الصافي... طارق اللبيب

الحلقة العشرون

طول الرحلة والرشيد الصغير بتكلم .. انتي يا امي عليك الله بالصح نحن ماشين للصافي؟ .. تقول ليهو ايوة ماشين للصافي .. قال ليها ولسه الصافي قاعد في بيت ناس حمودي؟ .. قالت ليهو ايوة. قاعد في بيت ناس حمودي .. انت حمودي متذكرو؟
قال ليها ايوة متذكرو.. وامجد برضو متذكرو ..طبعا الرشيد بعرفهم لانه جا السنة الفاتت مع اهلو جو كلهم للعزاء بتاع الملكة وقعدو تلاته يوم ..
والولد بسأل في امو وامو بتجاوب .. والامين ساكت مقطم بس يعاين للزلط ..
وكل مرة يقول ليهو كلمة براهو براحة كدا .. ويسكت مرة قال .. وصية الملكة.. وصية الملكة ؟؟ كرهونا بي وصية الملكة.. بالله التقول موصية بحقوق .. والله تاني دقيقة مايقعد معاهم ..
تاني يقول انا ذاتي غلطان البقبل ولدي يقعد مع الناس .
تاني يقول موش براهم ركبو جوني في عطبرة؟ يحنسو فيني .. عشان الصافي يقعد معاهم .. ؟خبارو هسع بقاليهم حار .؟؟
غايتو ناس الدنيا ديل .. الله ينجينا منهم ..
ايمان قالت ليهو انت يا الامين .. ماتجمع الناس.. قالو ليك التصرفات دي من رقية بس .. يعني بهية وخالد واحمد.. ذنبهم شنو؟
قال ليها عليك الله خليني.. كلهم زي بعض ..
قالت ليهو خلاص اسكت ساي.. الحيطان ليها اضان .. (بتقصد الرشيد ماك) .. شايفو بتسنط كيف ده قايلو مافاهم؟
الرشيد قال ليها فااااهم انا .. انت يا ابوي ماعايز الصافي يقعد مع ناس حمودي.. وامي عايزاهو يقعد صاااح؟؟ عااارف ..
هو ماعايزنو ليه يا امي؟ قالت ليهو نوم كدي.. لمن نصل يا الرشيد ..
قال ليها سمح اصلا انا نعسان ..
والبت راقدة فوق امها.. والرشيد راكب في الكرسي الورا براهو .. وكل مرة يمد راسو بي فوق للكرسي.. ويقول كلمة ويقعد راجع.. بعد شوية سكن.. وهجس ..ايمان اتلفتت عليهو وراء.. لقتو نام..
قالت للامين اخيرا الرشيد نام ..
قال ليها كويس لانو البارح كان مساهر بي .. قالت ليهو بسمة حبيبتي مسكينة.. بس من طلعنا من الدامر دخلت في نومة ..
بس ياجماعة.. السر المهم هم ماعارفين انو الرشيد مغمض عينيهو ساي لسع مانايم .. وسامع كلامهم كلو..
الامين قال ليها.. قلتي لي يا ايمان .. الدهب القالو سرقو الصافي ده .. كتير ولاشوية؟
قالت ليهو والله قالت خاتمين وسلسل.. لكن ماعارفاهم طبعا" قدر شنو ووزنهم كيف ..
المهم نحن بنصل .. وبنحلها .. لكن الشي التأكدة منو انو الصافي برئ من القصة .. يعني حتى نحن لو غرمناها ليها .. بس عشان نسكت الناس ومانعمل فضايح .. قال ليها قلتي شنو؟ نغرمو ليها؟ نغرمو ليه؟ نحن سرقناهو؟ نحن ضيعناهو؟ .. وكيف بيقدرو يثبتو انو الصافي سرق دهبهم؟ ..
قالت ليهو مجرد الاتهام.. بالنسبة للصافي بجيب ليهو الكلام .. والحكاية دي فيها مردود نفسي على الولد .. والرشيد يسمع ساي ..
بعد خلصو كلامهم.. الرشيد قال هو الصافي زاتو قال السرقة حرام.. وقال الحرامي بقطعو ليهو يدو ..وبودوهو النار ..
امو قالت ليهو انت صاحي؟ قال ليها ايوة صاحي.. وسمعتكم قلتو في ناس قالو الصافي سرق الدهب ..
قالت ليهو ديل ناس كضابين ساي.. الصافي مابسرق.. نوم نوم ..
الامين قال ليها خلاص اقفلي الموضوع ده لامن نصل ..
وواصلو في السير.. والحمد لله السبت زي الساعة 11 كدا دخلو الجيلي .. طوالي ايمان اتصلت علي الصافي ..
اول ما رد ليها.. قالت الصاا.... وخنقتها عبرة .. وسكتت
قال ليها امي ؟؟ مالك؟ نعل مافي عوجة .. الو... امي؟؟
قالت ليهو ايوة يا الصافي معاك .. مافي اي عوجة .. نحن كويسين ..
ابوك كويس واخوانك كويسين .. اهوديل معاي في العربية .. ونحن جايين زيارة للخرطوم انت وين هسي ؟
قال ليها ماشاء الله.. دي شنو الزيارات المفاجئة دي ؟
قالت ليهو كلو خير.. دايرين نغير جو يومين كدا ونرجع.. انت وين هسي قلت ليك .؟ .. نحن قربنا .. نحن في الجيلي .
قال ليها انا طلعت على سوق بحري.. الليلة ماعندي جامعة ..
قالت ليهو خلص موضوعك.. وتعال لينا سريع ..
قال ليها ماعايز اي مواضيع .. والموضوع الجاييهو خليتو وراجع.. بنتظركم في البيت.. بمشي اكلم ناس البيت انكم جايين ..
.. طلع على الشارع سريع .. اجر ليهو امجاد .. وغشى اشتري ليهو حاجات كدا لحمة وخدار وحاجات ..
وشالن معاهو البيت ..
المهم وصل سريع قبل ناس امو .. ودق الباب لي رقية .. ياخالتي رقية .. ياخالتي رقية .. جاتو قالت ليهو ايوة نعم مالك.. قول عايز شنو ؟
قال ليها ناس الوالدة وابوي جايين علينا في السكة .. قلت اكلمك عشان يكون عندكم خبر .. وجبت ليك معاي حاجات كدا ..
قالت ليهو حاجات شنو؟؟ مدا ليها الكيس ..قال ليها لحمة وخدار وكم حاجة كدا ..
شالتن منو.. وقالت ليهو قالو ليك نحن محتاجين لي حاجة؟.. تجيبها لينا انت ؟؟..
قال ليها عارفك مامحتاجة .. لكن قلت عشان ما نقعد نكوس للحاجات بعد الناس يصلو .. ومافي داعي للكلام الجارح .. دي حاجة جبتها من نفسي براي .. مافي زول طلبها مني .. لانكم ماعارفين انهم جايين ..
قالت لهو انا عارفاهم جايين .. وانا القلت ليهم تعالو ..
قال ليها عليك الله؟؟ .. ماشاء الله .. طيب ليه ماكلمتنيني؟؟.. انتي القلتي ليهم تعالو اخدو معانا يومين يعني ولاشنو؟ .. مافاهم ..
قالت ليهو عليك الله يا الصافي امشي شوف قرايتك.. انا مافاضية ليك هسي .. طبعا" الصافي مافكر في انها ربما تكون نادتهم للمشكلة . ...
لانها دايما بتعمل مشاكل مع الصافي.. وهو بتعامل معاها عادي والموضوع بنتهي ..
بس بعد رجع الصالون .. بدا يربط في الامور في راسو ..
امي اتصلت علي وانا حاسي بيها معبورة .. ورقية هي القالت لي ناس ابوي تعالو .. ياربي ممكن تكون اتصلت عليهم.. واتهمتني لي امي وابوي ؟؟ غايتو لو عملت كدا .. انا مابسيبها موش لو بقت خالتي ؟
جا راجع تاني .. دق الباب لي رقية .. قال ليها ياخالتي رقية ..
جاتو طالعة من المطبخ .. تنفض في ايديها ..
مالك يا الصافي انت؟؟ انا موش كلمتك قلت ليك مشغولة .. قال ليها هو سؤال واجابة .. وارجعي امشي لمشغوليتك .. قالت ليهو اها اسأل في شنو؟
قال ليها انتي اتصلتي علي امي وابوي وكلمتيهم بي مشكلة امبارح واتهامك لي بي دهبك وكدا؟؟
قالت ليهو امك وابوك موش جايين ؟
خليهم لمن يصلو ..
قال ليها يا رقية لو كنت عملتي كدا .. بتكوني خسرتي خسارة كبيرة ..
المفروض المشكلة البيني وبينك .. ماتدخلي فيها ناس بيتنا ..
رقية خلت كلامو في خشمو ولاكملو.. مشت طوالي دخلت المطبخ راجعة ..
غايتو هو من اسلوبها في الكلام.. حس انو رقية هي الاتصلت عليهم وحكت ليهم المشكلة .. وقالت لهم تعالو حلو لي مشكلتي مع الصافي ..
والله يارقية تكوني عملتي كدا .. تكوني بالغتي معاي.. وغلطتي معاي غلط كبير ..
كلها دقايق وجو امو وابوهو .. والبوكسي دق البوري بره .. والصافي طلع برة فرحان .. نزلت امو اول وسلم عليها بالاحضان لامن دمع .. وسلم على ابوهو سلام اصحاب .. وقعد على رجليهو في الارض .. وشبط ليك الرشيد بالاحضان .. وقال ليهو كبرت يابطل .. ماشاء الله ..
ومشى على بسمة .. خطفها من الارض.. وبقى يبوس فيها.. وهي نعسانة تدعك في عيونها ..
عاين لي امو كدا.. وقال ليها ايمان بت الحاج ام الصافي ..!
والله ليك وحشة .. وامو بتعاين ليهو في عيونو .. عشان تقرا في عيونو كل المخبأ .. لقت جواها حزن وخوف .. رغم الابتسامات المالية وشو ..
قال ليهم اتفضلو اتفضلو البيت بيتكم .. ابوي كيفك عليك الله .. وسايق اخوهو وداخلين لي جوة.. خالد لسه ماجا ..
ايمان ساقت بتها ودخلت جوة.. والصافي وابوهو دخلو على الصالون .. ابوهو قبل مايقعد كويس.. قال ليهو يا الصافي؟؟ الحاصل شنو؟ مالها المراة دي معاك؟
قال ليهو منو المراة ؟
قال ليهو رقية انت قايلنا ماعارفين الحاصل ولاشنو ؟
الصافي عاين للرشيد كدا.. قال ليهو امشي يا الرشيد جوة.. قلع جزمتك وغير هدومك وتعال ..
الرشيد قال ليهو انت عايز تمشيني صح؟.. وانا عارف اي حاجة ..
الامين قال للرشيد ياولد سيب الفصاحة وامشي جوة .. طوالي مد قدومو كدا .. وعمل زعلان .وطرم زي الحركة البعملها الصافي زمان.. ودنقر في الواطة وكشت كشت مشى دخل .
والصافي بقى همو في الولد الزعل .. بقى يقول ليهو تعال يا الرشيد هاك .. هاك داير اديك حاجة ياعوير .. والله بديها بسمة ..
ومدخل يدو في جيبو .. وداك ماشي اصلو ماوقف ولا اتلفت دخل جوة ..
الامين قال ليهو ياخي سيبو.. ده ولد دلعان ساي.. براهو هسي بجي رضيان .. زيك انت زمان .. بس يزعل عشرة دقايق وبعد شوية يجي يتفاصح زي المافي شي ..
قال ليهو يا ابوي دي نيتك انت.. انت زول نضيف من جوة .. ان شاء الله نبقى زيك ..
الامين قال ليهو ربنا يحسن العواقب .. اها ماقلت لي الحصل شنو؟ .. بدا يحكي ليهو في الحصل من اولو بي كل التفاصيل ..
قال ليهو بالله شوف المراة المابتخاف من الله دي.. وصلت لي امك كلام مختلف خالص ..
وهسي تكون قاعدة تكضب ليها بي جوة ..
وفعلا ايمان بعد ما سلمت علي رقية وبهية .. قالت لي رقية عليك الله يارقية خلي بهية في المطبخ.. انا عايزة اتكلم معاك.. لاني متوترة شديد دايره اعرف الحاصل .. رقية سلمت بهية مهام المطبخ وطلعت ..
قعدت مع ايمان في الاوضة .. ايمان قالت للرشيد.. الرشيد امشي بيغادي لي ناس ابوك ..
قال ليها هو شنو هو؟ .. ناس ابوي يقولو لي امشي بيغادي لامك.. وانتي تقولي لي امشي ليهم .. انتو جبتوني معاكم ليه؟..
انا عايز حمودي وينو؟
رقية قالت ليهو حمودي مع الجيران الفاتحين علينا ديل.. امشي ناديهو .. معاهو امجد .. الرشيد قال لي امو.. امي امشي؟
قالت ليهو امشي .. بس اعمل حسابك من الشارع .. في ركشات بتجي جارية شديد.. قال يها بشوفا بشوفا وطلع ..
هنا ايمان بقت تسأل في رقية.. الحصل شنو بالضبط يارقية؟؟ .. قالت ليها والله زي ماحكيت ليك ..
قالت ليها والله يارقية.. انتي بتصدقيني.. لكن والله الصافي مابكون شال الدهب.. وانتي كدا بتتهمي زول برئ.. وموش عشان هو ولدي .. لكن انا الصافي بعرفو زي جوع بطني .. عارفة محاسنو وعيوبو ..
لكن السرقة دي ماعندو ..
قالت ليها والله بس انا الفرتكت دولابو.. وهو زعل ولا اتكلم معاي ..
وامس نهائي ماطلع من البيت .. بس اغتنم فرصة انا مافيشة وعمل عمليتو الجبانة .. ايمان دي بقت تغلى من جوة .. لامن بتدعك في يديها .. من كلام رقية المستهترة ..
في النهاية قالت ليها .. والله هو مادام الصافي قاعد في بيتكم .. يبقى التهمة راكباهو ..
انتي دهبك قدر كيف ؟.. قالت ليها خاتمين وسلسلة .. يعني زي ما اكتر من 20 جرام ..
قالت ليها طيب .. انا عندي سلسل فيهو تلاتين جرام والله ..
انا بديك ليهو .. بس انتي تاني ماتفتحي الموضوع ده .. والصافي نحن بنسوقو منكم ..
رقية قالت ليها مافي مشكلة .. انا لمن اشيل دهبي تاني ماعندي معاهو شغلة .. قالت ليها بس الاتفاقية دي بيني وبينك ..
ماتقولي الكلام ده للصافي ولا للامين .. قالت ليها الله يسهل بس الحقارة الزول مابرضاها ..
والزول وقت يكون قاعد مع الناس.. والناس مسكننو وعايشنو .. المفروض يكون امين .. ويحفظ امانة الناس ..
قالت ليها يا رقية نحن الصافي ما غالبنا نتكفل بي سكنو واعاشتو .. وانتي عارفة انو دي وصية امك.. واخوانك جونا في عطبرة.. بحنسو في الامين .. مافي داعي للكلام الموسمح .. انا قلت ليك بديك دهبك ..
كان سرقو الصافي ولاكان شالو زول تاني .. قالت ليها مافي زول تاني بشيلو .. ايمان مدت ليها السلسل .. ورقية شالتو منها .. وبقت تقلب فيهو وتعاين ليهو .. طبعا اكبر من حقها .. وضحم كدا وشكلو جديد ورهيب .. ورقية من جواها فرحانة فرحة عجيبة ..
لكن ما مظهرة الحكاية دي ..
هناك الرشيد مشى لاقى حمودي .. وقعدو الاتنين اتمددو في الشارع..
الرشيد قال ليهو انا صاحبك الرشيد متذكرني ؟
حمودي قال ليهو ايوة انتو جيتو زمان وكت حبوبة ماتت صح؟
الرشيد قال ليهو ايوة وانا متذكرك من زمان ..
حمودي قال ليهو انتو هسي جيتو لشنو؟
قال ليهو جينا نسوق الصافي منكم .. عشان هو سرق الدهب ..
حمودي قال لي تعال اوسوسك ..بس ماتقول لي زول ..
جاهو قريب اداهو اضانو مع انو الشارع فاضي هه
قال ليهو الدهب ماشالو الصافي .. الدهب شلتو انا جدعتو في راس الحمام ..
قال ليهو.. ليه جدعتو موش حق امك هو؟
قال ليهو الاستاذ في المدرسة قال لينا.. الدهب بعمل فتنة بين الاخوان ..
وانا قلت للاستاذ فتنة كيف؟ .. قال لي الفتنة اشد من الموت ..
بس انا لقيت امي في دولابا عندها دهب.. شلتو وجدعتو فوق راس الحمام.. امي كانت مافي .. وجرينا انا وامجد لي ناس مدينة ..
قال ليهو طيب كان تكلم امك تبيع الدهب وتخلصو منو .. ويكون عندكم قروش .. ليه ماكلمتك امك تنزلو بالسلم ..
قال ليهو امي قالت لي انا بكتلك عشان فتحت دولابي .. وانا قلت ليها وحت كتاب الدين مافتحتو عشان ماتدقني ..
بس عليك الله ماتقول ليهم ..
قال ليهو خلاص مابقول ليهم نهائي عشان انت صاحبي ..
الى اللقاء..