الصافي... طارق اللبيب

الحلقة الثالثة

  قال ليهو طبعا" انت عارف يا الامين.. انا خطبت سلمى بت نفيسه قبل سنتين .. وجيت عطبرة هنا عشان ادبر اموري .. والحمد لله الشغل مشى معاي تمام واشتغلت بالملايين ..
لكن في الفترة الاخيرة اوضاعي اتلخبطت . وتجارتي بقت تمشي في النازل . اها يازول على حسب سمعتي بتاعة زمان . اي زول داير يستثمر قروشو بجيني ..
في واحد كان معانا هنا في السوق .. اسمو موسى .. وزول صاحبي وبثق فيني جدا جدا . الزول سافر الخليج ورسل لي قروش كتيرة ..
قال لي دايرك تشتري لي تلات قطع اربعة قطع في حي المطار ..
قدر ماتجيب القروش دي بس .. اها انا على بلادتي وغباي .. قلت يازول انا احاول استفيد من القريشات ديل .. قبل ما اشتري القطع ..
في واحد من ناس الشرق ديل .. كان عندو شاحة مان بي مقطورة
.. وكان عندو ظروف عارضها بي سعر مغري شديد .. انا طوالي اتوكلت على الله .. وكلمت اصحابي اتنين سماسرة .. واتفقو معاهو
واشتريت الشاحنة .. انا اصلا ماكنت عايز اشغلا ..
بس قلت ابيعها سريع واستفيد من الفايدة . واشتري لموسى قطعو ..
اها يازول البيعة تمت .. وكانت بالنسبة لي فرحة شديدة ..
وبقيت مع ناس هاشم السمسار .. يشوف لي ليها بيعة . وفعلا هاشم بعد اسبوع بس .. قال لي عندي زول ثقة .. حيشتري العربية بي شيك مدتو شهر ..
لكن بتكون قروشها كتيرة شديد .. وانا طبعا اصابني الطمع .. وبعتها ليهو بي شيك .. على حسب ثقة هاشم .. وهاشم انا واثق فيهو .. ولمن جا مواعيد الشيك .. اتفاجات انو الزول الاشتري العربية , في السجن مطلوب ميات الملايين ..
انا خلاص وكت عرفت كدا قنعت من القروش . والله حصلت لي حالة قربت اجن .. وبقيت منتظر مع الناس المنتظرين .. الزول في السجن حصلت ليهو صدمة سكري ومات .. والناس كلهم عفو قروشهم .. وانا بقى ماعندي حل .. وماعرفت اسوي شنو .. والله قربت اطش من البلد .. واغيب ..
طبعا القروش كتيرة .. وانا بضاعتي الفي الدكان ما بتسوي الحبة ..
والله راسي شاطب شطبة يا الامين الاكل والنوم غالبني .. ولغاية هسي موسى ماعارف القصة دي..
وكل مايقول لي اشتريت القطع .. بقول ليهو شوية كدا ..مرة بقول ليهو مالقيت الشي المناسب .. ومرة بقول ليهو القطع مرتفعة .. خليها تنزل شوية .. هسي الكلام ليهو شهرين ..
والله انا مهدد بالسجن .. ولو بعت امي وابوي ما اظني اقدر اسدد الموضوع ده ..
يازول الامين وقف الاكل وقعد في الواطة .. وقال ليهو لاحول ولاقوة الا بالله .. ده شنو يا عطية السويتو ده .. دي عملية تعملا في صاحبك الوثق فيك؟
انت كيف تتصرف في امانة ادوك ليها ؟ انت كيف تبيع وتشتري في قروش ماحقتك ومن دون اذن صاحبها ؟
كمان تبيع بالشيك؟ .. والله كلامك ده جاب حمى عديل ..
عطية قال ليهو يا الامين .. هسي اللوم مامنو فايدة .. الحصل حصل ..
بس هسي انا ماعارف اتصرف كيف .. شوف لي حل .. انا كلمتك عشان تشوف لي حل ..
قال ليهو انا لو عندي حل لي قروش قدر دي ..
كان اغنيت بيها روحي . اشوف لك حل من وين عاد؟ .. شيل شيلتك
واستحمل مسؤوليتك ..
والله دي مشكلة فعلا ياعطية .. دي مصيبة شنو دي ؟
وقعدو الاتنين محتارين .. وخلو الاكل في محلو ..
..
بي هناك الصافي صحا من النوم .. وقال لي امو يمة ابوي وينو؟.
قالت ليهو شال الغدا ومشى لي عمك عطية بي غادي .. انت ماجيعان ؟ قال ليها اي جيعان . قالت ليهو خلاص امشي اكل معاهم .
طوالي قام جاري حفيان .. مرق بالباب ده .. ودخل بالباب التاني ..
وابا يعاين في الاتجاه الغربي الكان فيهو الاولاد .. بس جاري وتوش انقطع في باب بيت عطية ..
دخل وطوالي على الصينية .. داير ياكل .. ابوهو قبض ليهو يدو قبل ما تصل الاكل .. وساقو برة غسل ليهو يدو .. وجابو اكل .. بياكل وبعاين لابوهو .. وبعاين لي عطية .. واللقمة في خمشمو بعمل اممم ..
ابوهو قال ليهو في شنو يا الصافي مالك؟
الصافي مدا ليهو يدو الشمال كدا.. وجمع اصابعيهوالصغيرونات ديك مع بعض . (يعني دقيقة دقيقة .. اخلص اللقمة الفي خشمي واتكلم) هه .
ابوهو قال ليهو كويس خلص .. وعطية بقى يضحك ..
قال والله غايتو الاطفال ديل نعمة .. شوف بالله الصافي خلاني اضحك في قمة الهم ..
الصافي بلع اللقمة .. وشال نفسو كدا قال اححا .. شفت يا ابوي .. انا عرفتكم انتو الاتنين زعلانين .. انتو كنتو بتتشاكلو؟
قال ليهو لالا ابدا يا الصافي .. لكن نحن عندنا مشكلة ..
دايرين مساعده من ربنا بس ياولدي ..
الصافي قال ليهو امي قالت الداير مساعدة من ربنا .. يساعد الناس .
عطية قال ليهو ماشاء الله يا الامين .. ولدك بتكلم كلام اكبر من عمرو ..
قال ليهو ياخي ده بسأل سؤال نكير .. اي حاجة لازم يسأل منها ويعرفا ..
قال ليهو دي احسن حاجة في الاطفال .. الاسئلة الكتيرة بتفتح ليهم امخاخم .. بس انتو ماتزهجو وتضايقو من السؤالات ..
قال ليهو والله انا في همي .. لكن امو بتجاوب ليهو اي سؤال .. والاربعة وعشرين ساعة بتوصي فيهو .. التقول بالله مسافرة ..
الصافي قاطعهم تاني .. قاليهو عمو عطية عمو عطية .. اقول ليك حاجة ؟
قال ليهو ايوة قول يا الصافي .. قال ليهو لو الزول قال كلام ظنون بلقى الحاجة الرايحة ..
قاليهو كلام ظنون ده شنو يا الصافي؟ ..
قال ليهو انا نسيتو بس .. قالتو لي امي .. لكن خليني اشبع وامشي اسألها تاني ..
قال ليهو خلاص اشبع وامشي اسألها ..
عطية قال للامين و كلام ظنون ده شنو يا الامين ؟ الامين قال ليهو شن خبرني هه..
الصافي بلع اللقمة .. وقال لي عطية قالو ليك ماتستعجل .. اصبر اصبر النشبع .. الاتنين ضحكو .. وقال ليهو خلاص راجنك يا الصافي ..
المهم الصافي بعد شال اخر لقمة .. وابوهو ساقو عشان يغسل ليهو يدو .. الصافي بقى يتكلم براهو ..
زي البقول ليهو في نغمة كدا بقول .. المستعجل وقع متكنجل ..
والضياق خنقو الفاق .. (الفاق :ابو الشهيق) ..
المستعجل وقع متكنجل .. والضياق خنقو الفاق ..
عطية قال ليهو والله ياولدي كلامك صاح .. انا بلا الاستعجال والضيق ..
شي سواها فيني مافي .. الكلام ده شنو البتقول فيهو ده يا الصافي؟؟ .. قال ليهو ده بتقولو لي امي .. لامن اكون جيعان وببكي للاكل .. بتقول لي المستعجل وقع متكنجل .. والضياق خنقو الفاق ..
وماكمل كلامو قام جاري تاني بيغادي لي امو .. قال ليها يمة يمة ..
كلام ظنون شنو .. ؟؟
قالت ليهو ما كلام ظنون .. دعوة ذوالنون.. انت اي كلام تحولو ..
قال ليها خلاس خلاس هو شنو بس؟ ..
قالت ليهو حفظتك ليهو زمااان .. لا اله الا انت سبحانك اني كنت من الظالمين ..
السألك منه منو يا الصافي الكلام ده ؟
قال ليها عمو عطية عمو عطية .. وهو جاري على الباب ..طلع ولف بالشارع تاااني .. ودفر الباب بتاع عطية بي نفس سرعتو الجاري بيها ..
عمو عطيه عمو عطية .. قالت ليك دعوة زول نون .. لا اله الا انت سبحانك اني كنت من الظالمين ..
عطية قال ليهو والله يا الامين تبارك الله ..
ان شاء الله ربنا يقسم لينا حريم زي ايمان .. ربنا يحفظها ..
الامين قال ليهو فعلا يا عطية .. شفت الدعوة دي .. والله قالو اصلو مابتجلي .. فيها حديث عديل ..
عطية قال ليهو يازول ان شاء الله ربنا يهون .. والله انا في درك عديل ..
الامين قال ليهو قالو يا عطية الملايكة تنطق على السنة الاطفال .. كلام الصافي ده ماتهملو .. احتمال ربنا داير يفرج عليك ..
عطية قال ليهو ملايكة شنو يا الامين؟ البتنطق في السنة الاطفال؟ انت برضو بتقتنع بالخرافات دي ..
انا اصلا الحمد لله بساعد الناس .. والدعوة دي بعملا باذن الله ..
طبعا هم بتكلمو الاتنين .. وماخاتين بالهم للصافي ..الصافي واقف متكل على الكرسي .. ويعاين ليهم وبسمع بكل انتباه ..
بعد خلصو الكلام .. الصافي مشى لي اموتاااني .. قال يا امي انا عايز اسألك سؤال .. شنو يعني الدرك؟
قالت ليهو دي كمان سمعتها وين؟
قال ليها عمو عطية قال لي ابوي (انا في درك عديل) .. ايمان قالت يالطيف .. مالو ياربي عطية؟؟ ان شاء الله مايكون عندو مرض ولا حاجة" كعبة ..
الصافي سمعها .. قال ليها يعني درك معناها مرض ؟
قالت ليهو لالا يا الصافي مامعناها مرض .. انت اصبر انا بسأل منها وبكلمك .. لكن تاني ماتسأل منها زول .. قاليها .. سمح ..
ايمان قلقلت فعلا .. وبقت مستعجلة ومنتظرة الامين .. يجيب العدة ويجي يشيل الشاي .. وتساله من الحاصل على عطية شنو ؟ والامين اتاخر شديد .. وأذان المغرب قرب يأذن ..
الامين طبعا قاعد مع عطية محتار والفي راسو كلها كملانة .. وبقى مستحي يسـال عطية عن طريقة شغل ليه..
لانو حس انو مشكلة عطية اكبر من مشكلتو .. المهم في النهاية قال ليهو نحن ياعطية .. المفروض مانقعد نربع ايدنا وننتظر .. لمن يجي موسى سيد القروش .. لازم نتصرف نعمل البنقدر عليهو ..
قال ليهو والله يا الامين انا ماخليت حاجة .. ياخي انا سافرت لي اهل الزول ده في حلفا الجديدة .. لمن لقيتهم حزينين والدنيا مضلمة في وشهم .. والله استحيت اقول ليهم المرحوم ماكلني قروش كدا وكدا ..
الامين قال ليهو كدي هسي .. انا بمشي معاك السوق بكرا .. ونشوف ح نغمل شنو ؟
ماعارف لكن انا حاسي نحن لو اتصلنا على موسى .. وحكينا ليهو الحقيقة ..
عطية قال ليهو لالالالا .. دي الوحيدة المابقدر اعملا ..
قام الامين شال الصينية بتاعة الاكل ووداها بي غادي لايمان .. وهو سارح خت الصينية وبالو بعيد وايمان تعاين ليهو في وشو وهو ماجايب خبر..
قالت ليهو في شنو يا الامين ؟ عطية مالو الحاصل عليهو شنو؟
الامين طير عيونو قعد يعاين ليها كدا قال ليها مالو؟
انتي عرفتي من وين؟
قالت ليهو عليك الله تحكي لي يا الامين والله انا كدي لابقدر اكل لابقدر انوم .. عطية مالو ؟؟..
الامين قعد في نص السرير .. لكن هل .. ممكن يحكي ليها .؟
نشووووف ..
الى اللقاء ..