الصافي... طارق اللبيب

الحلقة الخامسة عشر

حلقة لمينيه .. خالية من الصافي ^+^
الامين وكت مشى بيت العذابة.. لقى عبدالمنعم قاعد براهو ..
قاعد ليهو فوق عنقريب حبال صغير كدا.. ومهتوك زي الحفرة .. وبخيط ليهو في شنطة هاندباق قديمة .. خت الشنطة والابره وقام من العنقريب المهتوك بالجلالة.. عشان يسلم على الامين .. وسلم عليهو سلاما مسيخ كدي .. وقعد راجع .. شال الشنطة والابرة واستمر في الخياطة .
الامين عرف انو الزول ماشايل مادتو .. وماعندو ليهو حاجة في الوقت الراهن ..
سأله عن اخبار الجماعة .. وعبد المنعم برد عليهوردود مسيخة وعبيطة .. وقرب يقول ليهو ياخوي اختاني .. ماعندي ليك حاجة ..
الامين اتضايق براهو.. وحس بالاحراج .. وقال ليهو خلاص ياعبد المنعم.. انا استأذن نتلاقى تاني ان شاء الله ..
طبعا دي اسوء طبعة انك تقابل ضيفك بي برود .. وتحسسو بانو هوضيف ثقيل .. دي ابدا ما من شيم الرجال .. الضيف حتى لو عدوك المفروض توريهو غلطو وتناقشو .. او تقابلو بي بسمه واهتمام .. لكن التهميشه دي اسوء حاجة.. قال طارق اللبيب مرة كدي...
وكت الزول يجيك وتقابلو بي تهميشه ..
نار الغل بتعمل في الفؤاد تكميشه..
علاقة الخوة مابتقبل علاج تعميشه.
اخوك رحببو باسم ولا زول تخميشه.
على كل حال.. الامين اخد بعضو واتخارج.. مرق من البيت وهو مستاء ومحرج .. واصلا قبل مايدخل شايف عطبرة بالنسبة ليهو زي خرم الابرة.. بي عدم عطية .. ورجع البيت وكان اليوم داك ساكت ومدبرس .. وايمان بتعاين ليهو ساي ده نفس اليوم الجو من السفر ..وسالتو قالت ليهو ممكن تحكي انت مالك ؟ قال ليها والله بس فارق علي عطية .. لكن تاني ماعندي عوجة ..
انتي عملتي شنو ؟؟ خلاص رتبتي بيتك ؟ قالت ليهو والله جاراتي الله يبارك فيهن.. ما خلني هبشت حاجة بي يدي .. نظمن البيت .. وعملن اي حاجة .. وانا قاعدة زي العروس .. حتى ملاح الغدا عملتو بتول في بيتها وجابتو لي .. وهداك غداك جاهز مختوت في الصينية .. كان قلت هسي اقوم اجيبو ليك .
قال ليها والله الناس ديل غايتو ربنا يقدرنا على جزاهم..
قالت ليهو يا الامين .. اصلا الجيران هم راس مال الغريب في غربتو .. وكت تبقى بعيد من اهلك .. مابكون عندك اقرب من جارك .. احسن تكسبو وتتعامل معاهو بي معاملة الاكرام .. وتحترمو .. في يوم من الايام بتجيك كربة.. ومابتلقى زول اقرب ليك منو ..
جاراتي ديل انا كنت معاهن في الحارة والباردة .. عشان كدي هسي والله متسابقات على خدمتي ..
المهم يازول .. عدو الليلة ديك .. وباكر الامين قام الصباح يشوف ليهو طريقة شغل.. لانو القريشات المعاهو ديل مابعملن حاجة يعني .. وهو زول اتعلم على الدكاكين والترطيبة.. تاني الفلس بكون عليهو صعب .. طلع طوالي مشى على دكانو المقفول داك .. سأل الجماعة الجيران .. قال ليهم الدكان ده مافي زول جا اشتغل فيهو؟؟ ..
قال لو ليهو والله سمعنا انو اشتراهو واحد من الدامر .. لكن قبل مايفتحو سافر الخرطوم .. عندو اخوهو حاصل ليهو حادث ..
وكدا الامين قنع من قصة الدكان حقو دي .. مشى يلف .. ومن دربو داك مشى للزول الاشترى منو الدكان .. التاجر المشهور المن بانت الماجبنا اسمو داك .. عشان يسألو من الزول الاشترى الدكان ..
المهم بعد سلم عليهو .. قال ليهو ياحاج فلان.. انا طبعا الحمد لله زوجتي اتعالجت وبقت في امن وامان الحمد لله .. وجيت اشكرك على وقفتك معاي .. والله ابدا ماقصرت .. وداير اسألك من الزول الجردت ليهو دكاني .. هل ممكن يقبل شراكة بيني وبينو؟
الراجل قال ليهو والله يا الامين .. الزول الجرد الدكان.. زول قريبنا من بعيد .. وساكن الدامر الحلة الجديدة .. لكن من ما مسك مفاتيح الدكان .. جاهو خبر اخوهو كاسر كراعو.. في حادث في الخرطوم .. وسافر ليهو.. قالو ملازمو في المستشفى ..
فماعارف الزول ده يجي متين .. لكن انا اول مايجي بكلمو ليك .. لو عندو فكرة شراكة طوالي تخش معاهو .. انت هسي في الايام دي .. حاول لقط من جاي لاجاي .. عشان ما تاكل من سنامك ..
(يعني تاكل من القروش الموفرة للشغل) .. وبعدين تفلس ..
قال ليهو جدا ياحاج .. وشكرو ومشى البيت .. مستاء وقافلة معاهو
باكر مشى السوق برضو .. عندو واحد بعرفو ماعندو معاهو صداقة لكن معرفة .. اسمو الطاهر يوسف .. الطاهر يوسف عندو دكان ملابس جاهزة .. اول من شاف الامين وقف ليهو على حيلو.. ورحب بيهو ترحيب شديد خلاص .. قال ليهو كيفك يارجل ياناجح .. انت عارف يا الامين .. انا متكيف منك كيف شديد خلاص ..
ياخي انت من يومك المسكت دكان عطية.. والدكان ماشي زي الفل
.. في ظرف شهر انت خليت الدكان ده مدور الشارع كلو..
انا قلت للجماعة الامين ده في سنة .. بقلب اجمالي وبكون من ملوك السوق .. لكن هسي طولت منك .. دكانك ماشي كيف؟ ..
الامين دنقر في الواطة .. فال ليهو والله الدكان ضاع من يدي يا الطاهر ..
قال ليهو الحاصل شنو يازول ؟
الامين قعد يحكي ليهو في مسلسل مرض ايمان والشي الحصل
والله الطاهر ده اتاثر تاثير شديد خلاص ..
قال ليهو يا الامين انت زول ناجح في التجارة .. وزول بتعرف تتعامل مع الزباين .. ماينفع معاك اي شغل غير التجارة.. انت لو داير نصيحتي .. حتى لو اتسلفت يا رجع دكانك ...ولا خش ليك في دكان تاني ..
وانا متأكد دكانك ببرد ليك.. في اقل من ستة شهور ..
قال ليهو والله يا الطاهر بس حكاية الديون دي .. بقى الزول يخاف منها .. والناس ذاتها مابتثق .. قال ليهو ياخي انت معروف في السوق كلو .. واي زول ممكن يتعامل معاك بي قلب جامد..
طيب اقول ليك كلام .. في جماعة اصحابي سماسرة نجيضين .. تشتري منهم عربية بالشيك .. وتبعها بالكاش .. في فترة الشيك انت بتكون ظبطا امورك .. وتسدد على راحتك ..
قال ليهو لكن الفترة بتكون كيف ؟ قال ليهو طبعا انت عارف منطق السوق.. كلما زادت المدة زاد السعر ..
قال ليهو خلاص انت بس شوف لي جماعتك .. انا باكر بمشي بفتح لي حساب في البنك وبنتظرك .. احسن من الزول يقعد ساي ..
طبعا" الامين داير يمشي في درب خطير وصعب الرجوع منو ..
شيكات وديون وكسر وانتظار .. والحكاية دي ح تدخلو في حيص بيص ..
احسن حاجة عملا ,, انو مشى البيت .. وحكى الكلام ده لايمان .. ايمان قالت ليهو ..
انا يا الامين ماموافقة على الموضوع ده نهائي .. وماعافية ليك لو دخلت علينا قروش زي دي .. الموضوع ده انا ما مرتاحة ليهو ..
ابدا ما مرتاحة ليهو .. ياخي قدر القريشات العندك ديل.. امشي اشتغل بيهن ..
انت وكت كنت شغال في البلد في الخضار .. نحن متنا بالجوع؟؟
احتجنا لزول ؟؟ الحمد لله امورنا مستورة.. وماكلين وشاربين .. في زول داير يجي يفتح حلتي يشوف ملاحي شنو؟
ان شاء الله ناكلا بي بصلة .. المهم نكون مرتاحين نفسيا .. ولا علينا ديون ولاخايفين من شيك يمشي المحكمة ..
قال ليها لكن اعمل شنو طيب يا ايمان؟؟ هسي لو قعدنا نتصرف من القروش دي.. بتخلص ومابكون عندنا البناكلو ..
قالت ليهو انت خلقتنا؟؟.. مالك ومال بكره.. خلي الامور على الله .. كل يوم بجي بي رزقو يا الامين .. ما دام ربنا خلقنا قادر يرزقنا ..
اصلا ماتستعجل على الغنى .. العجلة على الغنى فقر .. وفعلا كلام ايمان عين الحقيقة ..
ومرة قال اللبيب ..
ايه الداعي تدخل في ديون وتخاطر..
ايه الداعي تكتب شيك وفيهو مخاطر..
مادام انت ماكل ومستقر الخاطر ..
ارضابو القليل اوع الطمع ياشاطر ..
.... في النهاية الامين رضخ لي كلام ايمان .. وطلع الصباح مشى للطاهر .. قال ليهو انا غيرت راي من موضوع البارح .. ماعايز حاجة بالدين ..
بشتغل بي ضراعي وعرق جبيني وربنا كريم .. ومن محلو داك مشى على سوق الخضار.. كانت الساعة 9 وشوية صباحا ..
لقى تلات كدا قاعدين بشربو ليهم في قهوة .. قعد معاهم وسلم عليهم .. قال ليهم انا داير لي شغل ياجماعة ..
واحد فيهم قال ليهو شغل شنو؟ .. انت داير تشتغل شنو ؟ عتالة؟ تبع اكياس؟ تشتري جملة.. تبيع قطاعي؟ شنو بالضبط الانت عايزو وانا بفيدك ..
قال ليهو انا شايل قروش وداير اقلبا في السوق ..
قال ليهو ايوااا كم قروشك ؟ قال ليهو قروشي كدا .. قال ليهو والله انت احلا زول .. وزول محظوظ وامك داعية ليك .. تعال وراي ..
والله الزول ده خلا كباية القهوة ما كملها .. قام مع الامين ساقو ومشى عشان يخدمو .. وديل اهلي ..
قال ليهو شفت الراجل الواقف ده .. عندو بصل داير يبعو .. وسعرو كويس شديد .. ونحن ماعندنا قروش.. اشتريهو منو على مسؤليتي .. عشرة شوالات ..
طوالي الامين مشى على الراجل .. واتفاهم معاهو في السعر .. والامين طبعا زول في التجارة ذكي ولبق .. وبتعامل برقي شديد ..
ودايما مبتسم .. وتجيهو انت بايع ولا مشتري.. يتعامل معاك زي البعرفك ..
الراجل سيد البصل قال للامين .. والله يا زول انا من شفتك ارتحت ليك .. انت قول السعر البريحك.. واديني القروش وامشي ربنا يعشيك ..
الامين قال ليهو .. والله انا كمان ما استغلك ابدا .. وح اشتري منك .. واشتريك اخو وصاحب .. واي يوم تجي السوق ده.. تلقاني انا اخوك .. الراجل قعد يتبسم .. وباع للامين البصل بسعر ممتاز جدا ..
الامين رجع للزول المع الجماعة البشربو في الجبنة .. وقال ليهو الزول باع البصل بي كدا..
قال ليهو مابصدق .. ياخي نحن من الصباح بنحاول فيهو بي اكتر من كدا .. لواحد كدا .. تتخيل ابا كلو كلو .. انت عملت ليهو شنو؟؟ في خمس دقايق اداك ليهو بي سعر زي ده ؟؟..
قال ليهو شكرت ليهو بصلو .. واحترمت وقفتو .. والاحترام بين الناس متبادل يا ابن العم ..
وانا لو ما انت دليتني ووجهتني.. ده كلو ما كان لقيتو .. ربنا يكرمك ..قال ليهو الله يبارك فيك.. انت طيبتك دي .. ياها الصححت لك البيعة ..
عندك مكان تخت فيهو البصل ؟ ولا اختو ليك عندي .
قال ليهو ماعندي والله.. لكن مادام انت عندك مكان .. انا كدا اطمنت ..
الراجل طوالي كورك للعتالة شالو البصل ختو جوة ..
وباكر الامين جا وقف فوق البصل .. وباعو باسعار خرافية .. وانتظر اول بصل دخل السوق اشتراهو .. واشتغل كدا بس .. بقى يقلب في البصل وارباحو ماشة الحمد لله ..
قال ليك الزول ده في اسبوعين .. السوق كلو عرف الامين بتاع البصل .. وبقى كل يوم يجي البيت شايل القروش دي ربط .. وبقى يشتري البصل بالشحنة .. مر شهر بالطريقة دي .. ومازال دكانو الفي السوق مقفول .. وكل يوم يجي ماشي فوق الدكان .. يوم مشى للتاجر الاجمالي داك وسألو من الدكان تاني ..
قال ليهو والله الزول ده ضرب من الخرطوم.. وقال بيعو الدكان ورسلو لي قروشو .. وانت طبعا ماعندك قروش قدر البضاعة .. وشايفنك قالو ماسك سوق البصل بي اسمك اليومين ديل .. قلنا نخليك ..
قال ليهو عليك الله الكلمك منو؟
قال ليهو يا الامين نحن سلاطين السوق.. اي داخلة ومارقة عارفينها هههه ..
الامين قال ليهو انا جاهز اشتري الدكان ..
قال ليهو امشي اول حاجة افتحو .. وشوف البضاعة المنتهية.. وخليهو على الصافي النافع .. اهم حاجة تقرا تاريخ انتهاء المعلبات .. الدكان مقفول ليهو قريب الشهرين ..
قال ليهو خلاص بكرة بجي اشوف الحاصل شنو؟
الامين من هناك بررررضو مشى البيت هناك حكا لايمان الموضوع ده ..
وقال ليها انا ح اسيب سوق البصل .. وارجع لي دكاني.. واكون رجعت لي قواعدي سالم.. ولا دين ولا شيك ..
اتخيل ايمان قالت ليهو شنو؟
الى اللقاء