الصافي... طارق اللبيب

الحلقة السادسة عشر

ايمان قالت ليهو .. والله يا الامين .. عاد انت اكتر زول بتعرف مصلحتك وين .. انت براك شفت الدكان .. وشفت شغل البصل .. الشايفو اخير ليك سويهو.. لكن كان انا كنت في محلك .. بسوي الاستخارة في ده وفي ده .. لانو الزول مابعرف البحصل بكرة شنو.. ربنا هو العالم بي ربحك لي قدام وين .. وخسارتك وين ..
قال ليها والله كلامك حقيقة.. الزول يستخير..
وده الصح.. المفروض اخونا الامين يستخير الله.. وبعدين البسهلا الله هي البكون فيها الخير.. والبتتعكس عليهو.. بتكون مافيها خير .. ودي اصلا فكرة الاستخارة كدا ..
في ناس يقول ليك.. انا والله استخرت.. وشفت منام ماكويس .. عشان كدا خليت الموضوع .. مين قال كدا ؟؟ الاستخارة ياجماعة ماعندها علاقة بالاحلام ..
ممكن تكون الحاجة كويسة .. وانت تشوف حلم من الشيطان يضللك .. عشان كدا الزول مايربط الاستخارة بي حاجة يشوفها في النوم .. وفي ناس كمان عندهم فلسفة ك.. دا بعرفو ليها براهم.. الواحد يقول ليك انا استخرت وما ارتحت للموضوع .. او يقول انا استخرت وحسيت بي ضيق .. برضو ده كلام فاضي ..
اصلا الاستخارة معناها .. انت بتقول فيها يارب كان الموضوع فيهو لي خير سهلو لي .. وكان فيهو لي شر اصرفو عني ..
وبتمشي في الموضوع .. كان اتسهل واتوفقت فيهو .. معناها ده اختيار ربنا البكون فيهو الخير .. واذا الموضوع اتعكس وانصرف .. معناها ده موضوع مافيهو خير ربنا صرفو عنك .. دي معلومة مهمة حقو نكون عارفنها .. طيب ..
الامين الصباح عمل الاستخارة .. لانو فعلا كان متردد في الموضوع.. وسبب التردد هو .. انو شايف الارباح في البصل اسرع واكتر من الدكان .. ومن ناحية وجدانو مرتبط بالدكان .. وحاسي بي انو فقدو شديد.. لانو فيهو ذكرياتو الطيبة كلها ..
طلع مشى على سوق البصل.. وطبعا الزول ده هناك كون علاقات وصداقات عجيبة .. وللعلم لي الناس البمشو سوق الخدار.. والبمشو سوق البصل.. وسوق الملابس .. بالمناسبة الاسواق دي مؤسسات عجيبة .. وناسها بتعارفو .. وبينهم علاقات ومعارف وزمالات .. سبحان الله .. الواحد بكون عارف الحاجات العندو.. والحاجات العند زملاهو التجار الاخرين .. يعني تجي تقول ليو عايز الشي الفلاني .. يقول لك انا ماعندي .. لكن بتلقاهو عند فلان .. في الشارع التالت .. الدكان نمرة 4
يعني بكون عارف كل تفاصيل البضاعة الفي السوق.. عندو ولاعند زمايلو ..
اها الامين انصهر في السوق ده.. وبقى عندو باع ماشاء الله .. وعندو محل معروف .. بنزل فيهو بصلو ويبع منو ..
نص النهار كدا مشى يشوف خبر الدكان.. ومشى قابل صاحبو تاجر الاجمالي داك.. قال ليهو خبر الدكان شنو؟ نمشي نبدا تفريز؟ قاليهو والله يا الامين ياخي انا اسف شديد .. نحن طبعا امبارح.. قلنا ليك الراجل قال داير يبع الدكان.. عشان يراعي اخوهو هناك .. الليلة الصباح بس الزول ده قرر .. انو يرجع عطبرة.. ويفتح دكانو .. و قبيل الصباح قابلني بالتلفون .. وشاورتو في قصة الشراكة .. وقال هو داير يعمر الدكان براهو.. وقال الشراكة دي مابتنفع معاهو .. انت يازول ربنا يقسم لك اخير من الدكان ده ..
شوفو ياجماعة.. الاستخارة بتطير منك المواضيع بالطريقة دي .. يعني الموضوع براهو بطير من يدك .. وانت قد لاتعرف السبب الصرف منك الموضوع شنو؟ .. لكن لي قدام ممكن تكشف السبب .. وفي النهاية كان عرفت ولا ماعرفت.. ربنا بصرف عنك الشر وبس.. ودي من فوائد الاستخارة .. معناها الدكان ده مافيهو اي خير لي الامين ..
ولو تابعتو القصة .. بتعرفو ليه كان انصراف الدكان فيهو خير ليهو ..
طيب قبل يومين من الان عبدالمنعم القمرتي متذكرنو؟ .. كلم نبيهة حبيبتو.. انو الامين وصل .. وعندو مساعي يرجع دكانو .. على حسب الاخبار .. ونبيهة كلمت ندى .. وندى ونبيهة كانو منتظرين الامين يجي.. يفتح الدكان .. كل يوم بجو السوق ويلقو الدكان مقفول .. وماعارفين الامين شغال بصل في سوق الخدار ..
نبيهة سألت عبدالمنعم .. قالت ليهو انت ياعبدو .. الحصل شنو في موضوع الامين ودكانو ؟ قال ليها انا شايفك مهتمة بالامين ودايما بتٍسألي منو .. الحاصل شنو يانبيهة . ؟؟
الكلام ده طالع من ندى ولابتٍسألي منو براك؟؟ ..
طبعا هنا نبيهة احتارت شديد .. لو قالت ليهو ندى بتسأل منو معناها الخطة طرشقت .. ولوقالت ليهو بسأل منو براي ح يشك فيها ..
قالت ليهو انا بقول ليك كلام سر بس ماتقول لي ندى .. ندى قالت دايرة تنتقم من الامين.. لانو غشاها ..
قال ليها ده كلام هوا ساي .. كمان جانا انتقام البنات؟ .. البت قالو كان فاس مابتشق الراس .. انتن قليلات حيلة ساي وكلامكن كتير .. الانتقام ده خلوهو لي ابان شنبات ديل ..
المهم طبعا يانبيهة.. الامين خلا الدكان واشتغل في سوق الخدار .. ببيع البصل .. قالت ليهو مابصدق والله .. قال ليها امشي براك يوم سوق الخدار.. واعملي فيها دايرة تشوفي البصل بيكم.. شوفي بتلاقيهو وللا لا..
قالت ليهو ياحليلو فلس .. طبعا يا عبدو ناس الخدار ديل اكتر ناس فلسانين وقحطانين صاح؟؟ .. قال ليها صاح يانبيهة النبيهة ..
طبعا قال ليها بسخرية .. لانها مافاهمة التدعكها ..
نبيهة طبعا طوالي قامت مشت .. حكت لي ندى المنداحة .. قالت ليها .. تعالي تعالي يا المخستكة .. والله انتي غايتو زولة شومة وهقيتة .. الزول المتخلف ده .. قالو خلا الدكان ومشى اشتغل في سوق الخدار بتاع بصل ..
قالت ليها اوع تقولي لي الامين ؟ مابصدق اصلو..
قالت ليها والله عبد المنعم حكا لي كدي ..
ندى قالت ليها خلاص باكر الصباح.. نقوم نمشي نسجل ليهو زيارة بين الشوالات .. ونوريهو انو نحن كشفناهو ..
قالت ليها يعني انتي خلاص قنعتي منو؟ وبي كدا ماعايزاهو ؟
قالت ليها منو دي ؟ انا دي؟ .. بري يايمه .. والله ناس نعومة وجواهر .. يسوني مضحكة في قعدات الجبنة.. يقولن عرست ليها راجل مرة .. وبتاع بصل ههه ..
لكن بس نمشي ليهو في السوق .. ونذلو نهينو ونجي ..
قالت ليها ياندى مافي داعي والله.. الزول ده مايستاهل .. غايتو انا ما موافقاك في تصرفات الشر.. بس دايرة تعرسيهو تعرسيهو .. ولاتشتغلي بي كلام الناس ..
خليهن يقولن اول البصل مالو؟ ماكلهن قاعدات يقطعن البصل ويسون الملاح .. اجي يا البصل؟
قالت ليها يانبيهة لزوم البريتسج.. انا مستحيل اعرس واحد ببيع البصل في سوق الخدار وده اخر كلام .. قالت ليها وحات الله يا ندى .. اخير ليك من البورة .. ندى قالت ليها اووووووه يا نبيهة .. ياخي كرهتينا ذاتو شابكانا البورة البورة .. ماسمعتي المثل قالو بورة مضمونة ولاعرسة مجهجهة؟
قالت ليها خلاص مامشكلة.. باكر نمشي نقابلو والبتعمليهو اعمليهو .. انا اساسا كايسة لي مصلحتك.. وانتي مابتستاهلي .. يلا.
وفعلا بكرة قامن الصباح.. ماشات على سوق البصل .. في الطريق لقن الدكان فاتح من الصباح ..
ندى قالت ليها يهودا الدكان فاتح يانبيهة .. خليك واقفة في محلك ده.. خليني امشي اتشمشم واجيك .. قالت ليها اها امشي النشوف الشمشيم ده حدو وين .. - ندى مشت وقفت في الدكان.. والوقت تقريبا زي عشرة صباحا"
لقت الزول الاشترى الدكان برتب في حاجاتو.. ووبرفع في بضاعة جديدة في الرفوف ..
قالت ليهو السلام عليكم.. وقف عاين ليها كدا وقال عليكم السلام .. اول من عاينت ليهو في وشو كدا.. قلبها فرررر فراها .. وبقت تبلع في ريقها .. زي المزنوقة في قواله .. ومن جواها بتقول اووووب علينا نحن من الوسامة .. ده جاي من وين ده ؟.. بلا الامين بلا عرب بلا بصل ..
قالت ليهو اسمع يا ود العم.. نحن كنا بنجي للامين الكان ماسك الدكان ده .. عندي اختي كانت بتجيهو طوالي.. وبيناتهم صداقة شديدة..
بس هسي ماعارفنو فات وين .. واختي حالتها ماكويسة بتسأل منو زي المجنونة ..
طبعا الزول انبهت من جرأة البت دي .. عادة في عطبرة مافي بت بتتجرأ تقول كلام زي ده .. لكن نقول شنو؟ دي المنداحة ..
قال ليها والله الامين ده .. تقريبا اشتغل في سوق الخدار ..
قالت ليهو ياريت انت تكون بتتعامل زي الامين.. الامين ده كان بتعامل معانا معاملة رقيقة وعطوفة ..
قال ليها الامين بتعامل معاكم كدا عشان اختك .. انا اتعامل معاكم عشان منو؟ .. قالت ليهو عشاني انا.. انا مالي ما ماليت عينك ؟؟ واخدت ليها بسمة خسيسة كدا ..
قال ليها والله انتي تملي العين لامن تدفق.. لكن الزول يخاف يدفق مويتو على الرهاب ..
قالت ليهو لالا والله اطمئن لارهاب ولا حاجة ..انت اسمك منو؟
قال ليها انا اسمي عبدالاله .. قالت ليهو انت متزوج ؟ قال ليها ياخي انا صغير لسع متزوج شنو كمان؟.. والبتتزوجني منو؟ انا بحالتي دي .. ؟؟ قالت ليهو مالك ياخوي؟؟ حالتك مالا؟؟ ماشاء الله اي واحده تتمناك ..
ههه قال ليها يعني هسي انتي بتتمنيني ؟.. ضحكت ودنقرت ومشت
عاملة فيها خجولة .. قال ليها دقيقة .. الدكان فاتح ليك انتي واختك .. في اي لحظة ..
وطبعا ياجماعة .. من النقطة دي.. ندى فكت من الامين.. وشبكت في عبدالاله الضحية التالية ..
ودي طبعا" نتيجة استخارة الامين.. ربنا صرفو من الدكان لامر يعلمه الله .. عشان يصرف منه المنداحة .. وتبعد من طريقو .. حتي الامين ذاتو ماعارف الدكان انصرف منه ليه .. سبحان الله .. ..
.
الصافي الحبيب .. دخل سنة تالتة .. بي نتيجة امتياز .. الولد شاطر شطارة وذكي وقراي .. الصافي من الاولاد المابقولو ليهو ياولد امشي اقرا ... ياولد امشي ذاكر .. لالالا ..
الصافي امو بتقول ليهو.. يا الصافي ياولد خلاص قوم .. كفاية مذاكرة.. انت باكر ح تقوم بدري للمدرسة.. وبتقوم تعبان ..
الصافي امو بتقول ليهو .. المذاكرة الكتيرة ورا بعض دي يا الصافي بتخليك تمل من الدراسة ..
وهو بقول ليها بس انا مستمتع بالدراسة يا امي . وكل ما اقول اقوم خلاص كفاي .. برجع تاني اقرا كلام شوية كدا .. وفعلا الصافي كان بدرس الدراسة بحب .. وبذاكر بعمق.. ورغبة في تحصيل المعلومات .. وكل مايعرف ليهو معلومة جديدة.. يجي يتجدع لي امو ؟
يا امي انتي هسي بتعرفي عملية التمثيل الضوئي؟ ههههه
امي هسي انتي بتعرفي كيفية صلاة الخسوف والكسوف ؟؟ يا امي انتي بتعرفي عاصمة استراليا؟
يا امي الليلة ادونا الشي الفلاني .. ويحكي ليها الحصة بالتفاصيل وبي كل حواسو .. ودي شخصية الطالب الممكن يتقدم ويحرز النتائج المشرفة في حياتو العلمية .. لكن الطالب مما تلقاهو بكرهـ القراية .. وبكسل من المذاكرة .. وهمو كلو في اللعب واللدهي .. اتاكد انو ده من رواد العطالة في المستقبل القريب ..
عشان كدا الصافي كان ,, يتمرحل من نجاح الى نجاح.. وكان فخر بالنسبة لي امو وابوهو ومعلمينو .. ومرت الايام والشهور ..والامين اشترى البيت الكان مؤجرو ..وبقى سلطان في السوق .. وبعد البصل .. الحكاية جابت ليها محاصيل .. وفول وفاصوليا وكبكبي .. ووو ...
وايمان ظهر ليها حمل قبل اسبوع ..
على كل الناس ديل اوضاعهم استقرت جدا في الفترة الاخيرة .. والصافي كل يوم تظهر فيهو صفات اجمل .. واخلاق انبل .. ووعي افضل .. ومسابقة بين عقله وعمره .. والعقل سابق بي ميات الاميال .. وانا اقيف هنا في النقطة دي والتقيكم مع الصافي بعد عشرة سنوات ان شاء الله ..و باذن الله ..
الى اللقاء