ريقو .. ومندمج مع الحكاية ..
ولمن جاء يحكي في قصة البلل .. مسكتو عبرة حارة خلاص .. ومدا قدومو كدا زي الداير يبكي .. لكن واصل ..
قال ليها انا عارف البعملو الحاجات ديل منو .. شفت يا امي في ولدين كدا .. اولاد خالات .. هم البرمو الخنفسانة في الشنطة وبرمو الموز .. وبعملو حاجات كتيرة ماكويسة ..
قالت ليهو طيب انتو موش المفروض تكلمو ليهم الاستاذ؟ .. قال ليها لالا كدا ما كويس.. الاستاذ بجلدهم.. والله جلدو حار شديد .. وكدا حرام .. في ولد جلدوهو .. تاني يوم قالو بقى عيان ..
قالت ليهو اها يا الصافي الحل شنو؟
قال ليها انتي اصبري.. هم براهم يكبرو ويبقو فاهمين .. انتي موش قاعدة تقولي لي .. بكرة تكبر وتبقى فاهم؟
سكتت بقت تعاين ليهو كدا .. مبسوطة .. قالت ليهو خلاص بس انت اعمل حسابك وخليك واعي .. لكن ايمان بقت مقلقة .. قالت بعد ماكيس كركدي .. امكن يوم يقومو يعوقو الولد بي حديدة.. او قزازة يختوها ليهو ..
اها لمن جا الامين من الشغل قالت ليهو انا بكرة ماشة المدرسة بتاعة الصافي ..
قال ليها نعل مافي عوجة.. قالت ليهو في اولاد مؤذيين .. ولازم اشتكيهم للمدير .. قال ليها ماتعلمي الولد انو يكون ضعيف .. خليهو يدافع عن نفسو براهو ..
قالت ليهو انا علمتو يكون متسامح .. لانو الاطفال اصلا" مامحتاجين زول يوصيهم في الدفاع .. محتاجين زول يوصيهم على التسامح .. الشافع العمرو سنتين .. لو قلعتا منو حاجة .. بقعد يصرخ ومابرضى لنفسو الحقارة.. دي طبعة في الانسان يا الامين .. لكن الانسان البتصف بالتسامح .. بكون فوق المستوى العادي .. قال ليها انتي الكلام ده بجيبي فيهو من وين؟ .. قالت ليهو الله كريم .. المهم ايمان منطقت ليك الامين زي الماحصل شي ..
وباكر ايمان مشت للمدرسة.. متخفية تتلبد عشان الصافي مايشوفا .. ودخلت على مكتب المدير .. وحكت ليهو .. وقالت ليهو بس انا ماعايزاك تجلد الاولاد .. بس حاولو اتكلمو معاهم .. وحذروهم ..
الصافي طبعا في الفصل .. حكي لي الولد الاسمو سامي .. قال امبارح حصل حصل ..
الولد قال ليهو خلاص تعال نكلم ليهم الاستاذ .. قال ليهو لالا كدا المشكلة بتزيد .. هسي نحن ماحصل لينا شي .. اعمل فيها ماعارف.. قال ليهو خلاص تعال ندقهم .. قال ليهو لالا انا كدا ببقى زول شرير .. وابوي وامي بزعلو مني .. المهم سامي سكت بي مغستو ..
المهم الاستاذ الكان حاضر القصة امس ..سمع الكلام من المدير
وجا الفصل .. وقال لللاولاد .الختا كيس الكركدي في كرسي الصافي منو ؟
بتتكلمو ولا أجلد الفصل كلو ؟؟ .. في ولد خاف وقال ليهو ديل فلان وفلان .. ياهم اولاد الخالات .. الاستاذ قال ليهم اطلعو تعالو برة هنا .. امش ياولد جيب لي الصوط ..
بس الصافي قعد يبكي ..
الاستاذ قال ليهو بتبكي مالك ياولد؟ انا ماعايز اجلدك انت .. انا عايز اجلدهم هم .. الصافي قال ليهو عارف .. لكن عليك الله يا استاذ ماتجلدهم .. قال ليهو ليه يا الصافي ؟ انت خايف منهم؟
قال ليهو لالا .. ماخايف منهم ..لكن لو جلدهم بعيو .. الجلد حار .. عليك الله يا استاذ . خليهم انا عفيت ليهم .. الاستاذ قال للولد المشى يجيب السوط .. تعال خلاص ياولد سيب الصوط .. والاستاذ استغرب في تصرفات الصافي الاكبر من عمرو بي كتير وكمية التربية وطيبة الروح المفقودة حتى في الناس الكبار .. الاستاذ خت الكتاب الشايلو .. وبقى محتار وبتذكر في الحالة الكانت حاصلة على الصافي امبارح .. وبنطلونو مبلل بالكركدي .. وهسي التسامح الظهر منو في اللحظة دي .. فعلا الصافي .. كان غرس بذرة طيبة اهتمت بها ايمان غاية الاهتمام
وبدت ثمارها تظهر في زمن مبكر جدا ..
اها بعد نهاية الحصص في واحد قال للصافي الولدين منتظرنك في الشارع دايرين يدقوك عشان انت قولت للمدير .. قال ليهو مابقدرو يدقوني .. والله انا قوي هوي .. وفعلا الصافي لمن طلع لقى الولدين واقفين في الشارع .. وفي كمية من الاولاد واقفين .. دايرين يحظرو الدقة ..