الصافي... طارق اللبيب

الأخيرة

ناس الصافي طلعو على العربية.. والرشيد واختو مسكتهم مراة الجيران .. صديقة ايمان .. قبل ماالامين يدور العربية .. اتصل عليهو عبدالرحيم.. قال ليهو معليش يا الامين المفروض مواعيدنا تكون معاك الليلة.. لكن والله صراحة سيدة زوجتي دي تعبت شديد.. جاتها كومة بتاعة سكري ونقلناها على المستشفى بي غيبوبة .. نأجل الموضوع يوم تاني ان شاء الله .. الامين قال ليهو لاحول ولاقوة الا بالله .. خلاص يازول مافي مشكلة .. انا جاي عليكم في المستشفى وصف لي ..
والامين قال للصافي وايمان معليش ياجماعة .. المواعيد اتأجلت.. زوجة عبدالرحيم تعبت ودوها المستشفى ..
اها طبعا عبدالرحيم ياجماعة زوجتو اسمها سيدة.. وعندها تلاتة اولاد وبتين .. اكرم واسعد الكبار .. وربيعة ومنيرة في النص . وعلاء اصغر واحد 11 سنة تقريبا .. ربيعة عمرها 18 الا شوية تقريبا .. وزولة جميلة جدا والبشوفا مابقدر يعاين ليها مرتين.. اها طبعا ابوها كلمها بالصافي.. وقال ليها انا بعرفو من هو صغير.. وجاب ليها صورتو .. والبت متمنية لمتين الصافي واهلو يجو يطلبوها عشان هي تشوفو ..
اها هسي امها حصل ليها الحصل .. وربيعة كانت مستأءة جدا وتنقنق .. انا غايتو حظي دايما" زفت .. هسي عليك الله امي مابتبالغ ؟ ده يوم تغمر لي فيهو؟ .. كان المفروض تغمر بكرة .. ولا بعد بكرة .. بعد موضوعي يمشي لي قدام.. .. منيرة اصغر منها تقريبا 16 سنة.. قالت ليها انتي يابت هبلة هو في زول بغمر بي ارادته .. غايتو عليك جنس غباوة . خطوبتك طايرة يا يمة ان شاء الله امي تقوم بالسلامة ..
الناس الجو عشان يلاقو ناس الامين .. خيلانها واعمامها كلهم مشو على المستشفى ..
والامين ذاتو من هناك مشى على المستشفى .. وقعد مع الجماعة برة.. وبتونسو يازول قريب الساعة 9 كدا قالو المراة بقت زي الحصان .. الامين ودعهم واخد معاهم مواعيد تاني بعد خمسة يوم .. والمراة ودوها البيت .. والامين مشى على اهلو .. ومرت الايام والصافي منتظر الخمسة يوم تجي .. وعااادي لافرحان ولا زعلان .. ولامهتم بالموضوع كتير ..
اها يازول اتفقو معاهم يجوهم يصلو معاهم المغرب .. وبعد خمسة والمواعيد جات .. ربيعة عندها اخوها اسمو علاء .. كان طلع في راس الحمام.. يجيب كورة طارت فوق .. رجلو انزلقت من الحافة وجاء واقع .. كف ختفوهو ليك ودوهو المستشفى.. وضربو للامين قالو ليهو نحن في المستشفى .. علاء ده وقع من الحمام كسر رجلو واحتمال يدو ..
تااااني ناس الامين بعد لبسو جاهزين ..رجعو قلعو ملابسهم .. والامين دور العربية مشى ليهم في المسشتفى .. وايمان بقت مطيرة عيونها .. وتعاين للصافي وقالت ليهو..( عاد يا الصافي خوفتني .. سبحتك شافية ودعوتك كافية ) انت ولدة صلاح عديل ياولد .. قال ليها يا امي دي الاستخارة شغالة .. انتي بس اسكتي اتفرجي ..
وشال التلفون دخل جوة .. اتصل على لينة وكان متوقع تلفونها مقفول .. بس دقة جرس .. وفتحت الخط .. السلااام عليكم لينة.. وين انتي يابت؟
قالت ليهو بس ماتزعل مني .. تلاتة يوم انا قاعدة مع تسابيح طبعا عرسوها .. قال ليها ماشاء الله .. مبرووووك والله .. يا سلام .. والله ربنا يسعدها . طيب تلفونك مالو مقفول .. قالت وانا ماشة على تسابيح تلفوني اتسرق
والمؤسف شديد اني ماحافظة رقمك .. وماكان عندي طريقة اشتري جهاز .. غايتو الليلة الحمد لله ربنا يسر مشيت اشتريت تلفون وطلعت شريحتي ..وركبتها . ومنتظرة مكالمة منك من الضهر ..
قال ليها والله انا دقيت ليك كتير .. يعني انتي كويسة ؟؟ والله خوفتيني وقلقت عليك قلق غريب ..
قالت ليهو والله كويسة شديد .. اصلك ماتخاف انا مستحيل اتخلا عنك .. ولايمكن ارتبط بي انسان غيرك .. الا اشوفك اتزوجت غيري.. حتن بعد داك اخليك في حالك .. قال ليها ربنا يسوي الفيها خير ..
اها يازول بي هناك عند ناس عبدالرحيم البيت فاير .. ربيعة عندها خالتها بقت تكورك .. الناس الجاينكم ديل ناس فقر وشومين .. والله ديل يكتلوكم اعوذ بالله .. ده شنو الخطوة السوداء دي .. المرة الاولى تغمر الام .. والمراة التاني يتكسر الولد؟ والله ياربيعة الولد ده خيرتو معاك سوداء احسن ترفضيهو .. وربيعة ذاتها خافت من الموضوع ده ..
والام طبعا" مع ولدها في المستشفى .. واتاريها بتفكر نفس التفكير الجاهل بتاع التشاؤم ده .. نادت راجلها قالت ليهو اسمع ياعبدالرحيم.. الولد ده خيرتو مع البت ماكويسة .. وانا طالبة منك تاني ماتديهم مواعيد .. لانو لو دايرين يجونا.. المرة الجاية بتموت انت عديل ياخوي .. الناس ديل قول ليهم ادونا فرصة شوية .. انا والله خوفت منهم .. ياساتر ده شنو ده ؟؟
قال ليها لكن ياسيدة الولد مسافر .. قالت ليهو خليهو اليسافر.. سفر البن ان شاء الله .. انا ما موافقة على الموضوع ده.. اصبر النمرق من المستشفى.. قول ليهم الولد داير ليهو شهر في المستشفى .. قال ليها كويس انا بتصرف ..
عبدالرحيم مشى كلم الامين.. قال ليهو خلاص يا الامين انت امشي البيت .. والموضوع بتاع جيتكم ده خلينا نأجله لي قدام .. بدون تحديد لمن نشوف الحاصل علينا ده .. الامين قال ليهو يازول خير الفيها خير ربنا يسويها ..
اها في اخر الليل .. سيدة خلت راجلها وواحد من الاولاد مع علاء المطروح في المستشفى .. ورجعت البيت .. وخلاص اتشاومت بالعريس ده.. وعايزة تكلم بتها تقول ليها الزول ده نحن ماعايزنو .. اول ما وصلت البيت .. ربيعة جاتها.. قالت ليها يا امي انا حاسة انو الزول ده مافيهو خير لي .. قالت ليها وانا ذااااتي حاسة كدا.. لكن البقنع ابوك منو؟
لكن انتي لو ماعايزة الموضوع .. انا والله لو انطبقت السماء والارض مايتم .. وتاني الناس ديل كان جونا بقتلو فينا زول ..
اها يازول باكر الصباح .. قبل ما سيدة ام ربيعة تطلع على المستشفى .. جاتها واحدة من الجيران تكفر ليها لي ولدها .. قالت ليها ياسيدة انا عايزاك في كلمة سرية ..
قعدت معاها جوة براها .. المراة قالت ليها والله انا شايفة الناس الجاينكم للعرس ديل.. ماتقبلو بيهم واحتمال الحاصل عليكم ده كلو ربنا ماعايزكم تقعو فيهم .. قالت ليها ليه انتي بتقولي كدا يا سوسن ؟
قالت ليها قبل فترة.. جات ام الولد ده .. ومعاها واحدة صاحبة نعمات .. وكانن بسألن من ربيعة بتك .. بس في بنات قالن ليها والله عاد الموت حار وانتي سألتينا (ربيعة عينها طايرة) .. وانا ياسيدة ما كنت متوقعة انو المراة تقبل لي ولدها يجي يخطب ربيعة بعد السمعتو .. بس هسي استغربت انهم جايين يخطبو بعد الكلام السمعتو المراة دي ..
قالت ليها ديل منو القالو في بتي كدي؟ قالت ليها بري مابقول ليك.. انا بس دايرة انورك.. عشان تكوني فاهمة وده شي بسألني منو الله .. وطلعت على كدا ..
وفعلا سيدة ام ربيعة الفار لعب في عبها.. وقالت طيب المراة تجي تٍسأل من بتي ده من حقها .. بس يقولو ليها ربيعة كدا .. وبرضو تجي تخطبها لي ولدها ؟.. الكلام ده انا ما مريحني .. الكلام ده وراهو كلام .. بري يايمة يقومو .. بعدين يذلو لي بتي.. ويهينوها .. ويقولو ليها نحن سمعنا من زمان قالو عينك طايرة .. وراجلها يبقى شاكي فيها عمرو كلو ..
بس خلاص سيدة صممت انو ود الامين ده لو بقى اخر راجل في الدنيا مابتديهو بتها .. والموضوع ده انتهى ..
جات كلمت ربيعة قالت ليها .. عارفة ياربيعة انا دايرة احكي ليك كلام سر.. لو بتسكتي بقولو ليك .. قالت ليها والله يا امي مابحيبو فوق خشمي ..
قالت ليها المراة ام الولد.. قالو جات في الحلة وتسأل منك .. وقالت انا سمعت انو البت دي ماكويسة صح ولالا؟ والناس قالو ليها والله نحن سمعنا .. لكن ياربيعة بعد الناس قالو ليها كدي .. تجي تاني تخطبك لي ولدها الكلام ده مش وراهو كلام؟
ربيعة قالت ليها فعلا" يا امي .. بعدين كيف المراة المتخلفة دي تجي تقول عني كلام زي ده؟؟ وسمعتو وين ؟ .. قالت ليها وانت قايلة الزمن ده في شي بندس .. الناس كلهم عارفين قصتك مع فيصل.. يتلقى كل في زول حكلى ليها .. (وانا شخصيا ياجماعة .قصة فيصل دي شنو .. يطرشني ماسمعت بيها الا هسي غايتوههه).
ربيعة قالت لي امها خلاصانتي وكت تمشي المستشفى .. كلمي ابوي قولي ليهو ربيعة قالت انا الولد ده ماعايزاهو .. ولو ماصدقك خليهو يتصل علي في تلفوني ده انا بوريهو ..
وفعلا لمن سيدة مشت المستشفى قالت لي عبدالرحيم .. بتك قالت راسها والف سيف ماعايزة الولد ده نهائي .. قال ليها .. ان شاء الله ماعايزاهو .. اول هي لاقيالا واحد زي الصافي والله ماتستاهل نعالو .. خليها تلقى شبها .. وطوالي شال التلفون واتصل على الامين الكلام ده تاني يوم .. قال ليهو يا الامين والله ربيعة بتي دي .. قالت الخيرة ماكويسة .. وما مرتاحة للموضوع .. وانا ماعايز اجبرها .. دحين الصافي ربنا يقسم ليهو اخير منها .. الامين قال ليهو يازول ان شاء الله خير .. الصافي ولدي وربيعة بتي .. الامين جاء بالمساء كلم الصافي طوالي .. قال ليهو تعال يا الصافي والله انت غايتو نيتك دي حيرتني .. يازول والله ربنا بريدك ..
الحاصل يا استاذ كيت كيت .. اها انا موش قلت ليك ماتكلم البت العايزها ديك بالموضوع .. هسي كنت خسرت الزولة الاخترتها ..
واهو قدام امك دي زي ما انت وقفت معاي واتخليت عن رغبتك .. عشان توفي بوعدي .. انا والله اقيف معاك للنهاية ولو عايزني هسي اسافر معاك نخبطبها من اهلها ماعندي مانع .. ايمان قالت ليهو ياتو بت يا الامين ؟؟ انت مخرف ولا شنو؟ الصافي قال ليها اصبري يا امي بحكي ليك .. وقبل على ابوهو قال ليهو الله يخليك يا ابوي . انا هسي ماعايز اشغل نفسي بي موضوع زواج الا بعد اتخرج .. ابوهو قال ليهو على كيف انا من يدك دي لي يدك .. المهم معاك رضاي وموافقتي ومعاك من المليون لي مية مليون .. وبيتك الملك .. الصافي قعد جمب ابوهو في السرير ومسك يد ابوهو وباسها .. قال ليهو تسلم يا ابو الصافي ربنا يخليك لينا .. وايمان واقفة هناك ودموعها رب رب .. طوالي الصافي دخل جوة وعمل استخارة في موضوع لينة .. واتصل عليها طوالي .. في نفس اللحظة وقال ليها .. انا عايز اقول ليك كلام لاول مرة في حياتي اقولو ليك .. انا بحبك يالينة.. وعايز اتزوجك هل تقبلين بي ؟.. لينة صننن سكت وهو بقى يقول ليها الو؟ لينة ؟ يابت ؟ الوووو ..
قالت ليهو ياخي مادقيقة خليني اكمل دوختي انا دايخة من الكلام ده هه
وانا اقبل بذلك ياعزيزي .. قال ليها بس مافي كلام الا بعد التخرج فاهمة؟ .. ماعايز اشوف وشك قدامي .. تحميني قرايتي فاهمة هههه وهي تضحك .. قالت ليهو بعد ده ..كان قت لي اقعدي في بيتكم ماتجي الجامعة ماعندي مانع ..
والحمد لله بفضل الله وطاعة الولد لابوهو ..ربنا صرفو من الشر ..وكتب ليهو الخير .,
الكلام ده كان في بداية الفين وسبعة .. و مرت الايام والشهور .. والصافي اتخرج الحمد لله.. وتم ليهو مرادو بي لينة الحنينة بفضل الله وكانت هي اختيار الله له ... وزواجو كان في فبراير 2010 .. الان الحمد لله .. الصافي شغال مهندس في شركة استشارية .. وعندو بت واحدة .. اسمها وعد .. تقريبا عمرها سنتين وشوية .. شكرا" ليك ياصافي القلب والسريرة .. ياصاحب الاسم الفخيم .. مشكور يا الصافي ود الامين.. على كل ماقدمتو لينا من دروس في الحياة ..ربنا يوفقك في حياتك ويرزقك.. ويبارك فيك ويكتر من امثالك ..
احبتي وقراء حروفي ..
انا سعيد كل السعادة بوجودكم حول كلمات .. واستشعر طواف ارواحكم بين سطوري .. واسال الله ان لايحرمني منكم .. وربنا يديكم لامن يرضيكم .. اللهم ات كل سأئل سؤله
وحقق مراجينا يارب العالمين ..
ولكم التحية ..
محبكم طارق اللبيب ..
بحري ديسمبر 2015
..